Dɔgdu 2

1G yua nba k n la’ɔg nyan maad’n: « Diɛn kadaaɔg g te Efɛs Kristo‑yab tintaancagl malɛg g maad’o g yua nba diɛ ŋmaabid ŋanlile u nuujendu, g sonm fidtuanbona ŋanlile nba k b tien yen wula nyan sinsiign n maad yal nba n ne: 2“ N ban ŋan suun yal nba kul. N ban a nyignn yen a juunn po. N biɛ ban k a kan fid gii be yen nibiid. A bign yab yed k b tie Yiesu sundi g yen g tie, g diid g sua k b tie faaɔgdanm i. 3N ban k a mɔg juunn, k a biɛ la fala n sann po, g nyaan a g ŋaa k a pal wad. 4Ama yal g manŋ n po a buol tie k a ŋaa ŋan daan kpiɛ g mɔg buam nba n po i. 5Tiɛd ŋan bo tu be binbem nba g ji tan kpiɛd nyan, g mɔ kua g lebd a binbem g guan gii suun ŋan daan cind g suun yal nba. A gii g lebd a binbem, n bu baal g tug a fidtuanbonn g lie lan tu be naan. 6G nyaan a suun bonyenn k l ŋan. A mɔ g tuo Nikolaayiit-nba n suun yal nba nyan min nyan. 7Yua n mɔg tuba g bu gbad, wan gbad Foŋanm n maad Kristo‑yab tintaancaga yal. Yua nba kɔn jad g paad, n bu te’og Yendu gɔglug n ninŋ tiig nba tien miɛl luana wan mua ”. » 8K u biɛ maad: « Diɛn kadaaɔg g te Simiirn Kristo‑yab tintaancagl malɛg g maad’o g yua tie kpinkpiɛ‑g‑liid g biɛ tie yua juod, g bo kpe g biɛ guan g fo n maad yal nba n ne: 9“ N ban a fala yen a namu po, g nyaan a yen tie mɔgd i. N ban niib n maad mabiid nba a po. B yed k b tie Suif‑nba i, g yen g tie. B tie Sitaan tintaanu yab i. 10Daa jie fala nba bu baal’a. Cenŋ ne, Sitaan bu bign’i g te k ban suol yenm g luon’m dansalg. B bu cagn’i daa piig. I ŋua’n yen a pal kul saa yen a kuum, k n tan bu pa’a pani, lann n tie miɛl nba kan ban g gbenn. 11Yua n mɔg tuba g bu gbad, wan gbad Foŋanm n maad Kristo‑yab tintaancaga yal. Yua nba kɔn jad g paad, munle po yaa kuum ji kan fid g tien’o baa siɛl ”. » 12K u biɛ maad: « Diɛn kadaaɔg g te Pɛrgam Kristo‑yab tintaancagl malɛg g maad’o g yua nba mɔg jugfuaɔg nba k b luan k l mɔi yinle kul man n maad yal nba n ne: 13“ N ban k ŋan kua naan nba nyan, Sitaan badkog be l buol i. G nyaan a sie n puol po k l paa. Baa ban bo tan kpii Antipas, yua bo tie n sieda yen mɔni, i doug n ninŋ, Sitaan n kua naan nyan, a bo g yie’n, a bo l dug n po i. 14Ama yal g manŋ n po a buol tie k a mɔg niyenm k b ŋua Balaam tundl. Wano Balaam n bo ŋɔn Balak wan bu tien nand g bign Israyɛl yab g te k ban ŋman padnand g biɛ sun cuncontuona. 15L biɛ tie nnyan i k i ninŋ siɛb mɔ ŋua Nikolaayiit-nba tundl. 16Lann, lebd a binbem, lann i kaa n bu baal a buol mɔlane yen jugfuaɔg nba nya n mɔb n, g kɔn yen l niib. 17Yua n mɔg tuba g bu gbad, wan gbad Foŋanm n maad Kristo‑yab tintaancaga yal. Yua nba kɔn jad g paad, n bu te’og mann nba wuo. N biɛ bu te’og tanpienn, l tann po b diɛn sanpaann g sua g ban l sann, l gii g tie yua nba gaal l tann i kaa ”. » 18K u biɛ maad: « Diɛn kadaaɔg g te Tiatiir Kristo‑yab tintaancagl malɛg g maad’o g yua nba tie Yendu Bija, k u ninbina so nyan muupienu nyan, k u titala naan nyan nabnd nba k b pul muu n k l nyili nyan n maad yal nba n ne: 19“ N ban ŋan suun yal nba kul, g ban ŋan bua Yendu nand, g ban ŋan ŋua’ɔg nand yen a pal kul, g ban ŋan tod a lieb nand yen a juunn po. N ban k ŋan juod g sun tuona nba yab g cie ŋan bo cind g sun yal. 20G nyaan yal g manŋ n po a buol tie k a ŋaa puo nba yed k u tie Yendu sogni, k b yi’ug Sesabɛl nyan, k u tund n tuonsunna g te k b tud Yendu sɔnu, g ŋman padnand g biɛ suun cuncontuona. 21N bo bil’o dana k wan lebd u binbem, ama k u g bua k wan ŋaa u cuncontuona. 22L po n te k n bu duan’o yiɛlu nba biɛ. U yegni nba taan g suun yen’o cuncontuona nyan, n bu te b mɔ ń cagn bonciɛnn l gii tie k b g lebd b binbem g ŋaa u tuonbiid sunu. 23N bu te yiɛlu nba kpi g lalg ń kpi u ŋuantieb. Nnyan i g Kristo‑yab tintaancaga kul bu bann k min n tie yua nba ban nifosaal maalm yen u yanbuam. N tan bu pa yua kul nyan wan sun nand nba nyan i. 24Ama yinm nba tenn g tie Tiatiir Kristo‑yab tintaancagl yab, g g ŋua l faaɔg tundl g biɛ g bua k yin bann l niib n yi yal g Sitaan ŋasiil, n maad’i, n ji kan pugn’i siɛl yaa tugl, 25l gii g tie k i ŋanm gii kub yin mɔg yal saa yen n baalu i kaa. 26Yua nba kɔn jad g paad g biɛ tie min bua yal saa yen juog, n bu te wan gii mɔg yikod ŋanduna ne doi kul po 27nyan min mɔ n gaal l yikod n Baa buol nand nba nyan. U baa kub’b yen paalu nyan ban tu diɛ kud nba paa g mud boba nand nba nyan. N biɛ bu te’og siŋaafaani ŋmaabig. 29Yua n mɔg tuba g bu gbad, wan gbad Foŋanm n maad Kristo‑yab tintaancaga yal ”. »

will be added

X\