Matieog 21

1Yiesu yen u ŋuantieb n nag Serusalɛm, g tenn waam nne yen ban kua dobig nne ninŋ k b yi Bɛtfaase. L doug bo be jual nne po i, k b yi Oliif tiidi jual. Lann i g Yiesu liin u ŋuantieb banle 2g maad’b: « I saa man doug nba be liig ne. I gii pund yaa youg, i bu la bonnaanŋ daag, k u bonbig sie g kpiɛ’ɔg, yin dagd’o g guan yen b kul nii. 3Nil daan gii bual’i yin maad g Yonmdaan n bua, k u bu ŋmiɛn mɔlane mɔno. » 4L kul ne bo tien g Yendu sogni n bo maad yal ń te mɔni i: 5« Maad man Siyɔn yab nne: “ I bad n baad nyan, u jiin u kua, u jag bonŋ i, bonbig, bonkobg nba tug tuga yaa big. ” » 6Lann i k u ŋuantieb gad g tien nyan wan bo maad’b nand nyan, 7g guan yen l bonnaanŋ yen u bonbig. K b land b tiɛd g maan l boni po g Yiesu duo g jag. 8G niib bonciɛnn land b tiɛd g lieb pad pad tiidi faad k b lad lad sɔnu po. 9G niib nba bo be u liig yen yab bo ŋua u puol po ji yign g maad: « Osaana Dafiid Bija, yua baad Yonmdaan sann po, Yendu ń yad u yedŋanm u po. Osaana, Yendu sann ń do hal polu po. » 10Wan kua Serusalɛm doug n g niib kul ji siɛn g bual k u ne tie ŋmaa i ? 11G niwulug nba bo ŋua’ɔg nyan maad: « Yendu sogni Yiesu i, yua nyiɛ Nasarɛt, Galile tinŋ n. » 12Lann i g Yiesu kua jaanddeciɛɔnŋ n, g bel g yaan yab nba bo kuad yen yab nba bo daa bona l ninŋ kul, g tud yab nba bo cend ligli tieba yen yab kuad lanjeli kogi g lu lu. 13G maad’b k b diɛn Yendu Kadaaɔg n g maad: « N ŋaag ne baa tie jaandi ŋaag i. » Ama k yinm yen ji tug g tien naayiga tintaanbuol. 14G juanm yen wabi nagn wano Yiesu buol, k u paag’b. 15Yendu salg-yidkab ciɛnm yen Yendu Kadaaɔg gbanbanda n la yaalidug bona nba k u bo tien, yen bid nba bo yign g tua Osaana Dafiid Bija, k b pala bie. 16K b bual’o k u gbiɛ bid ne n maad yal ii ? G Yiesu yed k u gbiɛ, g guan g bual’b, k b g ban g lii Yendu Kadaaɔg n lan diɛn naan g maad nne ii ? « A te g binyidi yen sanpandi mɔno yiin g dond’a. » 17G Yiesu ŋaa’b l buol g nyiɛ doug n g gad Betani, g nyiɛɔg tan baal k u duan l po. 18L fann siŋapanpan g Yiesu saa doug n g kom suol’o, 19k u la kinkanŋ nne sie sɔnkunŋ, k u nagn, u yen g la baa kinkann l po, u la faad kua i. Lann i g Yiesu maad l kinkanŋ: « Fin ji kan ban g lon palb. » L youg k l tiig kuol. 20Yiesu ŋuantieb n la nnyan, k l yaa g lid’b k b bual’o: « L tien nle i g kinkanŋ ne gbaa g kuol nnyan i ? » 21G Yiesu ŋmiɛn’m: « Yen mɔni n maad’i, i gii mɔg dindann, g g mali munle-le, i bu fid g tien yal cie min tien kinkanŋ ne yal. I gii maad jual ne mɔno k wan figd g gad g daan baa mɔgl n, u bu figd i. 22I gii mɔg dindann, g jaand g miɛl yal nba kul, i bu la. » 23Yiesu bo kua jaanddeciɛɔnŋ n i g tund niib, g Yendu salg-yidkab ciɛnm yen doug n nikpela tan baal g bual’o k u diɛ yikod lann i g suun tuona ne i, g ŋmaa cab’o l yikod i ? 24G Yiesu ŋmiɛn’m: « N mɔg bonyenn kua i g mɔ bu bual’i. I gii guan g jiin’n, n mɔ bu maad’i yua nba cab’n yikod k n diɛ g suun l tuona. 25Maad’n man, ŋmaa n bo cab San Nyunwultua k u wuul niib nyum i ? Yendu bii niib i ? » Lann i k b maad maad b ŋmiɛl n k nne: « T gii yed g Yendu u, u bu bual’ti g laabaal k t bo g tuo g gaal San maam i ? 26T gii yed g niib mɔ i yaa, niib kan ŋaa’ti g dugn b kul ne mali g San bo tie Yendu sogni i. » 27Lann i k b maad Yiesu k b g ban. G Yiesu mɔ guan g ŋmiɛn’m: « N mɔ kan maad’i yua cab’n l yikod k n suun l tuona. » 28G Yiesu guan g bual’b: « I mali bɛ i makpanjam ne po i ? Jua nne bo mɔg bijabi banle. G tan maad bijakpel po: “ N big, gad n kpaab n dinne. ” 29G big maad k u kan gad. Ama l yann waam k u gbiɛnd l maam po g fiil g gad kpaab n. 30G bibaa maad u waag wan bo kpiɛ g maad bijakpel yal nba. K l big maad: “ Canbaa, n bu gad. Ama u g gad. ” » 31G Yiesu ji bual’b: « Banm banle ne ninŋ ŋmaa tien u baa buam i ? » K b maad g bijakpel. K u guan g maad’b lann i: « Yen mɔni n maad’i, lonpogaala yen cuncona bu kua Yendu diem n g ŋaa’i. 32G dugn San baal g ŋɔn’i mamɔni sɔnu k i yie u maam, g lonpogaala yen cuncona nuan yen tuo g gaal u maam. K i la nnyan, k l biɛ g kua i pala n ninŋ, k yin lebd maalm g gaal u maam. » 33Biɛ cenŋ man makpanjam ne: « Jua nne n bo suol kpaab g ŋuun dimɔunŋ tiidi, g pua gɔglug g lind, g gbiil buoug nba ninŋ k b baa ŋmaad l tiidi luana g nyanŋ nyum. G maa defagdug nne g niib tu bu do l po gii guu kpaab. G tug l kpaab g guun tuonsunna, k l tan gii bie ban bɔgd u yal g te’og. Lann i g fiil g gad sɔnu. 34Dimɔunŋ tiidi luana n tan bie yaa youg, k u sun u naasenm, tuonsunna ŋann buol, k ban gad g gaal u tiidi luana biinu nii. 35K l tuonsunna suol kpaabdaan naasenm g pua yend, g kpii lua, g jaa lua tana. 36K u biɛ sun naasenlieb k b yab g cie cincinn yab. G tuonsunna ŋann biɛ suol b mɔ g tien’m nyan cincinn yab nyan. 37K u ji tan juod g sun u bija, g maad k b daan gii la u bija nuan b bu cɔlm’o. 38Tuonsunna n yaan la u bija, k b maad b ŋmiɛl n: “ Yua tan bu di faal n nyan, baal man tin kpi’ug g yend faal. ” 39Lann i k b nyan’o kpaab n, g gad g daan kpii’ug. 40To, kpaabdaan ji tan gii baal i, u bu tien l tuonsunna nle ? » 41K b ŋmiɛn’o: « U bu biɛn l nibiid i, g tug kpaab g guun tuonsunna nba n tan bu fid g te’og u tiidi luana, l tan gii bie yaa youg. » 42G Yiesu maad’b k b g ban g lii Yendu Kadaaɔg n, naan k b diɛn g maad k nne ii ? « Tann nba g tanmaala bo yie g lu nyan, l tann n tan guan g te dieog fiɛgl tanjal. Yonmdaan tuonn n nyan. K t la, k l ŋan t po. » 43Lann i g Yiesu guan g maad: « L po n te k n maad’i: Yendu tan bu paad u dɔnnu nba k u bo suol yen’i, g guan g suol l dɔnnu yen yab nba bu fid g sun u tuonn lan do nyuad. [ 44Yua nba kul baa l tann po, u bu kɔnn kɔnn i. L tann gii baa yua nba po mɔ, l bu nann’o yom yom.] » 45Yendu salg-yidkab ciɛnm yen Farisiɛn-nba n gbad l makpanjam, k b bann k u maad banm i. 46K b ji kpaan k ban suol’o g yen jie niib, g dugn niib kul bo diɛ g Yiesu tie Yendu sogni i.

will be added

X\