Matieog 9

1G Yiesu kua ŋadunŋ n, g puod mɔgl, g lebd g kun u doug n. 2K b baal yen jua nne u buol, g yiɛlu kua’ɔg, k u nui yen u titala kul kpe k u dua liɛnŋ po. Yiesu n la k b dug u po bonciɛnn k u maad l jua: « N big, daa jie siɛl, a biid piin o. » 3L youg g Yendu Kadaaɔg gbanbanda nne ji mali: « U ne sugd Yendu i. » 4G Yiesu bann b maalm, g bual’b: « Bɛ po n te k i mɔg l maalbiid i ? 5Lanbona nle ne ninŋ, n liɛ yal maadu paa i, a biid piin bii fiil g sonm i ? 6N bu ŋɔn’i, k yin bann g Nifosaal Bija mɔg paalu tinŋ po ne, g bu fid g piin niib biid. » L youg k u maad yua k u nui yen titala bo kpe nyan: « Fiil, tug a liɛnŋ gii kun ! » 7K u fiil g kun. 8Niwulug n la nnyan g jiwaani kua’b k b ji pag Yendu yen wan tie nifoi yaa paalu nba ne. 9Yiesu n nyiɛ l buol g pend g la jua nne k b yi’ug Matieog, k u kal u tuonn n, ban pa lonpo naan. G Yiesu maad’o: « I ŋua’n ! » K u fiil g ŋua’ɔg. 10L puol po i g Yiesu yen u ŋuantieb bo kal Matieog ŋaag g di, g yab gaan lonpo yen biiddanm bonciɛnn baal g kal yen’m. 11L sua g Farisiɛn-nba mɔ be l buol. Ban la nnyan k b bual u ŋuantieb: « I canbaa di yen yab gaan lonpo yen biiddanm, l ŋan ii ? » 12Yiesu n gbad l buali, k u maad: « Yab mɔg laafiɛ kaa kpaan dogda, yiɛnm n kpaan’o. 13Gad man g kpaan Yendu maam ne niimn lan diɛn naan g maad: “ N bua niib ń gii jie b lieb ninbaaɔg u, n g bua ban gii yid’n salg kaa. ” » G Yiesu ji guan g maad lann i: « N g baal k n yiin nimɔnm kaa, n baal k n yiin biiddanm i. » 14Lann i g San Nyunwultua ŋuantieb nagn g bual Yiesu: « L tien nle i k tinm yen Farisiɛn-nba paa g lolg mɔb, k a ŋuantieb nuan g lolg i ? » 15G Yiesu ŋmiɛn’m: « Yab nba k b yiin’m puokuanu jaanm bu fid gii kal yen pabɔnn, yaa youg nba g puodaan daa be yen’m ii ? Yen bann man g youg baad g puopaanŋ sal tan kan gii be yen’m, l youg u k b baa lolg mɔb. 16Sua kan tug cabpaann g lib tiɛdudunŋ. U gii tien nnyan cabpaann ŋann bu te tiɛdudunŋ ń ŋanm g pad g pugn i, lonn n biɛ ji ŋanm gii yab g cie cincinn yal. 17Sua biɛ g piɛgd dikaam gband-lenkpela n ninŋ mɔ. Lann i kaa daam tan gii bie, l gband-lenkpela bu pud i, daam ń yad, l lena mɔ ń biɛl. B tu piɛg dikaam gband-lenpaana n ninŋ i, nnyan, siɛl kan biɛl. » 18Yiesu n maad’b nnyan, g nigbenŋl nne baal g gbaan u nintual n g maad: « N bipuo daa l kpe mɔlane i ; a gii baal g tug a nuu g maan u po, u bu guan g fuod. » 19G Yiesu fiil yen u ŋuantieb g ŋua’ɔg. 20L sua g puo nne wuul faad k l g kɔlg piig yen bina ŋanle n nyan. Yiesu n saa, k l puo nagn u puol po g sii u liɛdl mɔgbann, 21g dugn u bo mali u pal n, k u gii sii baa u liɛdl, k u bu paag i. 22G Yiesu gbeg g la’ɔg g maad: « N bipuo, daa jie siɛl, ŋan yaan dug n po nyan, a la laafiɛ n nyan. » L youg mɔno k l puo paag. 23Yiesu n pund nigbenŋl nba bo yiin’o nyan ŋaag, g la yelpieba yen niwulug k b nyɔgl, 24k u maad’b: « I nya man, sipaanbig ne g kpe kaa, u guand i. » K l niib ji cil g laa’ɔg. 25Ban bel g nyan l niwulug, g Yiesu kua g suol l sipaanbig nuu, k u fiil. 26K l laabaal yad l doug n kul. 27Yiesu n nyiɛ l buol g paan g saa, g juanm banle ŋua’ɔg g ta g maad: « Dafiid Bija, a kan jie’ti ninbaaɔg uu ? » 28Yiesu n pund ŋaag, k l juanm banle nagn u buol, k u bual’b: « I mali k n bu fid g te yin nyuand ii ? » K b tuo, g maad: « Ɛɛn, t Yonmdaan. » 29L youg k u sii b ninbina g maad: « Lan tien nyan i dindann n bual nand nyan. » 30K b ninbina nyuand. G Yiesu ŋanm g kpaa’b k ban daa ŋaa sua ń gbad. 31Ama ban nyiɛ yaa youg, k b waa g muand l laabaal l doug n kul. 32Ban bo nya yaa youg, k b baal yen muug nne Yiesu buol g sanpola ŋua’ɔg. 33K u bel l sanpola g muug ji fid g maad. K l yaa g lid niwulug nba bo be l buol k b ji maad: « T daa g ban g la yal ne Israyɛl doug n ninŋ. » 34G Farisiɛn-nba nuan yen maad k u diɛ Sitaan paalu i, yua tie sanpola bad, g biel sanpola. 35Yiesu bo saa dociɛnd n yen dingbankunkogi n ninŋ kul, g tund niib b tintaann died n, g muand Yendu bal Laabamann, g paagd yiɛnbuoli kul yen cicagdanm kul. 36Yiesu bo tu la niwulug, ninbaaɔg n suol’o, g dugn b pala bo wad, k b naan nyan pei nba g mɔg pekpaal nyan. 37K u tan maad u ŋuantieb: « I la ii ? Bonkukuod bie g yab g tuonsunna yen g yab. 38Lann, miɛl man kpaabdaan, k wan sun tuonsunna u kpaab n ninŋ. »

will be added

X\