Matieog 20

1Yendu ŋaag n tie nyan makpanjam ne nyan i: « Jua nne n bo nyiɛ siŋapanpan g kpaan paadiila k ban ko u kpaab. 2Wan la paadiila nba, k wano yen banm dii daaɔg. K u yed k u bu pa’b yentunyenn tuonn ligli, g sun’m u kpaab n ninŋ. 3K u tan nyiɛ kud munwai po g la lieb k b kal g g suun siɛl. 4K u maad k ban mɔ ń gad u kpaab n ninŋ, k u tan bu pa’b lan bual nand. 5K b mɔ gad u kpaab n. K u tan guan g nyiɛ piig yen kud munle g gaal lieb, g biɛ tan nyiɛ kud muntaa, g biɛ gaal lieb. 6Kud munmu po, k u biɛ tan nyiɛ g la lieb k b sie, k u bual’b: “ Laabaal k i sie ne yentunmunn, g g suun siɛl i ? ” 7K b maad g sua g gaal’b u kpaab n. Lann i k u maad k ban mɔ ń gii saa u kpaab n. 8G daajuoug baal, g kpaabdaan maad u naasen nba pa tuonsunna, k wan yiin paadiila g pa’b b ligli. K wan cil yab juod g baal o, g pa g daan juod yab kpiɛ g baal. 9Yab bo baal kpaab n kud munmu nyan, k u tie’b yentunyenn tuonn ligli. 10G yab nba bo cind g baal nyan ji mali k banm n bu gaal yal baa cie nnyan. Ama k b yen tie b mɔ yentunyenn tuonn ligli. 11K b ji buln g fu yen kpaabdaan, 12g maad: “ Yab juod g baal ne tien kudyeonŋ kua i, k tinm nba sun yentunmunn g yendu cua’ti, tinm yen banm yaa ligli kul biɛ ji ja ii ? ” 13G kpaabdaan maad b siign yend: “ N dɔnn, n g bua di’a kaa. T bo g dii daaɔg k a tuo k a bu gaal yentunyenn tuonn ligli ii ? 14Gaal a bonn gii saa. L bo tie n buam n ninŋ i, k min te yua juod g baal ŋan gaal nand. 15N kan fid g tug n ligli g tien min bua yal ii ? Bii a pal g man n po k n tien ŋanm i ? ” » 16G Yiesu ji guan g maad, k nnyan i, g yab juod tan bu gaal liig, yab liid ń juod. 17Yiesu yen u ŋuantieb piig yen banle bo paan g do Serusalɛm i, k u piɛd yen’m g maad’b: 18« I la ii, t do Serusalɛm n nyan. B bu kuad Nifosaal Bija, Yendu salg-yidkab ciɛnm yen Yendu Kadaaɔg gbanbanda ń suol’o, g bu’ug, g jiɛl u buud k l tie k ban kpi’ug. 19B bu tug’o g cab buolfanu yab, ban laa laa’ɔg, g pua’ɔg yen naapuna g kpaa’ɔg dapunpɔnn po, wan kpe. Daa ŋantaa daal wan yied. » 20L puol po i g Sebede ŋaapuo baal yen u bid banle g gbaan Yiesu nunŋ n ninŋ k u bua miɛl siɛl. 21G Yiesu bual’o k u bua bɛ i ? K u maad: « N bua k a te n bijabi banle ne, yend ń tan kal a nuujendu, lua ń kal a nuuganŋ, a tan gii kal a badkog po yaa youg. » 22G Yiesu maad’b: « I g ban yin miɛd yal. I bu fid g cagn nyan min bu cagn nand nyan ii ? » K b maad k b bu fid. 23K u guan g ŋmiɛn’m: « L tie mɔni k i bu cagn, ama yal tie n nuujendu po kinkaanu lann i kaa n nuuganŋ po kinkaanu nuan, l kan nya n po kaa. N Baa n ban wan bobn l kinkaani niib nba po. » 24Yiesu ŋuantieb piig nba bo tenn n gbad nnyan, b pala bo g manŋ Sebede bid po. 25G Yiesu yiin b kul g maad’b: « I ban g dougdanm ŋɔnŋ b yikod, g paalu n be yab nuu n mɔ ŋɔnŋ b paalu. 26Lan daa tie nnyan i yaa siign. Yua bua wan te i kul ne ciɛn, wan gii tie i tuonsunn. 27Yua bua wan gii tie i kul ne liig yua, wan gii tie i yonm. 28L po n te g Nifosaal Bija baal. U g baal k wan gii kal g niib suun u po kaa, u baal k wan gii suun niib po i, g biɛ yid u miɛl salg g fiel niib bonciɛnn. » 29Yiesu yen u ŋuantieb bo nyiɛ Seriko g niib bonciɛnn ŋua’ɔg. 30L sua g juanm banle nne kal sɔnjakunŋ. Ban gbad g Yiesu pend nyan, k b yign g maad: « Yonmdaan, Dafiid Bija, a kan jie’ti ninbaaɔg uu ? » 31G niib gaal jad b po, k ban suon. K b biɛ ŋanm g yign yen paalu: « Yonmdaan, Dafiid Bija, jie’ti ninbaaɔg. » 32G Yiesu sed g yiin’m g bual’b, k b bua wan tien bɛ i b po i ? 33K b maad: « Yonmdaan, t bua t ninbina ń nyuand i. » 34G ninbaaɔg suol Yiesu k u sii b ninbina k b nyuand l youg mɔno, g mɔ ji ŋua’ɔg.

will be added

X\