Matieog 27

1L fann siŋapanpan g salg-yidkab ciɛnm yen doug n nikpela taan g kal g lol k ban kpi Yiesu. 2G lol’o g tug’o g gad g daan tie’og Pilat, yua bo tie dougdaan l youg. 3Suuda nba bo kuad’o nyan n la k b ji bua n kpi’ug, k u yam ŋmad k u tug dibala piintaa ŋann g gad g daan ŋmiɛn salg-yidkab ciɛnm yen nikpela 4g maad: « N tien biid o, min kuad yua k b bu kpi’ug ne g mɔg siɛl yaa biid. » K b ŋmiɛn’o k lann g la banm, k l tie u yal i. 5G Suuda tug ligli g lu jaanddeciɛɔnŋ n g gad g daan sad u kua. 6G salg-yidkab ciɛnm wod l ligli, g maad k l g cab ban tug’l g ŋmad yen jaanddeciɛɔnŋ n yal, g dugn l tie sɔm ligli i. 7Lann i k b taan mɔb g tug l ligli g gad g daa tiɛmaal kpaab g tien saanm kakula. 8L po n te g yen dinne k b yi l buol sɔm kpaab. 9Lann i g Yendu sogni Seremi n bo maad yal ji tien yen mɔni: « B gaal dibala piintaa, Israyɛl yab bo dii daaɔg nnyan i u po, 10g tug l ligli g daa tiɛmaal kpaab, nyan Yonmdaan Yendu n bo maad’n nand nyan. » 11Ban tug Yiesu g gad yen’o dougdaan Pilat buol, g Pilat bual’o: « A tie Suif‑nba bad yaa aa ? » G Yiesu ŋmiɛn’o: « Fin n maad. » 12Ama salg-yidkab ciɛnm yen doug n nikpela n yed k u tien yal nyan nuan, u g jiin siɛl l po. 13Lann i g Pilat bual’o: « A g gbiɛ ban maad yal nba kul a po ne i ? » 14Yiesu g ŋmiɛn’o baa siɛl, k l yaa g lid dougdaan. 15Suif‑nba fielu jaanm kul dougdaan bo tu luod dansalyenŋ i, g ŋaa’ɔg, yua nba g niib taan g bual k ban luod’o. 16L sua g dansalg nne be k b yi’ug Barabas, g niib kul ban’o. 17G Pilat bual niib nba bo tigl l buol nyan: « I bua min ŋaa ŋmaa i, banm banle ne ninŋ i ? Barabas bii, Yiesu i, yua nba k b yi’ug Kristo i ? » 18U bo bual g dugn, u bo ban g nanŋ po n te k b baal yen Yiesu u buol. 19Pilat n bo kal g bu buud yaa youg, k u ŋaapuo sun g maad’o: « Daa kuand a mɔb jua nba g biil siɛl ne maam n, g dugn n won danŋ danŋd nne u po k l mabn’n bonciɛnn. » 20G salg-yidkab ciɛnm yen doug n nikpela tud tud niib k ban maad k b bua wan luod Barabas i, g nyaan biɛn Yiesu. 21G dougdaan biɛ guan g gaal maam g bual: « Banm banle ne ninŋ, i bua min ŋaa ŋmaa i ? » K b kul taan g Barabas. 22G Pilat guan g bual’b: « G Yiesu nba k b yi’ug Kristo nyan i, n ji bu bil’o lɛ i ? » K b taan g maad, k ban kpaa’ɔg dapunpɔnn po. 23G Pilat bual k u biil bɛ i ? K b ŋanm g yign yen paalu k ban kpaa’ɔg dapunpɔnn po. 24Pilat n la k u kan fid l maam, g niib nyɔgl g pugd, k u tug nyum g nid nid niib kul nunŋ n g maad: « Min g be jua ne kuum maam n, i gii kpii’ug, l la yinm i. » 25G niib kul taan g maad: « Ŋaa u kuum n bu baal yen yal ń yil tinm yen t bid yula po. » 26Lann i g Pilat luod Barabas g ŋaa’ɔg, g nyaan te k b pua Yiesu gbana, k u cab k ban tug’o g daan kpaa’ɔg dapunpɔnn po. 27G dougdaan sijenm tug Yiesu g kua yen’o b po, g tigl b lieb kul u buol. 28K b land u tiɛd, g tug gaalmɔunŋ g lan’o, 29g lug kunkoni feglg g yilm’o, g tug lanbann g mubn u nuujendu g ji tu gbaan u nintual n g laa’ɔg g maad: « T fuond’a naa, Suif‑nba bad ! » 30G nyaan sii mɔsand u po, g fiel lanbann nba k b bo mubn’o nyan g pua u yul po. 31Ban laa laa’ɔg g gbenn k b land gaalmɔunŋ ŋann g guan g lan’o u tiɛd g ji tug’o g saa g daan bu kpaa’ɔg dapunpɔnn po. 32Ban nyiɛ doug n g saa, k b cend Siirɛnn jua nne k b yi’ug Simɔn, g niin’o k u tug Yiesu dapunpɔnn. 33K b saa saa g daan pund naan buol nba k b yi Gɔlgota nyan. L sann niimn n tie Yukpabug buol. 34K b tie Yiesu dimɔunŋ k l ŋmad yen bontuntond, k u lenm g yie k u kan nyu. 35Ban kpaa’ɔg g gbenn k b tug u tiɛd g tɔ tiɛ tiɛ g biid biid. B bo tien nnyan g Yendu sogni n bo maad yal ń tien yen mɔni: « B biid n tiɛd, g tɔ tiɛ tiɛ g tug n gaalug. » 36Lann i g ji kal g guu’ug. 37K b diɛn diɛni nne g tabn dapunpɔnn po, Yiesu yul po, k l diɛni ŋɔnŋ wan biil yal nba k b kpaa’ɔg, lann n tie: « U ne tie Yiesu i, Suif‑nba bad. » 38K b kpaa bibiɛdi banle nne g pugn u po. Yend bo be u nuujendu po, g lua be u nuuganŋ po. 39G niib nba pend l buol ji tu sugd’o g gum gum yul, 40g maad: « Fin nba daan yed k a bu fid g mud jaanddeciɛɔnŋ g guan g maa daa ŋantaa, fiel a kua l gii tie k a tie Yendu Bija. Nya dapunpɔnn po g jiid. » 41G salg-yidkab ciɛnm yen Yendu Kadaaɔg gbanbanda yen doug n nikpela mɔ ji laa’ɔg 42g maad: « U daan fiel nilieb g yen ji kan fid g fiel u kua ! U g yed k u tie Israyɛl bad kaa aa ? Wan nya dapunpɔnn po g jiid ; lann i k t baa dug u po. 43U daan tug u kua g cab Yendu i, l Yendu ń ji fiel’o mɔlane g ŋɔn k u bua’ɔg. U daan g maad k u tie Yendu Bija kaa aa ? » 44Bibiɛdi nba k b bo kpaa’b g kpiɛn’o mɔ ji bo sugd’o nnyan i. 45Piig yen kud munle po, g doug kul bɔnn cinmm, saa yen daajuoug kud muntaa. 46Kud muntaa po, g Yiesu tan yign yen paalu g maad: « Eli Eli lama sabaktani ? » L niimn n tie: « N Yendu, n Yendu, bɛ po i k a ŋaa’n i ? » 47G niib nba bo be l buol nyan, yenm gbad g maad k u ji ta g yi Eli i. 48L youg k b siign ninŋ yend san g gad g daan tug ciesuobu g nyua dimiigl n, g tuun laalu po, g tie’og k wan nyu. 49G lieb maad k wan ŋaa k ban liɛ Eli bu baal g fiel’o o ? 50G Yiesu guan g yign yen paalu g ji jiin. 51L youg g cincenciɛɔnŋ nba bo juan jaanddeciɛɔnŋ n ninŋ nyan cil polu g pad g daan jiid tinŋ, g tinŋ jeg, g tangband yagd yagd, 52g kakula luod, g niib nba bo ŋuan Yendu yen b pala kul g tan kpe nyan, g bonciɛnn yied. 53Yiesu n yied, k l niib nyiɛ kakula n g kua Serusalɛm doug n g niib bonciɛnn la’b. 54Rom sijeciɛn yen sijelieb nba bo be l buol g guu Yiesu, n la g tinŋ jeg, yen bona nba bo tien kul, g jiwaani kua’b bonciɛnn k b ji maad: « Yen mɔni, jua ne tu l tie Yendu Bija i. » 55Puob bonciɛnn bo sie fagm g nyuan yal tie l buol. L puob n bo ŋuan Yiesu hal Galile g tod’o g tan pund l buol. 56Magdala Mari yen Mari nba bo tie Saak yen Sosɛf naa yen Sebede bid naa, mɔ bo be l puob siign. 57Daajuoug n tan baal, k Arimati jaŋalmandaan nne baal, k b yi’ug Sosɛf, u mɔ bo tie Yiesu ŋuantua i, 58g gad g la dougdaan Pilat g miɛl Yiesu gbannand. Lann i g Pilat yed k ban tug g te’og. 59G Sosɛf tug Yiesu gbannand g pɔbn cabpienn n, 60g gad g daan duan’o kakupaann nba ninŋ k u bo te k b lugl tangbaɔnŋ n, k u guun u kua. Lann i g bind tanciɛɔnŋ nne g biin kakul g paan g saa. 61L sua g Magdala Mari yen Mari lua ŋann kal g nyuan kakul. 62B bobn Saaba daal g gbenn yo, k l fann g salg-yidkab ciɛnm yen Farisiɛn-nba gad g la dougdaan Pilat, 63g maad’o: « Canbaa, t tiɛd g faaɔgdaan ne daan maad k u gii kpe daa ŋantaa daal u bu yied. 64Lann, te k ban gii guu kakul saa yen daa ŋantaa daal, k u ŋuantieb ń tan daa gad g jan u gbannand, g maad niib k u yied kpienm siign o. L faaɔg ji baa biɛ g cie cincinn yal. » 65G Pilat ŋmiɛn’m: « I sijenm be, tug’b man ban gad g daan guul nyan yin bua nand nyan. » 66K b gad g bobn ban bu guul kakul nand, g ŋanm g biin kakutann g pɔl, g tien b banm, g sen sijenm k ban gii guu.

will be added

X\