Dɔgdu 17

1Lann i g malɛg‑nba banlile nba bo diɛ seni yinlile nyan ninŋ yend baal g maad’n: « Baal k n bu ŋɔn’a ban bu jiɛl puocunconbad nba kua g kpiɛ bɔnciɛnd nyan buud nand. 2Tinŋ n ne batieb tien cunconm yen’o, g tinŋ n ne niib mɔ nyuu u cunconm dimɔunŋ g buo. » 3K n gbie yen Foŋanm, g malɛg tug’n g gad yen’n tinkuonŋ n ninŋ, k n la g puo jag bonkobbiiug po. L bonkobbiiug bo mɔn i peounŋ, g mɔg yula ŋanlile yen yina piig, g sana nba sugd Yendu mɔ diɛn u gbanu kul po. 4L puo bo liɛ tiɛmɔnd nba k l daaɔg paa, k u tutuuda yen u laani yen u bani tien yen wula yen tana nba nyili. U bo diɛ wula senŋ k l gbie yen u cuncontuonjɔgna nba k u suun. 5G sann nne diɛn u yutunn po g tie ŋasiil. L bo diɛn: « Dogbenŋl Babilɔnn, puocuncona naa yen ŋanduna ne tuonbiid kul naa. » 6K n la k l puo nyuu Yendu niib sɔm g buo, banm n bo tie Yiesu sieda‑nba yen mɔni. Min yaan la’ɔg nnyan k l yaa g lid’n bonciɛnn. 7G malɛg bual’n g laabaal k l yaa g lid’n i ? K u bu ŋɔn’n puo yen bonkobbiiug nba k u jag k u mɔg yula ŋanlile yen yina piig nyan, b ŋasiil n tie yal. 8« Ŋan la bonkobbiiug nba nyan bo kpiɛ g be, ama u ji g be mɔlane. U bu nya buoug nba nyua g g mɔg po nyan ninŋ i, g gad naan k b bu biɛn’o. Nisiɛb be tinŋ po ne, k b sana g diɛn miɛl kadaaɔg n ninŋ, hal ŋanduna cilyoug. L bu yaa g lid’b yen ban nyuan l bonkobbiiug g dugn l bonkobbiiug bo kpiɛ g be, g ji g be mɔlane, g tan bu guan nyan. 9Ne buol ne bual g nil ń gbad bona ne yen yanfuom i. Yula ŋanlile ŋann tie puo ŋann n kal jɔa ŋanlile nba po i. L biɛ tie batieb banlile i. 10B ninŋ, batieb banmu dii bal g pend o, g lua tuan g daa be, g lua mɔ tenn g daa g baal. U tan gii baal, u bu kal badkog po k l kan wai. 11Bonkobbiiug nba bo be g ji tan g be ne, wano mɔno n kua batieb banniin po. Wano yen batieb banlile ŋann kul tie yenm i, k u saa naan k b daan bu biɛn’o. 12Yina piig nba k a la ne mɔ tie batieb piig i, g nyaan b daa g kal badkogi po. B tan bu cab banm yen bonkobbiiug ń taan g kal badkog po ama b yen kan wai. 13Banm batieb piig kul mɔg maalyenm i. Lan tie k ban tug b paalu yen b yikod g te bonkobbiiug. 14B tan bu taan g pua tɔb yen Pebig, ama Pebig bu paad’b g dugn wano n tie yonmdanm yaa Yonmdaan, g biɛ tie batieb kul yaa Bad. Yab nba g Yendu yiin’m g biɛ lugd’b k b ŋua’ɔg yen b pal kul mɔ tan baa tie yab pua tɔb g paad i. » 15Lann i g malɛg biɛ maad’n: « Bɔnciɛnd nba k a la g puocunconn kua g kpiɛ nyan tie tinŋ n ne buoli kul niib yen niwulug yen ŋanduna ne doi kul niib yen mabuoli kul niib. 16Ŋan la yina piig yen bonkobbiiug nba nyan, b kan gii bua puocunconn ŋann nublu. B tan bu land u tiɛd kul g ŋaa’ɔg niiyann, g ŋman u nand, g yal tenn ban juu muu. 17G dugn Yendu kuan b pal n ninŋ k ban sun wan bo liid g bobn k u bu sun yal nba. B bu taan mɔb i, g tug b bal yikod g te bonkobbiiug saa yen bona kul ń tan bu tien g gbenn nyan Yendu n bo maad nand nba nyan. 18Ŋan la puo nba nyan, wano n tie dogbenŋl nba mɔg nuu tinŋ n ne batieb kul po. »

will be added

X\