Filip Kristo-yab 2

1I dindann Kristo n ninŋ pugd’i papaal ii ? K u buam i, l sɔnŋd i pala aa ? Manu be yinm yen u Foŋanm n ninŋ ii ? I mɔg buam i lieb po g biɛ jie’b ninbaaɔg uu ? 2Lann, n miɛd’i k yin mɔnd gii taa mɔb, gii bua i lieb, g mɔnd i pal ń gii kɔn bonyenn po, yin biɛ gii mɔg maalyenm kua. Nnyan i, k i bu ŋanm g manŋ n pal. 3Daa kpaan man k i gii be i lieb kul liig lann i kaa k yin gii donŋ i kua finfam. Ama i jiind man i kua, g sua kul ń gii nyuan k u lua cie’og, 4g biɛ daa kpaan u yul po nyuad kaa, ama gii kpaan u lieb kul yaa nyuad. 5I mɔg man maalm nba g Yiesu Kristo bo mɔg: 6Wano nba, hal lan cil o, wano yen Yendu kul bo tie yenm i, u bo g kpaan k wan tug u kua g sen Yendu sinsienu n ninŋ. 7Ama u bo jiin u kua i, g tien u kua yonm, g nand u kua yen nifosaal, g te nifuog g baal. 8U bo jiin u kua hal bonciɛnn, g cɔln saa yen u kuum, u kuum dapunpɔnn po. 9L po n te g Yendu don’o, g tie’og yudand nba cie yudand kul, g biɛ tie’og sann nba cie sana kul, 10g yab nba kul be polu po yen tinŋ n ninŋ yen tinkpiiug po, gii gbad wano Yiesu sann, ban gbaan dunn, 11g sua kul ń biɛ maad k wano Yiesu Kristo n tie Yonmdaan k lan gii tie t Baa Yendu dondl. 12Lann, n dɔnn‑nba, min daan tu be i buol k i cɔlm’n nand nba nyan, l bual k i ŋanm gii cɔlm’n mɔlane nba k n g be yen’i ne i. I suun man yin mɔg fielu nba po yen jijei, yen cɔlunŋ. 13G dugn Yendu suun tuonn i pala n ninŋ g bu te i pala ń gii kɔn u tuona po g biɛ te yin gii suun wan bobn yal nba i po. 14Yin suun yal nba kul, bunbulmi yen mɔniɛɔg ń daa be l n. 15Nnyan, i kan gii mɔg siɛl yaa biid. I baa tie Yendu bid nba g mɔg ban bu jalg’b yal nba po, ŋanduna ne ninŋ faaɔgdanm yen nibiid sinsiign. B siign ninŋ, i nyili nyan polu po ŋmaabid nyan i, 16g ŋɔnŋ’b maam nba tien miɛl. L gii tie k i suun nnyan, daal nba g Kristo tan bu guan, n pal bu manŋ i po u nunŋ n ninŋ, g dugn l bu ŋɔn k n nantaal yen n fala kul g te fam. 17I dindann tie nyan salg nyan i, k i yid Yendu. L gii tie k b kpii’n, n sɔm baa tie nyan paab nyan g pugn i salg po. L gii tie k l bu tien nnyan, n pal bu manŋ, min biɛ kpanm yen pamann yen i kul. 18Mɔ ń manŋ man i pala, g biɛ gii kpanm yen’n. 19L gii tie Yonmdaan Yiesu buam n, l kan wai yen min sun Timote i buol. Nnyan i k n bu gbad i laabaal, k n yam ń fid g duan. 20Wano kua i kaa, sua g be ne g mali nyan min nyan, k u pal biɛ siɛd i po yen mɔni. 21Yab nba tenn kul, sua kul gbaa yen u yul po yal i. Baa sua g nyuan yal nba tie Yiesu Kristo yal. 22Yinm mɔno, i ban g Timote ŋɔn k u tie yua nba k b baa dug u po i. I biɛ ban wan sun yen’n nand, Laabamann muandu po. U sun yen’n nyan big n tu suun yen u baa nand nyan i. 23Lann, n mali k n sun wano i i buol, youg nba k n bann n maam n bu juod nand. 24N dug Yonmdaan po, k l kan wai yen min mɔno ń baal i buol. 25N diid g sua k l tie bonmɔnn i yen k n sun t ninja Epafrodit i buol, wano nba k i daan sun’o k u baal yen todl nba k n bua, wano n taand’n k t suun tuonn g biɛ kɔn jad Laabamann po. 26U pal ŋanm g kɔn k wan la i kul, g dugn u yam g dua yen yin daan gbad k u yiɛl. 27U daan l yiɛl nuan i yen mɔni, g tan bua n kpe mɔno. Ama Yendu daan jie’og ninbaaɔg. U daan g jie wano kukua kaa, u daan jie n mɔ ninbaaɔg, k n pal ń daa ŋanm g bɔnn g pugn. 28L po n te k n bua k n tien tonm g sun’o i buol, k i gii la’ɔg, i pala ń guan g manŋ, k n mɔ yaa pabɔnn ń wad. 29Lann, ŋanm g gaal’o man yen pamanciɛnn nyan i ninja nyan, g dugn Yonmdaan po. Ŋanm gii cɔln man niib nba tie nyan wano nyan, 30g dugn waam nne k u daan kpe Kristo tuonn po. U daan lu u miɛl i, g baal yen todl nba k yinm mɔno daan kan fid g baal yenn.

will be added

X\