Filip Kristo-yab 3

1N naataani, min ji bu maad’i yal mɔlane tie k i gii be pamann n ninŋ i, g dugn Yonmdaan po. L g yiɛl’n yen min gii tun g da g maad’i bonyenn g led led. Lann n su i po mɔno. 2Suol man i kua yen yab nba suun tuona nba g ŋan, suol man i kua yen l sangbanni, b tie niib nba bund g ja b kua g tua k b kɔnd i. 3Tinm n tie yab nba kɔnd yen mɔni, g dugn yen Foŋanm i k t pug Yendu, k t pala man bonciɛnn g dugn tin be yen Yiesu Kristo, g biɛ g tug t dindann g tien nifosaal bogda n ninŋ. 4Ama n mɔ yen bo bu fid g tug n dindann g tien l bogda n ninŋ. L gii tie g nil mali k u bu fid g tug u kua g cab nifosaal bogda, min n bo dagd yen k n tug n kua g cab, 5min nba k b kɔnd’n daa ŋanniin daal, n tie Israyɛl big i, Bɛnsamɛn cugl n jua. B l mal min k n tie Ebro i. Yal nba nyuan Suif‑nba yiko po, n bo tu be Farisiɛn-nba cagl n ninŋ i. 6N bo tu ŋanm g cɔln tinm Suif‑nba bogda, hal g tan cagn Kristo tintaanu n niib. L biɛ gii tie g nil ń gii tuag mamɔni sɔnu nyan Suif‑nba yiko n bual nand nyan, baa sua kan fid g jalg’n siɛl po. 7N bo tu diɛ l bona kul ne k l mɔg nyuad i, ama mɔlane, n la k l ji g mɔg siɛl yaa nyuad g dugn Kristo po. 8Yen mɔni n ji diɛ g yal l mɔg nyuad kul tie fam i, g dugn min bann n Yonmdaan Yiesu Kristo nyan. L banm nyuad g mɔg l liel. U yaa po, n feg g lu l bona kul. N ji diɛ k l kul ne tie tinbenmuad i, k min fid g gaal Kristo, 9g biɛ taan gii be yen’o. N ji g tua k min cɔln tinm Suif‑nba yiko po n te k n tie nimɔn Yendu nunŋ n. Ama min dug Yiesu Kristo po n te k n tie nimɔn. Yendu n te g yua nba dug u po kul tie nimɔn. 10Min bua yal nba kul tie k min bann Kristo i, g bann u kuum yiedu paalu, g la fala nyan wano nyan, g biɛ kpe nyan wan kpe nyan, 11gii mɔg dindann k n mɔ tan bu yied kpienm siign ninŋ g ji gii fo. 12N g bua n maad k n suol min bel yal lann i kaa k n binbem ŋan g gbenn kaa. Ama n daa l maa nantaal po i, g gbaa k min gaal l nantaal pani, g dugn min mɔno, Yiesu Kristo bo nyii g suol’n l yaa po i. 13N naataani, n g mali k n ji kub l pani kaa, ama bonyenn kua i k n tie: n g nyuan yal tien g pend kaa, n nyuan yal be liig i, 14g maa nantaal g gbaa k min suol min bel yal nba, g gaal l nantaal pani, pani nba g Yendu yi’ti polu po k tin gaal g dugn Yiesu Kristo po. 15Tinm yab nba sie dindann n ninŋ k l paa, tin mɔ ń gii mɔg l maalm buolu. L gii sua k i ninŋ g yenm mɔg maalfanm i yaa aa, Yendu bu te’b yinyiem g fand’b l po. 16Lan l tie yal nba kul, tin l gii ŋua sɔnu nba k t daan tuag saa yen mɔlane. 17N naataani, i kul ń gii ŋmaad n taabuod n, gii nyuan man yab n sonm k l ŋan nyan yin la k t sonm k l ŋan nand nyan. 18N daan tund g maad’i nii, g biɛ gɔ g tiɛd’i mɔlane yen ninsiid, g niib bonciɛnn be, k b binbem te k b tie Kristo dapunpɔnn ninnanda. 19B tan bu juod g kua tudm n i, g dugn b puol n tie b yendu. Yal nba bu kuan’m fai, banm juab lann i k l tie b yudand. B mali ŋanduna ne bona po kua i. 20Ama tinm nuan tie Yendu ŋaag n ninŋ yab i. T guu k t Fietua Yonmdaan Yiesu Kristo bu nya l buol i, g baal. 21U tan bu lebd t gbannand nba bu bed k lan nand yen u yudand gbannand g dugn u paalu te k u mɔg nuu bona kul po.

will be added

X\