Matieog 4

1G Foŋanm gad yen Yiesu tinkuonŋ n ninŋ, g Sitaan ń bign’o. 2G Yiesu lol mɔb yentuna piinna yen nyiɛd piinna g kom ji tan suol’o. 3L youg g Sitaan ji nagn g maad’o: « A gii tie Yendu Bija ŋan te tana ne ń kpand jied. » 4G Yiesu ŋmiɛn’o: « Yendu Kadaaɔg maad g jied kua kaa bu te g nil ń gii mɔg miɛl, maam nba nya Yendu mɔb n mɔ be. » 5L puol po g Sitaan tug’o g gad yen’o Serusalɛm g daan don’o jaanddeciɛɔnŋ yul po, 6g maad’o: « A gii tie Yendu Bija, ŋan yug g jiid, g dugn Yendu Kadaaɔg maad g Yendu bu te u malɛg‑nba ń tebn g gabl’a, g daa ŋaa baa a tital ń tuud tann. » 7G Yiesu maad’o: « L kadaaɔg n i, k l biɛ diɛn k a kan bign Yonmdaan, a Yendu. » 8G Sitaan biɛ tug’o g gad g don’o jual nba kped po, g ŋɔn’o ŋanduna doi kul yen lan yab g biɛ ŋan nand, 9g maad’o: « N bu te’a l kul ne, l gii tie k a gbaan g pug’n. » 10Lann i g Yiesu maad’o: « Sud ne, fin Sitaan, g dugn l diɛn Yendu Kadaaɔg n g maad: “ A baa pug Yonmdaan a Yendu kua i, g biɛ dond wano kukua. ” » 11L youg u, g Sitaan sied g ŋaa’ɔg. G Yendu malɛg‑nba nagn Yiesu buol g tien wan bua yal. 12B bo suol San g luon’o. Yiesu n gbad k b suol San, k u nyiɛ l doug n g gad Galile. 13U ji g kal Nasarɛt. U gad g kal doug nne ninŋ k l be mɔgl kunŋ, k b yi Kafarnawunm, Sabulɔnn yen Nɛftali tinŋ n ninŋ. 14L bo tien nnyan g Yendu sogni Esaayi n bo maad yal ń fid g tien yen mɔni: 15« Sabulɔnn yen Nɛftali yab, yab kua g kpiɛ Galile mɔgl Suurdɛn bɔnpuol po, yab g tie Suif‑nba n kua naan po. 16Yab nba daan be bunbɔnn n la yinyiem nba yab ; yinyiem baal g fand yab nba daan kal kuum bunbɔnn n. » 17L youg u g Yiesu ji cil g muand g maad: « Ŋaa man i tuonbiid g lebd i binbem, Yendu bal nag o. » 18Yiesu bo sonm Galile mɔgl kunŋ i g tan la nil yen u ninja, lan tie Simɔn, yua k b yi’ug Piɛr yen u ninja Andre k b lunn janbaaɔnŋ mɔgl n. B bo tie jansuola i. 19G Yiesu maad’b: « I ŋua’n man, n bu te yin ŋaa jansuolu g ji gii taand niib i, ban gii ŋua’n. » 20L youg mɔno k b ŋaa b janbaaɔnŋ g ji ŋua’ɔg. 21Yiesu n sonm g gad liig waam, k u la jalua yen u ninja, lan tie Sebede bid, Saak yen u ninja San, k b be ŋadunŋ n yen b baa Sebede g ŋanmd b janbaand. G Yiesu yiin’m. 22L youg mɔno k b mɔ nyɔl b baa yen ŋadunŋ g ji ŋua’ɔg. 23Yiesu bo waa Galile dingbana kul g tund niib b tintaann died n g muand Yendu bal Laabamann, g paagd yiɛnbuoli kul yen cicagdanm kul. 24K u sann duo Siiri doug n kul. K b baad yen u buol niib nba yiɛl yiɛlbuoli kul, yab g sanpola ŋua’b, yab baa tinŋ yen yab k b gbannand kpe, k u paagd b kul. 25G niib bonciɛnn ji nya Galile, Dekapol, Serusalɛm, Suude yen Suurdɛn bɔnpuol g ŋua’ɔg ban ban ban.

will be added

X\