Matieog 7

1Daa jalg man sua, Yendu kan jalg i mɔ. 2Yin jalg niib nand, b tan bu jalg i mɔ nnyan i. Yal po te k i jalg lieb nyan, l po n bu te Yendu ń jalg i mɔ. 3Bɛ po i k a nyuan muanu nba be a ninja ninbinn n ninŋ, g yen g la daaɔg nba paan a yal n ninŋ i ? 4Lann i kaa, a bu tien nle i g maad a ninja, k wan ŋaa k a nyan muanu u ninbinn n, g daaɔg yen paan a yaa yal n i ? 5Fin munafigidaan ne, daa pand daaɔg nba paan a ninbinn n ninŋ o, nnyan, a bu ŋanm g nyuand g fid g nyan muanu nba be a ninja ninbinn n ninŋ. 6Daa tugd man bona nba tie Yendu yal g tien sangbanni, i gii tien nnyan b bu jun’i ni. Biɛ daa tugd man i laani nba k b tag yen wula g lunn duoli nintual n. I gii tien nnyan b bu ŋmaa ŋmaa l po i. 7I miɛd man, b bu te’i. I kpaan man, i bu la. I kuog man gann, b bu luod i po. 8K l maa yua nba miɛd kul, b bu te’og, yua nba kpaan kul bu la, yua nba kuo gann, b bu luod wan kua. 9I ninŋ ne, ŋmaa i k u big bu miɛl’o kpanu wan te’og tann i ? 10Lann i kaa k u bu miɛl’o janŋ, wan te’og waaɔg u ? 11Yinm nba tie nibiid gii ban k yin te i bid bonŋana, l bu tien nle i, k i Baa nba be polu po ji kan te yab miɛd’o i ? 12I gii bua g niib ń gii tie yal nba i po, yin mɔ ń gii tie’b lann. Moyis kadaaɔg yen Yendu sogni‑nba kadaaɔg n yed yal n nyan. 13Kua man dimɔb nba yiɛb buol, g dugn dimɔb nba yaln yen sɔnu nba piɛ, saa g kua tudm n i. Niib bonciɛnn yen tɔg l sɔnu i. 14Ama dimɔb nba yiɛb yen sɔnu nba nyid n saa g kua miɛl nba kan ban g gbenn buol. Yab yen tɔg l sɔnu g yab. 15Suol man i kua yen yab fa faaɔg k b tie Yendu sogni‑nba. B tu nagn i buol g tie suoo nyan pebid nyan i, ama b pala n, k b yen biɛ nyan fuabɔjad nyan. 16B bontitied n bu ŋɔn’i ban tie yab. Kunkontiig ban g lon sinsaba aa, bii kunkonbɔnn n ban g lon kinkana i ? 17Tiŋanŋ n luon luanŋana g tibiiug mɔ luon luanbiid. 18Tiŋanŋ kan fid g lon luanbiid, nyan tibiiug mɔ ń kan fid g lon luanŋana nyan. 19Tiig nba g luon luanŋana kul, b bu cua’ɔg u g lu muu n ninŋ. 20Lann b bontitied n bu ŋɔn’i ban tie yab. 21L g tie yab nba yi’n Yonmdaan, Yonmdaan kaa bu kua Yendu ŋaag n. Yab nba tie n Baa nba be polu po buam, banm n bu kua u ŋaag n. 22Buud daal niib bonciɛnn bu maad’n: “ Yonmdaan, Yonmdaan, a sann po kaa k t daan sɔgn Yendu maam ii ? A sann po kaa k t daan biel sanpola aa ? A sann po kaa k t daan tien yaalidug bonciɛnn ii ? ” 23L youg u k n bu maad’b: Sud man ne, min g ban’i palb, yinm tuonbiiddanm ne. 24Lann yua nba cenŋ lanbona nba k n maad ne g tug g sun yenn tuonn, wano tie nyan nil nba bo ceg g maa u ŋaag tantiɛɔg po nyan i. 25G taag tan baa, g nyunmɔna yen faalu baal g yil ŋaag po, l ŋaag yen g baa, g dugn u fiɛgl bo sie tantiɛɔg po i. 26Ama yua nba cenŋ lanbona nba k n maad ne, g g tug g sun yenn tuonn, wano tie nyan nil nba bo g mɔg yam, g maa u ŋaag tanbiini po nyan i. 27G taag tan baa, g nyunmɔna yen faalu baal g yil ŋaag po, k l ŋaag baa sa‑la‑la-la g g tenn baa dikpinyenn. » 28Yiesu n maad maad l lanbona g gbenn, k l yaa g lid niwulug nba bo be l buol nyan. 29G dugn u bo g tund’b nyan b Yendu Kadaaɔg gbanbanda nyan kaa. U bo diɛ u yul po yikod i g tund’b.

will be added

X\