1 Saaba daal n pend, k l fann laad daal siŋapanpan g Magdala Mari yen Mari lua ŋann gad g bu gɔnn kakul. 2 G Yonmdaan malɛg nyiɛ polu po g jiid, g tinŋ kpil g jeg yen paalu k u baal g biid kakutann, g kal l po. 3 U bo nyili g tuud nyan tanyigdu nyan i, k u tiɛd pien kud kud nyan gungund nyan. 4 Sijenm nba bo guu kakul n la’ɔg, g jiwaani kua’b k b tad g ji dua nyan b kpe nyan. 5 G malɛg maad puob: « Yinm ń daa jie siɛl. N ban k i kpaan Yiesu i, yua k b daan kpaa’ɔg dapunpɔnn po. 6 U g be ne, u yied o, nyan wan daan maad nand nyan, baal man g diid wan daan dua naan. 7 Tien man tonm g gad g maad u ŋuantieb, k u yied kpienm siign, k u bu gaal liig g gad Galile, k l po i k i daan bu la’ɔg. Min bo mɔg yal g bu maad’i n nyan. » 8 G puob nyiɛ kakul buol l youg mɔno g jiwaani ŋmad yen pamann, k b ji siɛn g saa g daan bu maad Yiesu ŋuantieb ban gbad yal. 9 B yed k ban gad nne, b sua Yiesu. K u maad’b: « N fuond’i. » G puob nagn g baa g gbaan g suol u titala g pug’o. 10 Lann i g Yiesu maad’b k ban daa jie siɛl, k ban gad g maad u ninjanm, ban gad Galile, k l buol i k b daan bu la’ɔg. 11 Puob n paan g saa yaa youg nba, g sijenm siign ninŋ yenm nyiɛ kakul buol g san g gad doug n, g daan dugn salg-yidkab ciɛnm yal nba bo tien l buol kul. 12 K b mɔ taan g kal yen doug n nikpela g taan mɔb g tug ligli bonciɛnn g tie l sijenm 13 g maad’b: « I maad man niib g nyiɛɔg, i won duan g guan k u ŋuantieb baal g jan u gbannand o. 14 L gii baa dougdaan tubl n, t bu bann tin bu maad’o nand g siɛl yaa maam ń daa lag i po. » 15 G sijenm gaal b ligli g fiil, g tien nyan ban bo ŋɔn’m k ban tien nand nyan, k l maam yad Suif‑nba ninŋ yen dinne. 16 G Yiesu ŋuantieb piig yen yend nba bo tenn gad Galile, g duo jual po, Yiesu n bo ŋɔn’m k ban gad naan. 17 Ban la’ɔg yaa youg, k b baa g gbaan u nintual n, k b ninŋ siɛb yen mali munle-le. 18 G Yiesu nagn g maad: « N Baa nba be polu po tie’n yikod bonn kul po, tinŋ n ne yen polu kul. 19 Lann, gad man ŋanduna doi kul, g te g niib ń te n ŋuantieb, g wul’b nyum Baa yen Bija yen Foŋanm sann po. 20 G tund’b k ban ŋanm gii cɔln min daan ŋɔn’i yal kul. Min nuan ji be yen’i n nyan youg kul, lan cil mɔlane saa yen ŋanduna juodyoug. »
