Filemɔn 1

1Min Pɔl, n be dansaldieog n ninŋ g dugn Yiesu Kristo po i, min n da kadaaɔg ne, min yen t ninja Timote. T fuond’a Filemɔn, fin nba n tie t dɔnnmɔn g biɛ tie t tuonsunlua, 2g fuond t niipuo Apia yen t tuonsunlua Arsiip nba mɔ gbaa Yendu tuonn po, g biɛ fuond Kristo‑yab nba taand lieb a ŋaag n ninŋ nyan mɔ. 3T Baa Yendu yen t Yonmdaan Yiesu Kristo ń yad yedŋanm i po g biɛ te k i yam ń gii dua. 4N tiɛn a po youg kul n jaandi n ninŋ g tiend Yendu balg a po, 5k l maa n gbad ŋan dug Yonmdaan Yiesu po g biɛ bua Kristo‑yab kul nand. 6N miɛd Yendu k ŋan mɔg dindann nba g diɛ g bɔgd lieb nyan ń ŋanm g cie a ninŋ, g te g niib ń bann tin be yen Kristo g Yendu tie’ti ŋanm nba kul. 7N ninja, ŋan bua Kristo‑yab nand nyan manŋ n pal hal bonciɛnn g biɛ te k n pal paag g dugn a paan Kristo‑yab pala. 8L po n te g Kristo n ninŋ n bo bu fid g ŋɔn’a ŋan bu sun yal nba, 9g nyaan n yen bua k n miɛl’a miɛdug buam sɔnu n i. Min Pɔl, min yua tie nikpel, g biɛ be dansaldieog n ninŋ mɔlane g dugn Kristo po nyan, 10n miɛd’a sugl n bija Onesiim po k l maa dansaldieog n ninŋ ne i k n ŋɔn’o Laabamann k u te Kristo‑yua. 11Siɛnyoug u bo g tie siɛl a po, ama mɔlane nuan u ji tie yua nba bu fid g tod min yen fin kul i. 12N lebnd’o a buol n nyan, wano nba k n bua’ɔg yen n pal kul. 13N bo sun k wan gii be n buol i, g gaal a yiɛl gii suun n tuona youg nba k n daa be dansaldieog n ninŋ g dugn Laabamann po ne. 14Ama n yen g bua k n tien siɛl k a g cab’n, g ŋanm nba k a bo bu tien n po ń ji tan daa tie nyan niinn bonn nyan. N bua k lan nya a po i. 15L bu fid g tuu k Onesiim bo yaad a buol k l gii yann waam nne, ŋan guan g la’ɔg wan gii be yen’a youg kul i. 16Yen mɔni, mɔlane nuan u ji g tie yonm kukua kaa, u mɔn g cie yonm. U tie t ninja i, niib bua u maam. N mɔ bua u maam hal bonciɛnn. Ama fin n biɛ baa mand g bua’ɔg hal bonciɛnn g dugn u tie nil g biɛ tie Kristo‑yua. 17Lann, l gii tie k a yiin’n a tuonsunlua, ŋan gaal’o nyan a gaal min mɔno i nyan. 18U gii biil’a siɛl lann i kaa u gii mɔg a pann, ŋan tun’n l pann. 19Min Pɔl mɔno n da yen n nuu lanbona ne: n bu pa’a l pann. N g bua k n tiɛd’a k fin mɔno yaa miɛl tie pann k a bu pa’n kaa. 20Lann n ninja, mɔnd g sun l tuonn n po g dugn Yonmdaan po. Te k n yam ń duan g dugn Kristo po. 21N dug a cɔlunŋ po i g da’a. N ban k a yen bu tien yal cie min miɛl’a yal mɔno. 22Bobn dieog mɔ n po k l maa n mɔg dindann k i jaandi bu te k ban luod’n k n guan i buol. 23Epafras, yua k min yen wano taan g be dansaldieog n ninŋ g dugn Kristo po nyan fuond’a. 24N tuonsunlieb Mark yen Aristark yen Demas yen Luk mɔ biɛ fuond’a. 25T Yonmdaan Yiesu Kristo ń yad yedŋanm i po.

will be added

X\