Dɔgdu 19

1L puol po, k n gbad fuug nne polu po, k l tie nyan niwulug nba g mɔg dindin nyan n yiin yen paalu g tua: « Aleluya ! Fielu yen yudand yen paaciɛnu tie t Yendu yal i. 2U buud nyuan g biɛ tie mɔni, k l maa u bu puocunconbad buud, g buud dii’ug g dugn wan diɛ u cunconm g kuand tinŋ n ne niib jɔgnd n ninŋ nyan po. Yendu dad u tubl g dugn u kpii u tuonsunna. » 3G niwulug ŋann biɛ yiin g tua: « Aleluya ! Doug nba k b juu muu nyan muunyiiug baa l do polu i, saa yen youg nba g mɔg juog. » 4G nikpela piinle yen banna yen bonfuoda banna ŋann baa g gbaan, g pug Yendu nba kal badkog po nyan g maad: « Amɛnn. Aleluya ! » 5Lann i g niɛlu nne nyiɛ badkog buol g tua: « Dond man t Yendu, yinm nba kul ŋua’ɔg g biɛ cɔlm’o, nigbenŋa yen yab g tie nigbenŋa, dond’o man. » 6K n biɛ gbad niɛlu nne k l paa nyan niwulug nba g mɔg dindin yal nyan. A bu yed g mɔgl nyunguona fuug lann i kaa tatintandi nba paa fuug u. L niɛlu bo maad g tua: « Aleluya ! T Yonmdaan t Yendu Paaciɛnudaan kaan u bal o. 7T gii be man pamann n ninŋ gii kpanm gii dond’o, g dugn youg pund yen Pebig ń kuan u puo, k u sikpenŋ mɔ biɛ bob g gbenn o. 8K b cab sikpenŋ k wan liɛ cabŋana tiɛd nba pien g nyili g tuud. » L cabŋana tiɛd tie Yendu niib n sun tuonŋana nba k l tuo u po. 9G malɛg yeno maad’n k n diɛn ne: « Yab nba k b yiin’m Pebig puokuanu jaanm, pamann tie b yal i. » G malɛg ŋano biɛ pugn g maad: « Maam ne tie Yendu maam i, g tie mamɔnm. » 10Lann i k n baa g gbaan malɛg nintual n ninŋ g bu pug’o. Ama k u maad’n: « Daa sun lann, k l maa n mɔ tie tuonsunn nyan fin nyan i, nyan a ninjanm nba ŋɔnŋ niib Yiesu n kun mɔni nba nyan i. A baa pug Yendu i. » Yen mɔni Yiesu n kun mɔni nba tie Yendu n te g Foŋanm maad wano Yendu sogni‑nba yal nba i. 11Lann i k n la g polu po luod, g tanjapienn sie, g yua nba jag’o sann tie Mamɔnmaad, yua dagd yen ban gii dug u po, k u bu buud g biɛ kɔn jad nba tuag mamɔni sɔnu. 12K u ninbina so nyan muupienu nyan, k u yil badfegli bonciɛnn. G sann nne diɛn u po, g baa sua g ban l sann, l gii g tie wano kua i kaa. 13K u liɛ tiɛd nba k b nyua sɔm n ninŋ, k b yi’ug « Yendu Maam. » 14G polu po sijenm liɛ tiɛpiend nba nyili g g mɔg siɛl yaa jɔgnd, g jag tanjapiena g ŋua’ɔg. 15G jugmanŋ nne nya u mɔb n ninŋ k u bu tug g kɔn yen ŋanduna ne doi kul niib g paad’b. Wano n tan baa diɛ danml nba k b tien yen kud g ŋmagd’b. U bu ŋmaa g mad’b nyan ban tu ŋmaad dimɔunŋ tiidi luana buoug n ninŋ g nyanŋ l nyum nyan i. Nnyan i k u bu ŋɔn g Yendu Paaciɛnudaan mutuol duo bonciɛnn. 16K b diɛn u liɛdl po yen u pann po sann nba ne: « Batieb kul yaa Bad, yonmdanm yaa Yonmdaan. » 17Lann i k n biɛ la malɛg k u sie yendupudkaɔg n ninŋ, g ta yen paalu g yi bonyugda nba yuug hal polu polu nyan g tua: « Tigl man g baal Yendu n bobn jaanciɛɔnŋ nba. 18Baal man g di batieb gbannand yen sijeciɛnm gbannand yen paaludanm gbannand. Baal man g di taani yen b tanjagla gbannand. Baal man g di niib kul gbannand, yonmi yen yab g tie yonmi, nigbenŋa yen yab g tie nigbenŋa gbannand. » 19Lann i k n la bonkobg yen tinŋ n ne batieb, k b tigl b sijenm g bu pua tɔb yen yua nba jag taanm nyan yen u sijenm. 20K b suol bonkobg yen yua fa k u tie Yendu sogni nyan. Yua fa k u tie Yendu sogni nyan, wano n bo tie yaalidug bona l bonkobg sann po, g bɔnd yab nba bo gaal bonkobg ŋann banm g biɛ bo gbaan g pug u ninnaɔnŋ nyan. K b tug banm banle kul k b fo, g lu’b buoug nba gbie yen celbil g so muu nyan n ninŋ. 21G jug nyiɛ yua nba jag taanm nyan mɔb n ninŋ g kpii yab nba tenn kul, g bonyugda kul dii b gbannand g tan guo.

will be added

X\