Filip Kristo-yab 1

1Min Pɔl yen Timote, tinm nba tie Yiesu Kristo tuonsunna n da kadaaɔg ne, g tien yab nba be Filiip g tug b kua g cab Yiesu Kristo g tie Yendu niib nyan, yen b Kristo‑yab liig yab yen b todkab. 2Yendu t Baa yen t Yonmdaan Yiesu Kristo ń yad yedŋanm i po g biɛ te k i yam ń gii dua. 3Youg nba kul k n tiɛd i po, n tu tien n Yendu balg i. 4N jaandi kul n ninŋ, yen pamann i k n tu jaand i kul po, 5g dugn, lan cil dacincinn daal saa yen mɔlane, i tod’n k n muand Laabamann. 6N pal ŋanm g paa g Yendu n cil tuonŋann nba i pal n ninŋ ne, k u bu tugn l tuonn g daan juod daal nba g Yiesu Kristo tan bu guan. 7L dagd yen k n gii mɔg l maalm i po, g dugn n pal siɛd i po. N gii be dansaldieog n ii, n gii kɔn Laabamann po, g gbaa k l Laabamann ń kal niib pala n ii, Yendu tu diid min yen yinm kul yen nunmanŋ. 8Yen mɔni, Yendu tie n sieda k n bua’i yen n pal kul nyan Yiesu Kristo n bua’i nand nyan. 9Jaandi nba k n jaand i po n ne: n miɛd Yendu g buam nba be i siign ninŋ ń gii pugd g saa. K l buam ń tod’i k yin bann mamɔni g fid g gann yal tie bonmɔnn kul. 10Nnyan i, k i bu fid g lugd yal nba ŋanm g mɔn, g daal nba g Kristo tan bu guan, yin daa mɔg siɛl yaa biid g bual siɛl yaa jalgi. 11Yen Yiesu Kristo paalu po, i baa l suun tuona nba tuag mamɔni sɔnu kua i, g yudand yen dondl ń gii tie Yendu yal. 12N naataani, n bua k i bann g yal nba baal’n ne biɛ tod yen mɔni g Laabamann ń gad liig i. 13L po n te g sijenm nba guu Rom gobna ŋaag, yen niib nba tenn kul ban k min tie Yiesu Kristo tuonsunn po n te k n be dansalg. 14Ban suol’n suod nba ne te k n ninjanm Kristo‑yab bonciɛnn ŋanm g dug Yonmdaan po. Nnyan, b ŋanm g la papaal g muand Yendu maam g g jie siɛl. 15L tie mɔni i, g yenm muand Kristo Laabamann g dugn b nan’n i, g biɛ be yen mɔniɛɔg. Ama lieb nuan muand yen b pal kul i. 16B muand yen buam g dugn b ban g Yendu lugd min i k n kɔn Laabamann po. 17Yab nba muand g kpaan k ban gaal n liig nyan nuan g muand yen maalŋanm kaa, b mali k b bu tien nnyan i, g pugn n cicagm dansaldieog n ninŋ. 18Ama l kul ne yen g biil baa siɛl. Ban muand yen maalŋanm ii, ban muand yen maalbiiug uu, yal n tie bonmɔnn tie k b l muand Kristo Laabamann i. L po n te k n pal man. N pal biɛ baa l tund g man nnyan i. 19G dugn n ban k i jaandi yen Yiesu Kristo Fuom todl po, l kul ne bu te min ciɛl. 20Min guu yal nba g daan yen n pal kul tie k min daa di fai baa siɛl n ninŋ. Ama n pal ń gii paa bonciɛnn k n bu don Kristo sann yen n munn kul mɔlane yen youg kul l gii tie k n kpe lann i kaa n gii fo. 21G dugn min yaa po, n binbem tie Kristo i, k n kuum tie n nyuad. 22Ama l gii tie k n mɔg miɛl g be, g bu fid g sun tuonmɔnn, lann, n ji g ban min bu gann yal nba. 23Bona ŋanle nba diɛl’n n ne: n sun k min kpe gii be yen Kristo o. Lann n baa su n po. 24Ama i yaa po i k l ŋanm g tie bonmɔnn k min gii be g mɔg miɛl. 25Min la k l tie bonmɔnn i po nyan, n ban k n baa be g mɔg miɛl. N baa be yen i kul gii tod’i, k i saa liig g biɛ gii be yen pamann dindann n ninŋ. 26Nnyan, n tan gii guan i buol youg nba, n po bu te i pala ń biɛ guan g ŋanm g manŋ yen yin be yen Yiesu Kristo. 27Mɔnd man gii be binbem nba tuag Kristo Laabamann sɔnu. Nnyan, l gii tie k n baal g la’i, bii k n l g baal mɔno, min gbad k i l ŋanm g sie dindann n, g taa mɔb g biɛ taan yen payenn g gbaa k i kub dindann nba be Laabamann n ninŋ. 28Biɛ daa ŋaa man i ninnanda ń gii jiend’i. Lann n bu ŋɔn’m k b tuag tudm sɔnu, g yen ŋɔn yinm nuan k i tuag fielu sɔnu. Lann nya Yendu buol i. 29G dugn Yendu g tie’i u ŋalbalg k i gii mɔg dindann kua kaa Kristo n ninŋ, ama k yin gii laad fala mɔ u po, 30gii gbaa gbigbaal nba k i daan la k n gbaa, g biɛ daa l gbaa yen mɔlane k i ban nyan.

will be added

X\