Dɔgdu 16

1L po n pend, k n gbad g niɛlu nba paa nyiɛ jaanddeciɛɔnŋ nba be polu po nyan ninŋ, g maad malɛg‑nba banlile ŋann k nne: « Tug man seni ŋanlile nba gbie yen Yendu mutuol nyan g daan wul tinŋ po. » 2G cincinn malɛg tug u senŋ g wul tinŋ po. Lann i g nala nba bi g biɛ yiɛl suol niib nba kul bo mɔg bonkobbiiug ŋann banm b po g biɛ pug u ninnaɔnŋ nyan. 3G munle po malɛg mɔ tug u yal g wul mɔgl n ninŋ. G nyum kul lebd g ji tie nyan nikpienn sɔm nyan. G bonfuoda nba be mɔgl n ninŋ kpe b kul. 4G muntaa po malɛg mɔ tug u yal g wul bɔnciɛnd n ninŋ yen nyunbunbuna n ninŋ. G nyum kul kpand sɔm. 5K n gbad malɛg nba mɔg nuu nyum po nyan, k u maad: « Fin kukua nba tie Yendu, g bo be g biɛ daa be, a buud tuag mamɔni sɔnu. » 6Ban bo wul a niib sɔm yen a sogni‑nba sɔm nyan po n te k a mɔ tie’b sɔm k ban nyu. Lann n dagd yen’m. 7K n biɛ gbad g niɛlu nne nyiɛ salg binbindl buol g maad: « Mɔni, Yonmdaan Yendu Paaciɛnudaan, a buud nyuan g biɛ tie mɔni. » 8G munna po malɛg mɔ wul u yal yendupudkaɔg po, k b cab’o k wan nyigd g cua niib k lan fiɛ’b nyan muu nyan. 9G walu nba g mɔg niimn mid niib, k b ji sugd Yendu k l maa wano n mɔg nuu l yubɔnbuolu po, ama k b yie k b kan lebd b binbem g tuo g yen mɔni Yendu n tie Paaludaan. 10G munmu po malɛg wul u mɔ yaa yal bonkobbiiug ŋann badkog po. Lann i k l bonkobbiiug diem kul bɔnn cinmm, g niib ji cagn g ŋman nyina, 11g sugd Yendu nba be polu po g dugn b cicagm po yen b nala po. Ama k b biɛ l g ŋaa b tuonbiid sunu. 12G munluob po malɛg wul u mɔ yaa yal Efrat bɔnciɛɔnŋ n ninŋ, g nyum fual g ŋaa sɔnu g batieb nba nyiɛ puol ń fid g pend. 13Lann i k n la sanpola bantaa k b naan nyan tela nyan, g nya bonbiiug nba tie nyan waakpel nyan mɔb n yen cincinn bonkobbiiug mɔb n yen yua fa k u tie Yendu sogni nyan mɔb n. 14B bo tie sanpola nba g Sitaan sun’m i, k b suun yaalidug tuona. K b saa ŋanduna ne batieb buol k ban taan’m k ban pua tɔb Yendu Paaciɛnudaan digbenŋl daal. 15G Yonmdaan maad: « A la ii, n baad g bu libl’a nyan naayig nyan. Daan nba ceg u kua po, g biɛ kub u tiɛd u buol, pamann tie u yal i. Nnyan u tan kan gii sonm niiyann, g niib ń la u fai. » 16G sanpola ŋann taan batieb yenn buol. B bo yi l buol Ebro‑nba maam n ninŋ k Armagedɔn. 17G munlile po malɛg mɔ wul u yal faam n ninŋ. G niɛlu nba paa nyiɛ badkog buol jaanddeciɛɔnŋ n ninŋ g maad: « L tien g gbenn o. » 18Lann i g tanyigdi nyigd, g fuug tien, g tatintandi tand, g tinŋ jeg bonciɛnn. Hal niib n l be tinŋ po ne o, tinŋ daa g ban g jeg nnyan. 19G dogbenŋl tinŋ yagd kaani yintaa, g ŋanduna ne dingbana doi kul baa g mud mud. G Yendu tiɛd dogbenŋl Babilɔnn ŋann po, g tug ŋmanŋ k l gbie yen u mutociɛnn dimɔunŋ, g tie’og k wan nyu. 20G kpendega kul bod, g baa jual ji g be. 21G tacena nba kpai bol bol nyiɛ polu g baa niib po. G niib ji sugd Yendu g dugn l tacena n bo baal yen yubɔnn nba b po. Yen mɔni, l yubɔnn bo biɛ paaa.

will be added

X\