Dɔgdu 22

1Lann i g malɛg biɛ ŋɔn’n bɔnŋ nne k u nyum tien miɛl, k l nyum fan cad cad, g puub g nya Yendu yen Pebig badkog buol. 2Tiig nba tien miɛl bo sie doug n niib n bo taand lieb naan finfanm sinsiign i. Bɔnŋ nba bo puub g nya l finfanm n nyan bo mɔg l bɔngbiɛni yinle kul po l miɛl tiig, k l luon binn n ninŋ piig yen taal munle, g ŋmaalg n ninŋ k u luon taal yenm, k u faad biɛ tie tebug ŋanduna buoli po. 3G Yendu n pol yal nba kul mɔb ji kan gii be l doug n ninŋ. Yendu yen Pebig badkog baa be l doug n ninŋ i, g Yendu niib pug’o. 4B bu la u nunŋ, k u sann ń biɛ diɛn b yutuna po. 5Nyiɛɔg ji tan kan gii be, baa sua tan kan gii kpaan fidl yinyiem g bual yendupudkaɔg yinyiem, k l maa Yonmdaan Yendu yinyiem n tan baa fand’b. B tan bu di bal g kal saa yen youg nba g mɔg juog. 6G malɛg biɛ maad’n: « Maam ne tie mɔni i, g biɛ dagd yen nil ń gii dug l po. Yonmdaan Yendu nba tu te u sogni‑nba Foŋanm ban gii muand u laabaal nyan, wano n sun u malɛg k wan baal g ŋɔn yab ŋua’ɔg nyan yal nba bu baal mɔlane. » 7G Yiesu maad: « Diid a, n baad mɔlane. Yua nba cɔln maam nba nyiɛ Yendu buol k b diɛn kadaaɔg ne ninŋ, pamann tie u yal i. » 8Min San, n gbad g biɛ la l bona kul. Min yaan gbad g biɛ la g gbenn, k n baa g gbaan malɛg nba bo ŋɔn’n l bona nyan nintual n, g bu pug’o. 9Ama k u maad’n: « N n, daa tie nnyan. N mɔ tie tuonsunn nyan fin nyan i, nyan a ninjanm Yendu sogni‑nba yen yab nba cɔln maam nba diɛn kadaaɔg ne ninŋ nyan. A baa pug Yendu i. » 10K u biɛ maad’n: « Daa wuod maam nba nyiɛ Yendu buol k b diɛn kadaaɔg ne ninŋ, k l maa youg nba k l bona kul bu tien pund o. 11Yua tie nibiiug, wan l gii suun u tuonbiid, yua suun jɔgntuona mɔ, wan l gii suun u jɔgntuona, ama yua nba tie nimɔn, wan l gii tie ŋanm, g yua nba mɔ k u binbem ŋan Yendu nunŋ n, wan l gii be nnyan. » 12G Yiesu maad’n: « Diid a, n baad mɔlane, g diɛ sua kul tuona nyuad g bu pa’ɔg nyan wan sun nand nyan. 13Min n tie Alfa g biɛ tie Omega, g be liig g biɛ be puol, g tie cilg g biɛ tie juog. » 14Yab nba ŋuni b liɛdfagd, pamann tie b yal i. L po, b bu cab’b ban mua tiig nba tien miɛl nyan luana, g biɛ tɔgn dimɔi g kua doug n. 15G nyaan yab biil b kua nyan sangbanni nyan yen belbɔndanm yen cuncona yen nikpiila yen yab pug yennaankad, l faaɔgdanm kul kan kua l doug n palb. 16« Min Yiesu, min n sun n malɛg i buol, k ŋan ŋɔn Kristo‑yab tintaancaga k l bona kul tie mɔni i. N tie Dafiid yaabuonn i, siŋaafaani ŋmaabig g pien cad cad cad. » 17G Foŋanm yen Pebig sikpenŋ maad: « Baal ! » G yua nba gbad l maam mɔ ń maad: « Baal ! » Yua g nyunnyuglu mɔg’o, wan baal. G yua bua nyum nba tien miɛl, wan baal g gaal faala. 18Min San, n maad’i faa ! Yua nba kul gbad maam nba nyiɛ Yendu buol k b diɛn kadaaɔg ne ninŋ, l gii tie g nil pugn siɛl l maam po, Yendu bu te yubɔnbuolu nba be kadaaɔg ne ninŋ ń baal’o. 19L biɛ gii tie g nil nyan siɛl l maam po, Yendu bu bel’o k u kan la nyuad nba k b diɛn l po kadaaɔg ne ninŋ, lan tie k u kan la tiig nba tien miɛl luana g tie u biinu nyan, u biɛ kan kua Yendu doug n ninŋ. 20Yua kun mɔni l bona po maad: « Yen mɔni n baad mɔlane. » Amɛnn ! Yonmdaan Yiesu, baal ! 21Yonmdaan Yiesu ŋalbalg ń gii be yen i kul.

will be added

X\