Matieog 3

1L youg g San Nyunwultua baal. U bo be Suude tinkuonŋ n ninŋ i, g muand Yendu laabaal, 2g maad: « Ŋaa man i tuonbiid g lebd i binbem. Yendu bal nag o. » 3Yendu sogni Esaayi bo maad wano i g tua: « Nil kpaand tinkuonŋ n ninŋ g maad: “ Ŋanm man Yonmdaan sɔnu, sond man u sɔni. ” » 4San bo liɛ liɛdl nne i k b lug yen yuoyuoug kobd, g lol gbanmɔunŋ gbann siɛg n. Lankpand yen siid n bo tie u jied. 5Serusalɛm yab, Suude yab kul yen yab nba bo kua Suurdɛn bɔnkunŋ kul bo saa u buol i, 6g maad niib kul nunŋ n b biid, k u wuul’b nyum Suurdɛn bɔnŋ n ninŋ. 7Wan la g Farisiɛn-nba yen Sadusien-nba bonciɛnn baad nyunwulu nyan, k u maad’b: « Yinm waalaba ne, ŋmaa n maad’i k yin nya Yendu mutuol nba baad ne ninŋ i ? 8I yie k i tien yal ŋɔn k i lebd binbem o, 9gii kal g tua k Abraham tie i yaaja. N maad’i faa, Yendu nuan bu fid g te tana ne ń kpand Abraham yaabuona. 10Piɛg ji dua tiidi nyaga n i. Tiig nba g luon luanŋana kul, b bu cua’ɔg u g lu muu n ninŋ. 11Min nuan wuul’i nyum n i, lann n ŋɔn k i lebd binbem. Ama yua baad mɔg paalu g cie’n. N g dagd yen k n pid baa u taacaaɔg mɔno. Wano tan bu tug Foŋanm yen muu i g wul’i. 12U diɛ u dilennŋmantonn g saa jalg n, g bu lenn u dii. U bu wod diŋani g ŋuun u bunbual n. G nyaan tug feonŋ g lu muu nba kan ban g junn n ninŋ. » 13Lann i g Yiesu nyiɛ Galile g baal Suurdɛn bɔnŋ n San buol, g San ń wul’o nyum. 14G San yie g maad: « L bo bual k fin i ń wul’n, k a mɔ biɛ ji baal n buol k n wul’a nii ? » 15G Yiesu ŋmiɛn’o: « Tien min bual yal mɔlane o, g dugn l ŋan k tin tien Yendu n bua yal kul i. » G San tien Yiesu n bual yal. 16Wan wul Yiesu nyum g gbenn yaa youg, k u nyiɛ nyum n, g polu po luod, u sua g Yendu Fuom jiid nyan lanjelg nyan u po. 17K b gbad g niɛlu nne nyiɛ polu po g maad: « U ne tie n bija i, n pal kɔn u po bonciɛnn. N tug n buam kul g tien u ninŋ. »

will be added

X\