Dɔgdu 1

1Bona nba bo wuo, g Yiesu Kristo bo dɔgd g ŋɔn n be kadaaɔg ne ninŋ. Yendu n bo ŋɔn’o l bona, k wan ŋɔn u tuonsunna k l kan wai yen l bona ń tien. Kristo n bo sun u malɛg u tuonsunn San buol, g malɛg ŋɔn’o l bona. 2Lann i g San dugn wan la bona nba kul, g maad k l kul nyiɛ Yendu buol i, g Yiesu Kristo n dɔgd g ŋɔn’o. 3Yua nba lii maam nba nyiɛ Yendu buol k b diɛn kadaaɔg ne ninŋ, pamann tie u yal i. Yab nba cenŋ l maam g biɛ tug g sun yenn tuonn, pamann tie b mɔ yaa yal i, k l maa youg nba k l bona bu tien nag o. 4Min San n da kadaaɔg ne g fuond Kristo‑yab tintaancaga nba be Asi dingbana ŋanlile n ninŋ. Yendu nba bo be, g biɛ daa be g biɛ baa be, yen Yendu fuom banlile nba sie u badkog nintual n, yen Yiesu Kristo ń yad yedŋanm i po, g te k i yam ń gii dua. Wano Yiesu n tie sieda yen mɔni, g tie cincinn yua nba yied kpienm siign ninŋ, g tie bijakpel. Wano n tie tinŋ n ne batieb kul yaa Bad. U buad’ti g tuo g kpe g fiel g nyan’ti t biid n ninŋ, 6g te k t tie Yendu badbijanm, g biɛ tie u Baa Yendu salg-yidkab. Yudand yen paaciɛnu ń gii tie u yal youg ń tuu youg. Amɛnn. 7I la i, wano n nyiɛ tawalgband n ninŋ g baad nyan, niib kul bu la’ɔg, baa yab nba bo cɔg g lond’o mɔno. Ŋanduna ne buoli kul ji baa fabn g gbiɛnd g dugn u baalu po. Mamɔnm, l tan baa tie nnyan i. 8Yonmdaan Yendu Paaciɛnudaan, yua nba bo be, g biɛ daa be g biɛ baa be, wano n maad: « Min n tie cilg g biɛ tie juog. » 9Min San, n tie i ninja i. Min yen yinm kul juun g laad fala Yiesu po. T taan g tie badbijanm i Yendu diem n ninŋ. B bo suol’n g gad yen’n Patmɔs kpendegl po, g dugn n bo muand Yendu maam g ŋɔnŋ niib Yiesu n kun mɔni nba. 10G Yonmdaan daal, g Foŋanm gbie n ninŋ, k n gbad niɛlu nne n puol po, k l niɛlu do nyan naatunn n tu mɔ nand nyan 11g maad: « Ŋan nyuan yal nba ne, diɛn kadaaɔg n ninŋ g te Kristo‑yab tintaancaga ŋanlile nba ne: Efɛs yen Simiirn yen Pɛrgam yen Tiatiir yen Sard yen Filadɛlfi yen Lawɔdise. » 12Lann i k n gbeg k n diid g liɛ ŋmaa n maad yen’n i ? Min gbeg nyan, k n la fidtuanbona ŋanlile k b tien yen wula g fida tua l po. 13K l fidtuanbona ŋanlile sinsiign ninŋ k n la k l tie nyan nil nyan g liɛ liɛdfagdug, g bobn gbann u pal po k l tien yen wula. 14K u yud pien pag pag nyan gungund nyan, k u ninbina so nyan muupienu nyan. 15K u titala naan nyan nabnd nba k b pul muu n k l nyili nyan, k u niɛlu mɔ begl nyan mɔgl n nyunguona nyan. 16G diɛ u nuujendu po ŋmaabid ŋanlile, g jugfuaɔg nne nya u mɔb n, k b luan k l mɔi yinle kul man, k u nunŋ po nyili g tuud nyan yensikpikpalg n yendu nyan. 17Min la’ɔg youg nba k n baa u nintual n ninŋ nyan n kpe nyan. Lann i k u tug u nuujendu g maan n po g maad: « Daa jie. Min n tie kpinkpiɛ‑g‑liid, g biɛ tie yua juod. 18Min n tie yua nba fo. N bo kpe o, ama mɔlane n ji fo g biɛ baa fo youg ń tuu youg. N mɔg yiko kuum po yen tinkpiiug po. 19Diɛn ŋan la bona nba, lann n tie yal tie mɔlane yen yal bu baal kul. 20Ŋan nyuan ŋmaabid ŋanlile nba k n diɛ n nuujendu ne yen fidtuanbona ŋanlile nba k a la ne niimn n ne: ŋmaabid ŋanlile ŋann tie Kristo‑yab tintaancaga ŋanlile ŋann malɛg‑nba i, g fidtuanbona ŋanlile ŋann mɔ tie Kristo‑yab tintaancaga ŋanlile ŋann. »

will be added

X\