Dɔgdu 12

1G yaalidug bonn nba g mɔg lan ja yen yal tien polu po, k n la puo nne g yendupudkaɔg pin’o nyan cincenn nyan, k u ŋmaa ŋmaalg po, g yil piig yen ŋmaabid ŋanle nyan feglg nyan. 2L puo bo mɔg puol, g bua n mal g ji mɔ madyiɛlu. 3G yaalidug liel biɛ tien polu po, k n la bonbiciɛɔnŋ nne k u tie nyan waakpel nyan, g mɔn nyan muu nyan, g mɔg yula nlile yen yina piig, g yil badfegli nlile u yul kul po. 4K u juol tign polu po ŋmaabid bɔgdm muntaa po g lu tinŋ n ninŋ. G bonbiiug ne baal g sed puo nba bua n mal nyan buol, g guu youg nba g puo bu mal k wan nal big. 5K l puo mal bijabg. Wano n tan baa diɛ danml nba k b tien yen kud, g ŋmagd ŋanduna ne doi kul niib. K b gbaa g tug big g don’o Yendu buol yen u badkog buol. 6G puo san g gad g be tinkuonŋ n ninŋ, naan nba g Yendu bo liid g bobn binbebuol u po, k ban ŋub’o dana tudl yen kobiinle yen daa piinluob. 7L sua g tɔb pua polu po. Malɛg‑nba bad nba k b yi’ug Miisiɛl nyan yen u malɛg‑nba n bo tuog g pua tɔb yen bonbiiug ŋann yen u mɔ yaa malɛg‑nba. 8Ama k b pua g paad bonbiiug ŋann k b ji g mɔg ban baa be naan polu po. 9G nyan bonbiciɛɔnŋ ŋann cincann, g lu’ug tinŋ po ne. U tie waaɔg nba bo kpel g be i, k u sann tie sanpola bad lann i kaa Sitaan. B bo lu wano i yen u malɛg‑nba tinŋ po ne, k u kuand ŋanduna kul niib tudm n ninŋ. 10L youg k n gbad g niɛlu nba paa nyiɛ polu po g maad: « Mɔlane youg ji pund, k t Yendu fiel u niib, g ŋɔn u paaciɛnu, g kaan u bal, k u Kristo mɔ ŋɔn u yikod. K l maa yua nba jalg t ninjanm Yendu nunŋ n ninŋ yendu n yen nyiɛɔg, b lu’ug tinŋ po ne o. 11Pebig sɔm yen t ninjanm n bo kun mɔni Yendu maam nba po te k b paad Sitaan o. B bo g jie yen ban lu b miɛl g kpe mɔno. 12L yaa po, yinm nba be Yendu ŋaag n ninŋ ń gii kpanm yen pamann. G nyaan tinŋ yen mɔgl nuan, yubɔnn tie b yal i, k l maa Sitaan jiid b buol, g be yen mutociɛnn g dugn u ban k l ji kan wai yen u paalu po ń juab. » 13Bonbiiug ŋann n la k b lu’ug tinŋ n nyan, k u ji ŋua g bel puo nba mal bijabg nyan. 14Ama k b tie l puo kɔnbaciil nba yab kpinkpana, k wan yugl g yaad g gad tinkuonŋ n ninŋ, naan buol nba k b bobn yiɛl u po, g bu ŋubl’o bina ŋantaa yen bɔgdm, g bonbiiug ń ji daa nand’o. 15Lann i g bonbiiug ŋann wugd nyum k l puub nyan bɔnciɛɔnŋ nyum nyan, g ŋua puo puol po g bu di’ug. 16Ama g tinŋ yagd g nal nyunciɛnm nba g bonbiiug ŋann bo wugd nyan, g fiel puo. 17G bonbiiug ŋann pal biil l puo po bonciɛnn, k u ji gad g pua tɔb yen l puo bid nba tenn. Banm n cɔln Yendu Mɔmaam g biɛ tuo g gaal Yiesu n kun mɔni nba. 18Lann i k l bonbiiug gad g sed mɔgl bɔngbann po.

will be added

X\