Matieog 8

1G Yiesu nyiɛ jual po g jiid, g niwulug ŋuan’o. 2G gbaadl nne nagn g gbaan u nintual n, g maad: « Yonmdaan, a gii bua, a bu fid g paag’n. » 3G Yiesu tand nuu g sii’ug g maad: « N bua, paag ! » L youg mɔno k u gbaadm gbenn, k u paag. 4G Yiesu maad’o: « Suol a mɔb, g daa ŋaa sua ń gbad. Ama, gad g salg-yidkua ń la’a, k a te’og salg nba g Moyis bo maad g gbaadl gii paag wan te nyan, k ban bann k a paag. » 5G Yiesu kua Kafarnawunm doug n, g Rom doug n sijenm ciɛn nne nagn’o, g balm’o, 6g maad: « Canbaa, n tuonsunn yiɛl g dua ŋaag, g lebn g kan fid g fiil. » 7G Yiesu maad’o: « N bu gad g daan paag’o. » 8G sijenm ciɛn ŋmiɛn’o: « Canbaa, n g dagd yen ŋan kua n ŋaag n ninŋ ; maad lanbonyenn kua, n tuonsunn bu paag. 9N mɔ mɔg canbaa‑nba g cɔln’m, g mɔg sijenm nba cɔln’n mɔ. N tu maad yend: Gad, wan gad, g maad lua: Baal, wan baal, g maad n yonm: Tien ne, wan tien. » 10Yiesu n gbad u maam, k l yaa g lid’o k u maad yab nba bo ŋua’ɔg nyan k nne: « Yen mɔni, n maad’i, n g ban g la nil Israyɛl buolu n mɔno, k u dug n po nne. 11N maad’i faa, niib bonciɛnn tan bu nya hal puol yen nintual, g baal g kal g di jaanm yen Abraham yen Isaak yen Sakɔb Yendu ŋaag n. 12Yab g Yendu yen bo kpiɛ g lugd’b k ban kua u ŋaag n, b bu lu banm i cincann po bunbɔnn n ninŋ, naan k b baa buud g ŋman nyina. » 13G Yiesu ji guan g maad sijeciɛn ŋann: « I kun, k lan tien nyan a dindann n bual nand nyan. » L youg mɔno k u tuonsunn paag. 14L puol po g Yiesu gad Piɛr ŋaag, g baal g sua g Piɛr ŋaapuo naa dua g yiɛl k u gbanu ton. 15G Yiesu sii u nuu k u gbanu sɔnŋ, k u fiil g gaal’o, g cand’o. 16L daal daajuoug k b baal yen niib bonciɛnn g sanpola ŋua’b. G Yiesu bel g yaan l sanpola yen u mɔmaam paalu g biɛ paag yiɛnm kul. 17K l tien nyan Yendu sogni Esaayi n bo maad nand nyan: « U nyan fala t po, g gaal t yiɛli kul g tug. » 18Yiesu n la g niib bonciɛnn kaan g lind’o, k u maad u ŋuantieb: « T puod man bɔngbanliel po. » 19G Yendu Kadaaɔg gbanband nne nagn g maad’o: « Canbaa, n baa ŋua’a ŋan saa naan kul. » 20G Yiesu maad: « Nantantoba mɔg fali, g nuani mɔg tedd, Nifosaal Bija nuan yen g mɔg wan bu kpagn yul naan g fuod. » 21K u ŋuantieb siign jalua nne maad’o: « Yonmdaan, cab’n k n daa kun g daan pii n baa o. » 22G Yiesu ŋmiɛn’o: « I ŋua’n g ŋaa g kpienm ń pii b kpienm. » 23Yiesu n maad nnyan k u ji kua ŋadunŋ n ninŋ k u ŋuantieb ŋuan’o. 24Ban saa, g faalu nne kpid mɔgl po yen paalu, g nyunguona tenn waam nne yen lan yil ŋadunŋ po. L sua g Yiesu nuan guand i. 25K u ŋuantieb nagn u buol g find’o g maad: « Yonmdaan, fiel’ti g nyum bu di’ti. » 26K u maad’b: « Laabaal k i jie jiwaani i ? I dindann g yab baa waam nne. » G fiil g tiɛn faalu yen mɔgl po. K l kul te silb. 27K l yaa g lid’b, k b ji maad: « Jua ne tie ŋmaa i, g faalu yen mɔgl mɔno cɔlm’o i ? » 28Wan puod bɔngbanliel po, g kua Gadara doug n, l sua g niib banle nne be g sanpola ŋua’b, k b be kakula n. L niib bo biɛ paaa. L po n te g nil bo g paand pal g tɔg l sɔnu. Ban yaan la Yiesu k b nyiɛ kakula n g cend’o. 29K l niib ji yign g maad’o: « Yendu Bija, bɛ n be tinm yen fin siign ninŋ i ? A baal k ŋan ŋɔn’ti fala yaa aa, g youg daa g pund mɔno o ? » 30L sua g duoli be l buol g yab, g waa g ŋman muaɔg, g g ŋanm g fag yen’m. 31G sanpola ji miɛd Yiesu sugl g maad: « A gii bel’ti ŋan ŋaa tin gad g ŋuan duoli ne. » 32G Yiesu maad’b: « I saa man. » K b ŋaa niib g ŋuan l duoli. L youg, baal g diid, g duoli kul nyiɛ jual po g san g jiid g baa mɔgl n, g biɛl b kul nyum n. 33G yab bo kpaa duoli san g gad doug n, g maad niib ban la yal kul, yen yal bo tien niib banle nba g sanpola bo ŋua’b nyan. 34L youg mɔno g doug n niib kul nyiɛ g togi Yiesu. Ban yaan la’ɔg k b balm’o k wan nya b tinŋ n.

will be added

X\