Dɔgdu 11

1K b biɛ tie’n kinkagl nne k b diɛ g bigd bona, k l naan nyan lanbann nyan. Lann i k b maad’n: « Gad g bign jaanddeciɛɔnŋ yen Yendu salg binbindl, g biɛ cɔd yab nba be l n ninŋ g pug Yendu nyan. 2Ama ŋaa g daa bign jaanddeciɛɔnŋ lijɔug nuan, k l maa b tug lann g cab buolfanu yab i. Banm n tan bu tug piinna yen ŋmaali yinle, g sɔnd Yendu buolu doug. 3N tan bu sun n sieda‑nba banle, ban liɛ kpalpiɛd gii sɔgnd Yendu maam g daan biin dana tudl yen kobiinle yen daa piinluob. » 4Sieda‑nba banle ŋann tie oliif tiidi ŋanle yen fida ŋanle nba sie Yonmdaan nintual n i, wano nba yen tinŋ. 5B ninnanda gii bua n tien’m bonbiiug, muu tu nya b mɔi n ninŋ i, g biɛn’m. G yaa daan nba kpaan k wan tien’m bonbiiug, b l bu kpi’ug nnyan i. 6L sieda‑nba mɔg paalu nba k b bu fid g te g taag ń sed g kan baa youg nba k b sɔgnd Yendu maam. B biɛ mɔg paalu nba k b bu fid g te g nyum ń kpand sɔm. B bu fid g te g yubɔnbuolu kul ń baal tinŋ po ne niib youg nba kul k b bua. 7Ban bu sɔgn Yendu maam g gbenn yaa youg, bonkobbiiug bu nya buoug nba nyua g g mɔg po nyan ninŋ g pua tɔb yen’m, g paad’b g kpi’b. 8B gbannand baa dua dociɛnu n ninŋ finfanm n i, ban bo kpaa b Yonmdaan naan dapunpɔnn po. B bu fid g yiin l doug Sɔdɔm lann i kaa Esipt. 9G buoli kul n ninŋ niib yen cuga kul n ninŋ niib yen mabuoli kul n ninŋ niib yen ŋanduna ne doi kul n ninŋ niib bu tigl gii nyuan kuum saa yen daa ŋantaa yen dijenn, g kan tuo ban pii l kuum. 10Niib nba be tinŋ po pala bu manŋ g dugn l sogni‑nba banle kuum po. B baa kpanm yen pamann, g piin lieb paab k l maa l sogni‑nba banle bo cagn’m bonciɛnn. 11Ama l daa ŋantaa yen dijenn n pend, g Yendu kuan u fuom b ninŋ k b yied g fiil g sed. Jiwaani bonciɛnn bo kua yab nba kul bo sie g nyuan’m nyan. 12K l sogni‑nba banle gbad g niɛlu nne nyiɛ polu po, g maad yen paalu k nne: « Do man ne buol nii. » L youg k b duo polu po g be tawalgbaɔnŋ n ninŋ. Ban do youg nba k b ninnanda sie g nyuan’m. 13K l youg mɔno g tinŋ jeg yen paalu, k l doug bɔgdm taal piig po baa. G niib tuda nlile kpe l tinŋ jegnu n ninŋ. G jiwaani kua yab tenn g mɔg miɛl nyan k b ji tua g mɔni, g Yendu nba be polu po n tie paaludaan. 14Munle po yaa yubɔnn pend o, muntaa po yua n paa nyan. 15G munlile po malɛg pieb u naatunn, g niɛli nba paa tand polu po g maad: « Mɔlane ŋanduna bal ji tie t Yonmdaan yen u Kristo yal i. U baa diɛ l bal youg ń tuu youg. » 16G nikpela piinle yen banna nba kal b badkogi po Yendu nintual n nyan baa g gbaan g tug nunŋ g pii yen tinŋ, g pug Yendu 17g tua: « Yonmdaan Yendu Paaciɛnudaan, fin nba bo be g biɛ daa be, t tiend’a balg yen ŋan ŋɔn a paaciɛnu g kaan a bal. 18Buolfanu yab bo fiin b mutuol, ama a mutuol n ji fiil mɔlane. Youg ji pund yen ŋan bu kpienm buud. Youg ji pund yen ŋan pa sogni‑nba nba tie a tuonsunna b pani, g pa yab nba tie a yab g cɔlm’a, nigbenŋa yen yab g tie nigbenŋa. Youg biɛ pund yen k a biɛn yab nba biid tinŋ. » 19Lann i g jaanddeciɛɔnŋ nba be polu po nyan luod, g dɔnnu kpaɔg nba be l n ninŋ nyan nyuand. G tanyigdi nyigd, g fuug tien, g tatintandi tand, g tinŋ jeg, g tacena baa bonciɛnn.

will be added

X\