Matieog 23

1Lann i g Yiesu maad niwulug yen u ŋuantieb: 2« Yendu Kadaaɔg gbanbanda yen Farisiɛn-nba n ban Yendu mɔmaam nba be Moyis kadaaɔg n. 3Lann, tien man ban maad’i yal kul, ama i daa togd b bontitied. Ban ŋɔnŋ’i k i gii tie yal nba, banm mɔno g tie. 4B tunŋ niib tuga nba kpai, k banm mɔno yen kan tuo g sii yen b nuubil. 5B tie bona kul g ŋɔnŋ b kua i. Ban tu diɛn Yendu mɔmaam g tien tila nba ninŋ gbenŋ g cie lieb yal. G biɛ liɛ liɛda nba k l mɔgbana yaln g cie lieb yal. 6Banm n tu bua ban kal nigbenŋa kinkaani po jaanm n be naan kul yen liig kinkaani po tintaann died n, 7g bua k b tu gii baal naan niib n ninŋ, niib ń gii fuond’b. G biɛ bua ban gii yi’b canbaa‑nba. 8I siign sua ń daa tuod k b yi’ug canbaa, g dugn yend kua n tie i Canbaa, i kul tie ninjann i. 9I biɛ daa yi sua i baa tinŋ po ne, g dugn yend kua n tie i Baa, lan tie yua be polu po. 10Sua ń daa tuod k b yi’ug yudaan, g dugn yend kua n tie i Yudaan, lan tie Kristo. 11Yua tie nigbenŋl i siign, wano n baa tie i tuonsunn. 12Yua donŋ u kua, u tan bu jiid. Yua jiin u kua mɔ, b tan bu don’o. 13Yinm Yendu Kadaaɔg gbanbanda yen Farisiɛn-nba, munafigidanm ne, fala bu gbad’i, g dugn yinm n panŋ Yendu diem sɔnu g niib kan fid g kua. I kan kua, i biɛ kan ŋaa yab bu kua mɔ ban kua. [ 14Yinm gbanbanda yen Farisiɛn-nba, i tie munafigidanm i, fala bu gbad’i, g dugn i fe pekɔa ŋalman, g biɛ tu jaand g maad maam bonciɛnn g niib ń la’i. L po n te k b tan bu dad i tubl hal lan gbad’i.] 15Yinm gbanbanda yen Farisiɛn-nba, munafigidanm ne, fala bu gbad’i, g dugn i waa dingbanbanfaga g kpaan buolfanu nil, baa niyend nba bu ŋuan i jaandi. I tan gii la l nil, yin te u biid ń yabd g biɛ daan gii cie i yal, yal tan bu kuan’o muu n ninŋ. 16Fala bu gbad’i, yinm juanm po, k i mɔ yed k i baa dadb i lieb. I maad g nil gii puon bonn g taa jaanddeciɛɔnŋ sann, l g biɛ. Ama nil gii puon bonn k l tie jaanddeciɛɔnŋ wula sann po i, u gii g tien l bonn, l kan ŋaa’ɔg. 17I g mɔg yam baa waam nne ; i tie juanm paaa, jaanddeciɛɔnŋ yen wula lɛ po n cie liel i ? I g ban g jaanddeciɛɔnŋ n te g wula nba be l n nyan tie bonmɔnn Yendu po ii ? 18I biɛ maad g nil gii puon bonn g taa salg binbindl sann, l g biɛ. Ama nil gii puon bonn g taa salg nba maa binbindl po nyan sann, u yi g tien l bonn l kan ŋaa’ɔg. 19I tie juanm paaa. Salg binbindl yen salg, lɛ po n cie liel i ? I g ban g binbindl ŋann n te g salg tie bonmɔnn Yendu po ii ? 20Yua puon bonn g taa salg binbindl sann, wan gii ban k u maad g yegn yen salg nba maa l po kul i. 21Yua puon bonn g taa jaanddeciɛɔnŋ sann, wan bann k u maad g yegn yen Yendu i, wano nba be l n. 22Yua maad maam g pol polu, wan gii ban k u pol Yendu n kaal naan g bu buud g yegn yen wano Yendu kul i. 23Yinm gbanbanda yen Farisiɛn-nba, munafigidanm ne, fala bu gbad’i, g dugn i tu bɔgd i bonkukuod n ninŋ kanmi yen kana yen mɔsuulu g bil kpega piig, g tug kpegyenn g te Yendu. I tie lann i, g ŋaa yal tie bonmɔnn g cie l kul ne Yendu Mɔmaam n. Lan tie mɔnkund, ninbajienu yen sɔnsunsonn tɔgnu. I daa bo bu cind g tien lann yo, g fid g diid yal tenn. 24Yinm juanm po, k i mɔ yed k i baa dadb i lieb. Yinm n bua nyunŋanm g tu tind g nyan kpajuug g nyaan tenn yuoyuoug g nal. 25Yinm gbanbanda yen Farisiɛn-nba, munafigidanm ne, fala bu gbad’i, g dugn i tu ŋanm i jeditiɛd yen nyunnyubona puol po, k lan gii ŋan Yendu nunŋ n, g yal yen be l n tie naayig bona yen yin fiel fiel yal i. 26Farisiɛn, fin juan ne, cil g ŋanm a nyunnyubona yen a jeditiɛd nuagn o, l puol po ń fid gii ŋan. 27Fala bu gbad’i yinm gbanbanda yen Farisiɛn-nba, munafigidanm ne, i tie nyan kakula nba k b tu ŋanm g pend l cincann po k lan gii ŋan, k l nuagn yen gbie yen kpaba, kpabbedma nyan i. 28I mɔ tie nnyan i, niib gii la’i b bu yed k i tie nimɔnm i, k i tug n yen gbie yen munafigi yen maalm nba g tuag Yendu mɔmaam sɔnu. 29Yinm gbanbanda yen Farisiɛn-nba, munafigidanm ne, fala bu gbad’i, g dugn i maa Yendu sogni‑nba kakula g jab nimɔnm kakula, 30g tua: “ Tinm bo gii be t yaajanm youg, t bo kan taan’m ban kpi Yendu sogni‑nba. ” 31Yinm mɔno n yaad i mɔb g maad g yab bo kpii Yendu sogni‑nba nyan, k i tie b bid. 32To, lann juod man tuonn nba k i yaajanm bo cil. 33Yinm waalaba buolu, l bu tien nle i k i kan biɛl muu n i ? 34L po n te k n bu sun Yendu sogni‑nba yen yandanm yen gbanbanda i buol. I bu kpi yenm‑nba, g kpaa lieb‑nba dapunpɔna po, g pua lieb mɔ yen gbana, i tintaann died n, ban pud pud, gii biel’b k b waa g puon dingbana. 35Nnyan, niib nba g tien siɛl k b kpii’b, l biid kul bu guan g jiid i yula po. Lan cil Abɛl mamɔnmaad, saa yen Baraki bija Sakari, yua k i bo kpii’ug jaanddeciɛɔnŋ gɔnn n, g kpiɛn salg binbindl nyan. 36Yen mɔni, n maad’i, l kul ne tan bu guan g yil yinm mɔlane niib yula po i. 37Serusalɛm ! Yinm Serusalɛm yab, yinm nba kpi Yendu sogni‑nba, g jaag wan sun yab i buol tana, taal munŋaa i k n kpaan k n taan’i, nyan kuunaanŋ n yaan tu taan u kuubid u kpinkpana n ninŋ nand nyan, k i yie i ? 38L po n te g Yendu bu nyɔl i ŋaag k lan te digbeonŋ. 39N maad’i n nyan, i ji kan ban g la’n saa yen youg nba k i tan bu maad: “ Yua baad Yonmdaan sann po, u sann ń do.” »

will be added

X\