1 Yiesu nyiɛ jaanddeciɛɔnŋ n, g paan g saa, k u ŋuantieb nagn g maad yen’o g ŋɔnŋ l jaanddeciɛɔnŋ n died n maa nand. 2 G Yiesu ŋmiɛn’m: « N tua i la waa, yen mɔni n maad’i, l kul tan bu bed g duan tinŋ n sa‑la‑la-la, g baa tanyenn kan tenn gii tua liel po. » 3 Lann i g Yiesu duo g kal Oliif tiidi jual po. K u ŋuantieb baal g la’ɔg b kua buol, g bual’o k wan ŋɔn’m yaa youg nba k l bona bu tien, yen bonn nba bu ŋɔn k u baalu yen ŋanduna ne juodyoug ji g fag. 4 G Yiesu ŋmiɛn’m g maad: « Suol man i kua, g daa ŋaa baa sua ń bɔnd’i. 5 Niib bonciɛnn tan bu baal gii kub n sann g tua k banm n tie Kristo. B bu bɔnd niib bonciɛnn ban tud sɔnu. 6 I baa gbiɛ g tɔb pua i kuann n, i biɛ baa gbiɛ g dingbanfana niib maad tɔb maam. I yam ń daa ŋmad kaa, l bual k l kul ne ń tien yo, ama ŋanduna juodu daa kaa. 7 Buolu tu tan bu fiil g kɔn yen buollua, doug ń fiil g kɔn yen dolieog. Kom tu bu baa dingbana bonciɛnn, dingbanlaa mɔ tinŋ ń jeg. 8 L kul ne daa tie madyiɛlu cilg i. 9 Niib bu kuad’i, ban suol’i g ŋɔn’i fala, g kpi’i. Ŋanduna niib kul kan gii bua i maam g dugn n po. 10 L youg niib bonciɛnn tan bu buon b dindann, g kuad b lieb, g kan gii bua b lieb nublu. 11 Faaɔgdanm tan bu fiil g yed k b tie Yendu sogni‑nba, g bɔnd niib bonciɛnn. 12 Biid tan bu ŋanm g yabd tinŋ po ne g niib bonciɛnn buam tan bu wad. 13 Ama yua nba juun saa yen juog, Yendu bu fiel wano i. 14 B bu muand Yendu bal Laabamann ŋanduna kul, buoli kul ń gbad yo, ŋanduna ń ji fid g juod. 15 I tan gii la bonbiiug nba ŋmad niib yam baal g kua jaanddeciɛɔnŋ n, nyan Yendu sogni Daniɛl n bo maad nand nyan (yua lii lanbonn ne wan gbad l niimn), 16 l youg yab be Suude doug n, ban san g kua jɔa n ninŋ. 17 Yua be deliɛkaɔg po, wan daa kua dieog n, k u bu tug u tiɛd. 18 Yua be kpaab n mɔ ń daa tua k u bu lebd g kun g tug u liɛdl. 19 L dani n ninŋ, fala bu gbad puotinpunma yen sanpandi naa‑nba. 20 I jaand man k l nantaal daal ń daa tuu yen sabɔunŋ youg lann i kaa Saaba daal. 21 L dani n ninŋ niib bu cagn cicagm nba k b g ban g la hal ŋanduna n cil yaa youg saa yen mɔlane. Nil biɛ ji kan ban g cagn l cicagbuolu liem. 22 L bo gii tie k l dana baa tie nnyan g fagd, nil bo kan ciɛl, ama Yendu nigannkab po i k u bu waan l dana. 23 Lann, nil tan gii maad’i g Kristo be ne, lann i kaa k u be ne po, yin daa tuo k l tie mɔni. 24 G dugn faaɔgdanm tan bu fiil g yed k banm n tie Kristo, lieb ń yed k b tie Yendu sogni‑nba, b tan bu tien palug yen yaalidug bona bonciɛnn, l gii tie k b bo bu fid, ban bɔnd Yendu nigannkab mɔno. 25 N tuod g maad’i n nyan. 26 Lann, nil tan gii maad’i: “ Wano n be tinkuonŋ n ninŋ nyan, ” yin daa saa, lann i kaa “ wano n be dieog n nyan, ” yin daa tuo k l tie mɔni. 27 Nyan tanyigdu n tu nya puol g gad nintual nyan, Nifosaal Bija mɔ tan bu baal nnyan i. 28 Bonkpienn n be naan, nanyobli mɔ tigi l buol i. 29 L cicagm dana daan baa pend nyan, g yendu bɔnn o, ŋmaalg mɔ kan gii pien, ŋmaabid bu nya polu po g baa baa. Bona nba be polu po g mɔg paalu kul bu sag g ŋmad yen liel. 30 L youg u, k b bu la bonn polu po, yal ŋɔnŋ g Nifosaal Bija baalu pund. Ŋanduna buoli kul ji baa fabn i, b bu la Nifosaal Bija n nya tawalgband n yen u paaciɛnu yen yudand nba yab. 31 U bu sun u malɛg‑nba yen naatuna nba mɔ, ban taan u nigannkab kul, yab nba be puol, nintual, yaanŋ yen yanbaɔnŋ, ŋanduna kaani kul. 32 Gaal man tundl ne kinkanŋ buol. Youg nba k u tɔ bendmaana k u faad cil bundu, i ban g kpanyil nag. 33 Nnyan, i mɔ tan gii la l bona kul, yin bann g Nifosaal Bija nag o, k u ji be i dimɔi n i. 34 Yen mɔni n maad’i, l kul ne bu tien g sua g mɔlane niib nba be ne, g siɛb daa g kpe. 35 Polu yen tinŋ bu pend, ama n maam nuan kan ban g pend. 36 Baa sua g ban daal, g bual youg nba k l bona kul ne bu tien. Malɛg‑nba nba be polu g ban, Yendu Bija mɔno g ban. N Baa Yendu kua i kaa. 37 Nyan lan bo tie nand Nowe youg nyan, l biɛ tan baa tie nnyan i Nifosaal Bija baalu youg. 38 Dana nba pend o g nyum fid g yil ŋanduna kul nyan, niib bo di, g nyu, g kuand puob, g tien b bid jab, saa yen daal nba g Nowe kua u ŋadunŋ n, 39 g ŋaa’b k b l be g g mɔg siɛl yaa yanbani, g nyum tan baal g dii’b. Nifosaal Bija baalu mɔ tan baa tie nnyan i. 40 Jab banle tan baa be kpaab n, wan tug yend g ŋaa lua. 41 Puob banle tan baa naan dii, wan tug yend g ŋaa lua. 42 Lann daa guand man, g dugn i g ban yaa daal nba k i Yonmdaan bu baal. 43 Ŋanm g cenŋ man ne: Ŋaagdaan bo gii ban naayig n bu baal nyiɛɔg yaa youg nba, u bo kan guan, u bo kan ŋaa naayig ń kua u ŋaag n. 44 Lann mɔ ń baan man gii guu, k l maa Nifosaal Bija tan bu baal yin g mali k u bu baal youg nba i. 45 Tuonsunn nba k u canbaa guun’o u tuonsunlieb, k wan gii tien’m jied ban bua yaa youg nba, l tuonsunn gii ceg, g biɛ cenŋ u canbaa maam, k u tan kpen yaa daal g sua k u ŋanm g suun u tuonn, pamann baa tie l tuonsunn yal i. 47 Yen mɔni n maad’i, u canbaa bu tug u mɔgm kul g guun wano i. 48 Ama l gii tie tuonsunn nba g mɔg yam, g maad u pal n ninŋ k u canbaa daa kan kpen mɔlane, 49 g ji suol u lieb g pua, g di g nyu yen dinyuula, 50 u canbaa tan bu kpen wan g guu yaa daal, yen youg nba k u g ban i, 51 g nyan’o, g taan’o yen munafigidanm naan k b baa buud g ŋman nyina.
