Dɔgdu 20

1Lann i k n biɛ la malɛg k u nyiɛ polu po g ji, g diɛ u nuu n ninŋ buoug nba nyua g g mɔg po pienu yen kudsiseli nba kpai. 2K u suol bonbiiug nba tie nyan waakpel nyan, waaɔg nba bo kpel g be, k u sann tie sanpola bad lann i kaa Sitaan, g lol’o yen kudsiseli k u baa luol bina tudl. 3G tug’o g lu’ug buoug nba nyua g g mɔg po nyan ninŋ, g biin g pɔl, k wan ji daa fid g kuan ŋanduna ne doi kul n ninŋ niib tudm n ninŋ saa yen youg nba k l bina tudl po tan bu pend. L puol po, l bual k ban lod’o g ŋaa’ɔg k lan yann waam. 4K n biɛ la badkogi, k b tie yab nba baal g kal l po nyan yiko k ban bu buud. Banm n tie yab nba k b bo cua g jagd b yula k l maa b bo kun mɔni Yiesu po yen Yendu maam po, g g gbaan g pug bonkobg ŋann g bual u ninnaɔnŋ, g biɛ bo g gaal l bonkobg banm b yutuna po g bual b nui po nyan. K b yied kpienm siign, k banm yen Kristo dii bal bina tudl. 5Banm n tie yab nba cind g yied kpienm siign. Kpienlieb nba tenn bo g yied saa yen youg nba g bina tudl po tan pend. 6Yab nba kpiɛ g yied kpienm siign ninŋ, pamann tie b yal i. Banm n tie Yendu niib. Munle po kuum ji g mɔg nuu b po. Banm n baa tie Yendu yen Kristo salg-yidkab, g biɛ taan g di bal yen Kristo bina tudl. 7Bina tudl po gii pend youg nba, b bu luod Sitaan g ŋaa’ɔg, 8wan gad g bɔnd buoli nba kul be tinŋ po ne, lan tie Gɔg yen Magɔg, g taan b niib kul k ban pua tɔb. B baa yab nyan mɔgl n tanbiini nyan i. 9K n la k b nyiɛ g tiɛ tinŋ kul, g kaan g lind Yendu niib n be naan, lann n tie doug nba g Yendu ŋanm g buad nyan. Ama g muu nyiɛ polu po g jiid, g dii Sitaan n bo taan niib nba nyan. 10Lann i k b tug Sitaan, yua nba bo bɔnd l niib nyan, g lu’ug buoug nba gbie yen celbil g so muu nyan ninŋ, naan nba k b bo kpiɛ g lu bonkobg yen yua fa k u tie Yendu sogni nyan. L buol i k b baa laad cicagm yendu n yen nyiɛɔg saa yen youg nba g mɔg juog. 11Lann i k n la badkogciɛɔnŋ nba pien yen yua nba kal l po. G polu yen tinŋ kul san g fagd u buol g bod canyiin. 12K n la yab nba bo kpe nyan, nigbenŋa yen yab g tie nigbenŋa k b sie badkog ŋann nintual n. L youg g kadaad pɔbd, g kadalieog nne mɔ pɔbd g tie miɛl kadaaɔg. K b jiɛl yab nba bo kpe nyan buud nyan ban bo sun nand k l diɛn l kadaad n ninŋ nyan. 13G mɔgl nyan kpienm nba be nyum n ninŋ, g kuum yen tinkpiiug mɔ nyan ban bo diɛ yab, k b jiɛl b kul ne buud nyan ban bo sun nand nba nyan. 14K b tug kuum yen tinkpiiug g lu’b buoug nba gbie yen muu nyan ninŋ. Buoug nba gbie yen muu nyan n tie munle po yaa kuum. 15K b tug yua nba kul k u sann g diɛn miɛl kadaaɔg n ninŋ, g lu’ug buoug nba gbie yen muu nyan n ninŋ.

will be added

X\