Dɔgdu 18

1L puol po k n la malɛglua k u nyiɛ polu po g jiid, g mɔg yudand bonciɛnn, k u yinyiem fand tinŋ kul. 2U bo tand yen paalu g tua: « U baa o, dogbenŋl Babilɔnn baa o ! U ji te sanpola binbebuol i, cicilbiid yen bonyugdbiid nba g ŋan nyuandu kul wunwuonbuol. 3G dugn ŋanduna ne doi kul niib tien cunconm yen’o k l daan pend. L tie nyan dimɔunŋ u k u nyun’m nyan. Tinŋ n ne batieb tien cunconm yen’o, g tinŋ n ne kpinkpenda mɔ te ŋalmandanm g dugn u ŋanm g buad bonŋana. » 4Lann i k n biɛ gbad g niɛlu nne nyiɛ polu po g maad: « N buolu niib, nya man Babilɔnn doug n g tan daa taand yen u niib g tie biid, g yubɔnn nba baad’o ń tan daa lag i po. 5G dugn u biid taan taan g daan tuu polu, g Yendu tiɛd u tuonbiid po. 6Wan tu tie lieb nand nba, yin tien’o nnyan, wan tien tuonbiid nba, yin ŋmiɛn’o l pann taal munle. Wan tug ŋmanŋ nba g tien’m u dimɔunŋ nyan, tug man dimɔunŋ nba paa g cie l dimɔunŋ taal munle g tien’o l n ninŋ. 7Wan ŋanm g tug yudand yen bonŋana g kun u kua nand nba nyan, te man g cicagm ń gbad’o nnyan, k wan biɛ gii be pabɔnn n. U maad u pal n ninŋ k u tie puobad i, k u g tie pekual kaa. K u biɛ kan ban gii be pabɔnn n ninŋ. 8L po n te g yubɔnn ne kul tan bu baal’o diyenn kua: yiɛlu nba kpi g lalg bu suol’o, k wan gii be pabɔnn n, g kom ń baa’ɔg, muu ń biɛ di’ug, l kul ne bu tien g dugn Yonmdaan Yendu nba bu’ug nyan mɔg paalu. » 9Tinŋ n ne batieb nba bo tien cunconm yen’o, g biɛ taan yen’o k b tug bonŋana g kun b kua nyan tan baa buud g fabn l doug po, youg nba k b bu la k u di muu g muunyiiug do. 10B tan baa sie fagm i g dugn b jie k l doug cicagm tan bu baal’b, g ji gii tua: « Kɛto, kɛto, dogbenŋl Babilɔnn, doug nba tu mɔg paalu, youg waam nne kua dagd yen ban dad a tubl ii ? » 11G tinŋ n ne kpinkpenda mɔ buud g be pabɔnn n ninŋ g dugn u po, k l maa baa sua ji g daa b tiɛd. 12L tiɛd n tie wula yen ligtana, yen tannyinyili yen laani yen tutuuda yen bani, cabŋana yen cincenlugda yen cincengbenŋa. Tiidi nne daad bo be g nu g man. Ban bo tug luounŋ nyina yen daad nba k l daaɔg paa g kpied kpied bona nba bo be. Bonlaa mɔ bo be k b tag yen nabnd yen kuda yen tana nba ŋan k l daaɔg paa. 13Bonnunubd nba k b yi kanɛl be, g bonnunubbuolu-buolu be, g tilaalbuolg nne be k b yi miir. G tilaalbuolu-buolu yen ŋubl be. G dimɔunŋ yen kpam yen yom yen dibim yen nai yen pei yen taani yen tantold yen yonmi yen ban pua tɔb g suol yab nba mɔ be. 14G kpinkpenda maad l doug: « Yal nba kul k a tu bua ŋan gii mɔg yen a ŋalman kul yen a bonŋana kul bod g ŋaa’a no. Sua ji kan ban g la palb. » 15Kpinkpenda nba bo tien kpinkpeonŋ l doug n ninŋ g mɔgd nyan tan baa sie fagm i g dugn b jie k l doug cicagm tan bu baal’b. B tan baa buud g be pabɔnn n ninŋ, 16g tua: « Kɛto, kɛto, dogbenŋl nba n mɔg cabŋana yen cincenlugda yen cincengbenŋa, k u tutuuda yen u laani yen u bani tien yen wula yen tana nba nyili, 17lann youg waam nne kua dagd yen a ŋalman kul ń te fam ii ? » G yab nba tie ŋadnd yudanm kul yen yab kul kua l ŋadnd g saa sɔnu yen yab kud ŋadnd yen yab nba suun mɔgl n ninŋ kul, k b ji sie fagm, 18g nyuan g doug di muu g muunyiiug do k b yign g tua: « T g ban g la dogbenŋl nyan doug ne nyan. » 19K b pug tand b yula po, g buud g be pabɔnn n ninŋ g yign g tua: « Kɛto, kɛto, dogbenŋl nba mɔg ŋalman, g yab mɔg ŋadnd kul tien kpinkpeonŋ l doug n ninŋ g mɔgd, youg waam nne kua dagd yen ban tien’o fam ii ? » 20Yinm nba be polu po, yen Yendu niib yen Yiesu sundi yen Yendu sogni‑nba, i kpanm man yen pamann l doug mudu po k l maa Yendu bu l doug g dugn bonbiil nba kul k u tien’i nyan po. 21Lann i g malɛg nba mɔg paalu tug tann k l ja nyan naal nba kpai nyan, g lu mɔgl n ninŋ g maad: « B tan bu yugl dogbenŋl Babilɔnn g lu’ug yen paalu nnyan i. Sua ji kan ban g la’ɔg. 22Babilɔnn, b ji kan ban g gbad g biɛpuala pua, g yanyinna yiin, g yelpieba yen naatunpieba pieb a doug n. B kan ban g la yab suun nuu tuonn, b biɛ kan ban g gbad naal fuug a doug n. 23Fidl ji kan ban g son a doug n, nil kan ban g gbad jua yen puo nba daa kuan lieb mɔlane niɛlu a doug n. L yaa kul ne bu tien k l maa a kpinkpenda n bo tie nigbenŋa tinŋ po ne, k a diɛ a nyɔgi g yi doi kul niib. » 24Yal biɛ pugn n tie k l doug n ninŋ, b la Yendu sogni‑nba sɔm yen Yendu niib sɔm, banm nba kul k b bo kpii’b tinŋ po ne sɔm.

will be added

X\