Matieog 6

1Suol man i kua, g daa ŋɔnŋ i kua niib nunŋ n k yinm n ŋua Yendu. I gii tie nnyan, i kan la siɛl yaa nyuad i Baa nba be polu po buol. 2Lann, a gii pii taladdaan paab, ŋan daa waa g muand kaannaa kul. Munafigidanm n tie nand n nyan tintaann died n yen sɔnjala po, g niib ń gii pag’b. Yen mɔni, n maad’i banm la b nyuad n nyan. 3Fin nuan gii bu pi talg paab, a nuuganŋ ń daa ban a nuujendu n suun yal ; 4a Baa Yendu nba nyuan k a wuon g pii’ug nyan tan bu ŋmiɛn’a. 5I tu gii jaand, yin daa tie nyan munafigidanm nyan. Banm tu bua ban sed tintaann died n, lann i kaa sɔnkadtaana n i, gii jaand, niib ń gii nyuan’m. Yen mɔni, n maad’i, banm la b nyuad n nyan. 6Fin nuan gii bua jaand ŋan kua a dieog n g luon a gann, g jaand g miɛl a Baa Yendu nba be l buol. Wano kua nba nyuan’a nyan bu gaal a jaandi. 7I tu gii jaand yin daa maad maam bonciɛnn nyan buolfanu yab nyan. Banm mali g maam bonciɛnn n bu te ban la yal k b miɛd. 8Yinm ń daa tie nyan banm nyan g dugn i Baa Yendu tuod g ban yin bua yal k i daa g miɛl’o mɔno. 9Yin tu bu jaand nand n ne: T Baa nba be polu po, A sann ń do. 10A diem ń pund. A buam ń tien tinŋ n nyan a ŋaag n nyan. 11Te’ti dinne yaa jied. 12Di sugl t biid po nyan tin mɔ n di sugl yab nba biil’ti nyan. 13Daa ŋaa tin baa bignn n ama nyan’ti bonbiil n. 14Yen mɔni, i gii di sugl niib po, i Baa nba be polu po mɔ bu di sugl i biid po. 15Ama i gii g di sugl niib po, i Baa Yendu mɔ kan di sugl i biid po. 16I tu gii lol mɔb yin daa ŋmid nunŋ nyan munafigidanm nyan. Banm n tu nyɔl b kua, g kan ŋanm b nunŋ g niib ń bann k b lol mɔb. Yen mɔni, n maad’i banm la b nyuad n nyan. 17Fin nuan gii lol mɔb, ŋan ŋanm g cad a yud, g ŋanm a nunŋ po, 18g daa ŋɔnŋ niib kaa k a lol mɔb, a Baa Yendu kukua nba nyuan’a nyan bu ŋmiɛn’a a mɔlolu nyuad. 19Daa kpaan man mɔgm bonciɛnn g kulg i kua tinŋ po ne, naan g kuutuul yen ninnani bu mua, naan g naayiga bu jan. 20I bilg man i mɔgm Yendu ŋaag, naan g kuutuul yen ninnani kan mua, g naayiga mɔ biɛ kan jan. 21K l maa a mɔgm n be naan nba, a maalm mɔ be l buol i. 22Ninbinn n tie gbannand fidl. L gii tie k a ninbinn ŋan, a gbannand kul baa be yinyiem n ninŋ i. 23A ninbinn gii g ŋan, a gbannand kul baa be bunbɔnn n i. Yinyiem nba be a ninŋ gii te bunbɔnn i, l bunbɔnn ji baa tie nle ? 24Sua kan fid gii ŋua canbaa‑nba banle. U baa bua yend maam i, u kan gii bua lua nublu. U bu tug u kua g cab yend i gii nund lua. I kan fid gii ŋua Yendu g biɛ ŋua ligli mɔ. 25L po n te k n maad’i: Daa tun g mali man i miɛl po, yin baa di yal, g nyu yal ; biɛ daa tun g mali man i gbannand po yin baa liɛ yal. Miɛl g cie jied ii, bii gbannand n g cie tiɛd i ? 26Diid man nuani. I la k b buul bii b yend i, bii b ŋuund dii bunbual n i ? I Baa nba be polu po g dinŋ’b ii ? I g cie’b ii ? 27I ninŋ ne, ŋmaa i, k u maalciɛnm po, u bu fid g te u miɛl ń fagd baa waam nne g pugn i ? 28Bɛ po i k i mali tiɛliɛkad po i ? Diid man muaɔg n tiidi n tien puug k l ŋan nand. B g suun tuonn, b biɛ g luug tiɛd mɔ. 29Ama n maad’i, g bad Salomɔn nba bo mɔg bonciɛnn mɔno bo g ban g liɛ tiɛd k l ŋan nyan tiidi ne ninŋ baa tiyenŋ nyan. 30Yendu gii lanŋ muaɔg n tiidi nba be dinne g wonn k b won bu cua g kuun muu n ninŋ, bɛ po i k u kan lan yinm nifoi i ? I dindann g yab baa waam nne. 31Lann daa fabn man g tua t baa di bɛ i, t baa nyu bɛ i, lann i kaa t baa liɛ bɛ i ? 32Yab nba g dug Yendu po n mɔg l yanbani. I Baa nba be polu po ban k l bona kul ne tie payiɛnu i po. 33Yinm nuan ń cind g tuo Yendu bal gii tuag u mɔmaam sɔnu u, g yal nba tenn kul, u bu pugn’i. 34Daa fabn man wonn po. Ŋaa man wonn ń baal yen u finfabni. Daal kul yeg yen u fala i.

will be added

X\