Dɔgdu 3

1K u biɛ maad: « Diɛn kadaaɔg g te Sard Kristo‑yab tintaancagl malɛg g maad’o g yua nba mɔg Yendu fuom banlile yen ŋmaabid ŋanlile ŋann n maad yal nba n ne: “ N ban ŋan suun yal nba kul. Niib bonciɛnn mali k a fo i, k a yen kpe o. 2Fiil g mɔnd g yal nba tenn g be a ninŋ ń daa kpe g gbenn, g dugn n diid g sua tuona nba k a sun kul, l g pund n Yendu n bo bua nand. 3Lann, tiɛd tundl nba k a bo gaal nyan po, yen ŋan bo gbad l tundl nand, g tug g sun yenn tuonn g lebd a binbem. A gii g fiil, n bu baal g libl’a nyan naayig nyan i. A kan bann youg nba k n bu baal. 4Ama siɛb be Sard nyan g g jɔgn b tiɛd. Banm n tan baa sonm yen’n g liɛ tiɛpiend g dugn b dagd yenn. 5Yua nba kɔn jad g paad tan baa liɛ tiɛpiend nnyan i. N kan ban g piin u sann miɛl kadaaɔg n ninŋ. N tan bu tuo g maad n Baa Yendu nunŋ n yen u malɛg‑nba buol k u tie n yua i. 6Yua n mɔg tuba g bu gbad, wan gbad Foŋanm n maad Kristo‑yab tintaancaga yal ”. » 7K u biɛ maad: « Diɛn kadaaɔg g te Filadɛlfi Kristo‑yab tintaancagl malɛg g maad’o g yua nba tie niŋan g biɛ tie mamɔnmaad, g diɛ bad Dafiid pienu g tu luod gann g nil kan fid g luon, g biɛ luon g nil kan fid g luod n maad yal nba n ne: 8“ N ban ŋan suun yal nba kul. N ban k a g ŋanm g mɔg yikod. Yen l kul ne a yen tug n maam g sun yenn tuonn, g biɛ g yie k a g ban’n. N luod gann n nyan a nunŋ n g sua kan fid g luon. 9Sitaan tintaanu niib nba fa k b tie Suif‑nba g yen g tie nyan, diid, min bu tien’m yal nba n ne: N bu te k ban baal g gbaan a nunŋ n g bann k n bua’a. 10G nyaan fin nuan, min maad’a k a juun, k a tuo g juun nyan, n tan bu guul’a youg nba g bignn bu baal g yil ŋanduna kul po, g bign ŋanduna niib. 11L kan wai yen min baal. Ŋanm gii kub ŋan mɔg yal nba, g sua ń tan daa fiel ŋan kɔn g paad g bu gaal yaa pani nba. 12Yua nba kɔn jad g paad, n bu tug’o g tien’o jaantalg i, n Yendu jaanddeciɛɔnŋ n. Siɛl ji kan fid g bel g nyan’o. N bu diɛn n Yendu sann u po g biɛ diɛn n Yendu doug sann mɔ u po. L doug n tie Serusalɛm-paann nba nyiɛ polu po n Yendu buol g ji. N biɛ tan bu diɛn u po min mɔg sanpaann nba. 13Yua n mɔg tuba g bu gbad, wan gbad Foŋanm n maad Kristo‑yab tintaancaga yal ”. » 14K u biɛ maad: « Diɛn kadaaɔg g te Lawɔdise Kristo‑yab tintaancagl malɛg g maad’o g yua nba k b yi’ug Amɛnn, k u tie sieda yen mɔni, g tie mamɔnmaad g biɛ tie yua nba g Yendu bo te k u tag bonn kul n maad yal nba n ne: 15“ N ban ŋan suun yal nba kul. N ban k a g sɔnŋ ii, n ban k a biɛ g ton mɔ. Man kaa yen bo sɔnŋ lann i kaa g yen ton n ne. 16Ama ŋan g sɔnŋ g biɛ g ton, g bali ne i, n bu siin’a. 17N tua a yed k a tie mɔgd i, g kpaan mɔgm g kul a kua g siɛl kan pɔd’a naa ? A yen g ban k a tie cicagdaan yen ninbadaan i. A tie nandaan i, g tie juan g biɛ paa niiyann. 18L po n te k n cegi’a k a daa n buol wula nba k b donn g nyan jɔgnd g mɔgd, g daa tiɛpiend g legn a fai, g biɛ daa ninbina kpam g tien a ninbina n ninŋ g nyuand. 19Min bua yab nba kul, banm i k n ŋmagd’b g biɛ diɛl b tuba. Lann daa jeln kaa, lebd a binbem. 20Cenŋ ne, n sie dimɔb n g kuog gann, l gii tie g nil gbad n niɛlu g luod gann, n bu kua k min yen wano ń taan g di. 21Yua nba kɔn jad g paad, n bu te wan taan g kal yen’n n badkog po, nyan min mɔ n kɔn jad g paad k min yen n Baa taan g kal u badkog po nyan. 22Yua n mɔg tuba g bu gbad, wan gbad Foŋanm n maad Kristo‑yab tintaancaga yal ”. »

will be added

X\