Matieog 19

1Yiesu n maad maad l lanbona g gbenn, k u nyiɛ Galile g tɔgn Suurdɛn bɔnpuol po, g gad Suude tinŋ n ninŋ. 2G niib bonciɛnn ŋuan’o l po, k u paag yab bo yiɛl kul. 3G Farisiɛn-nba nagn g bua bign’o g bual’o: « Yendu Mɔmaam cab g puo gii biil yal kul, k u sal bua u bu fid g nyan’o oo ? » 4G Yiesu ŋmiɛn’m: « I g lii Yendu Mɔmaam kadaaɔg n ninŋ g ŋanduna cilg youg, Yendu bo tag jua yen puo oo ? 5G maad k lann n te g jua bu nya g ŋaa u naa yen u baa g taan gii be yen u ŋaapuo, ban ji gii tie gbannanyend ii ? 6Nnyan i, b ji g tie niib banle kaa, b ji tie niyend i. Lann nifosaal ń daa paad Yendu n taan yal. » 7G Farisiɛn-nba guan g bual’o, k l tien nle i g Moyis yen bo maad, g nil gii bel u ŋaapuo wan te’og kadaaɔg nba ŋɔnŋ k u bel’o i ? 8G Yiesu maad’b k b kangbadm po i, g Moyis bo cab’b k ban gii nyanŋ b puob. G cilg youg l bo g tie nnyan kaa. 9« N maad’i, nil gii nyan u ŋaapuo, k l g tie cunconm po i kaa, u gii guan g kuan puolua, u tien cunconm n nyan. » 10K u ŋuantieb maad g jua yen puo binbenu n ninŋ gii tie nnyan, jua gii g kuan puo lann n su. 11G Yiesu guan g ŋmiɛn’m: « Niib kul kaa gbiɛ l maam niimn, Yendu n cab yab k ban gbad l niimn i kaa. 12Yenm g kuand puob g dugn b tu mal’b k b g tie jab. Lieb mɔ niib n tu biil b jatiɛd. Lieb mɔ g kuand puob g dugn b bua ban ŋanm g sun Yendu tuonn i, u bal ń tand. Yua bu fid g gbad wan gbad. » 13Lann i g niib baal yen binyidi Yiesu buol k wan maan nuu b po g jaand. K u ŋuantieb fu yen’m. 14G Yiesu maad: « Ŋaa man bid ban baal n buol, daa biel’b man, g dugn yab tie nyan banm nyan, Yendu diem tie b yal i. » 15Lann i g maan nuu b po, g pend g saa u sɔnu. 16L youg g naasen nne nagn g bual Yiesu: « Canbaa, n bu tien bɛ i k l tie bonŋann g fid gii mɔg miɛl nba kan ban g gbenn i ? » 17G Yiesu guan g bual’o: « Laabaal k a bual’n bonŋann po i. Yendu kua n ŋan. A gii bua miɛl nba kan gbenn, ŋan gii cɔln u mɔmaam. » 18K l naasen guan g bual’o g mɔmalanm po i ? G Yiesu maad: « A kan kpi nil, a kan conm, a kan jan, a kan kun mɔnkunninkpind, 19Cɔln a baa yen a naa, gii bua a lua nyan a kua nyan. » 20K l naasen guan g maad k u tien l kul ne o, g bɛ n biɛ pɔd’o i. 21G Yiesu maad’o: « A gii bua siɛl ń daa panŋ’a, ŋan gad g kuad a ŋalman, g te tali ligli, lann i k a bu la mɔgm Yendu ŋaag n. A gii tien nnyan, ŋan baal gii ŋua’n. » 22Naasen ŋann bo mɔg ŋalman bonciɛnn. Wan gbad nnyan k u pal biil k u paan g saa. 23Lann i g Yiesu maad u ŋuantieb: « Yen mɔni n maad’i, l paa yen ŋalmandaan ń kua Yendu diem n. 24N bua ŋanm g maad’i yin bann i. Lan paa yuoyuoug po nand k u kan fid g kua kpalpienu bonn n nyan, ŋalmandaan gii bua kua Yendu diem n, l baa paa u po g cie nnyan. » 25U ŋuantieb n gbad nnyan, k l yaa g lid’b k b bual’o k l gii tie nnyan ŋmaa bu fid g la fielu i ? 26K u yaad g diid’b g maad g nifosaal kan fid, g Yendu nuan yen g gbal siɛl. 27L youg u g Piɛr gaal maam g maad: « Diid a, tinm nba ji ŋaa tin mɔg yal kul g ŋua’a ne i, t tan bu do yen bɛ nyuad i ? » 28G Yiesu ŋmiɛn’m: « Yen mɔni n maad’i, Nifosaal Bija tan bu kal u yudand kog po, ŋandunpaann nba baad ne ninŋ. L youg yinm nba ŋua’n ne, i mɔ tan bu kal kogi piig yen ŋanle po gii bu Israyɛl cuga piig yen ŋanle nba be ne. 29Yua ŋaa u ŋaag, u ninjanm, u niipuob, u baa yen u naa, u bid lann i kaa u kpaand, n yaa sann po, u bu do nyuad nba yab g cie wan ŋaa yal. U biɛ bu la miɛl nba kan ban g gbenn. 30Yab nba gaal liig mɔlane, bonciɛnn tan bu juod. Yab nba juod mɔ, bonciɛnn tan bu gaal liig. »

will be added

X\