1 Lann i k n la g malɛglua nba mɔg paalu nyiɛ polu po g ji, g tawalgbaɔnŋ pin’o nyan cincenn nyan, g waamɔnn nba tu pɔn tawalgbaɔnŋ n ninŋ kaan g lind u yul, k u nunŋ po nyili nyan yendu nyan, k u titala sie nyan jaantalg nyan g so muu. 2 K u diɛ kadabig nuu n ninŋ k l pɔbd. K u tug taajendu g ŋmaa mɔgl po, g tug taaganŋ g ŋmaa tinŋ po, 3 g yign yen paalu nyan yanbɔl n tu buud nand nba nyan. Wan yign g gbenn, g taag tand taal munlile g maad maam. 4 Taag n tand taal munlile g gbenn, k n yed k n diɛn lan tand g maad yal nba. Ama k n gbad g niɛlu nne nyiɛ polu po g maad’n k min daa da tatintandi ŋanlile ŋann n tand g maad yal nba. K min wuon l ŋasiil. 5 Lann i g malɛg nba k n bo la’ɔg g taayenn sie mɔgl po g liel sie tinŋ po nyan don nuujendu polu po, 6 g pol Yendu nba fo youg kul sann po, wano nba tag polu yen yal be polu po kul, g tag tinŋ yen yal be tinŋ n ninŋ kul, g biɛ tag nyum yen yal be nyum n ninŋ kul, g maad g Yendu ji kan guul. 7 G munlile po malɛg bu pieb u naatunn. K l youg gii pund k u pieb, g Yendu n bo bobn yal nba k l tie ŋasiil nyan bu tien nyan wan bo liid g muand u tuonsunna nand nyan i. U tuonsunna ŋann n tie u sogni‑nba. 8 K n biɛ gbad g niɛlu nba bo kpiɛ g nyiɛ polu po nyan, k l maad’n: « Gad malɛg nba sie g taayenn sie mɔgl po g liel sie tinŋ po nyan buol g gaal u nuu n kadaaɔg nba pɔbd nyan. » 9 Lann i k n nagn malɛg buol g miɛl’o k wan te’n l kadabig, k u maad’n: « Gaal g ŋman g nal. L gii baa a tug n ninŋ l bu tonŋ i, g yen mali nyan siid nyan a mɔb n ninŋ. » 10 K n gaal l kadabig u nuu n g ŋman k l mali n mɔb n ninŋ nyan siid nyan, ama min nal yaa youg k l ji to n tug n ninŋ. 11 K b maad’n k n biɛ sɔgn Yendu n bo lolg yal nba buoli bonciɛnn po yen ŋanduna ne doi bonciɛnn po yen mabuoli bonciɛnn niib po yen batieb bonciɛnn po.
