Matieog 18

1L youg g Yiesu ŋuantieb nagn g bual’o: « Ŋmaa tie ciɛn Yendu diem n i ? » 2Lann i g Yiesu yiin big nne g sen’o b sinsiign g maad: 3« Yen mɔni n maad’i, i gii g lebd i binbem g guan g te nyan bid nyan, i kan kua Yendu diem n ninŋ. 4Lann yua jiin u kua g tie nyan big ne nyan, wano n tie ciɛn Yendu diem n. 5Yua nba gaal big k u tie nyan u ne nyan, k l tie n sann po, u gaal min i. 6Ama yua nba te g bid nba dug n po ne ninŋ, baa yend tud Yendu sɔnu, b bo gii tug naal nba kpai g lol g jɔn u tulu n, g lu’ug mɔgsiel n ninŋ lann n bo baa su u po. 7Yubɔnn ŋua ŋanduna g dugn niib be g te k b lieb tud Yendu sɔnu. Niib nuan baa l be g te g lieb tud sɔnu i. Ama yab te k lieb tud sɔnu nyan, yubɔnn ŋua banm i. 8A nuu lann i kaa a tital gii te k a tie biid, ŋan jiɛl l nuu lann i kaa l tital g lu fagm. A gii kua Yendu ŋaag n yen nuujenn lann i kaa taajenn, lann n su yen ŋan gii mɔg a nui nle yen a titala ŋanle ban lu’a muu nba so g kan ban g junn n ninŋ. 9A ninbinn gii te k a tie biid, ŋan kpigd’o g lu fagm. A gii kua Yendu ŋaag n g tie ninfiɛɔg, lann n su yen ŋan gii mɔg ninbina ŋanle, ban lu’a muu nba so g kan ban g junn n ninŋ. 10Daa nund man bid ne ninŋ baa yend, b malɛg‑nba be n Baa Yendu nintual n youg kul. [ 11G dugn, Nifosaal Bija baal k wan fiel niib nba bod i.] 12I la nle ? Nil gii mɔg pei kobg, g yend bod, u kan ŋaa pei piinwai yen banwai nba tenn jual po, g gad g kpaan yua bod ii ? 13U gii kpaan g la’ɔg, yen mɔni n maad’i, u pal bu manŋ u po gii cie pei piinwai yen banwai nba g bod nyan. 14Nnyan i k i Baa nba be polu po mɔ g bua g bid ne ninŋ baa yend biɛl. 15A ninja gii biil ŋan gad g daan la’ɔg i banle buol. U gii tuo a maam, u guan g te a ninja n nyan. 16U gii yie a maam mɔ, ŋan la niyend lann i kaa niib banle g pugn a po k ban te sieda‑nba k yin fid g ŋanm l maam. 17U gii yie b maam, ŋan maad Kristo tintaanu n yab. U ji gii g cenŋ b yaa maam, wan gii tie a po nyan yua g ban Yendu nyan, lann i kaa nyan yua gaan lonpo nyan. 18Yen mɔni n maad’i ; i gii yed g yal tie kual tinŋ po ne, l tie kual i Yendu buol, i gii cab yal mɔ Yendu mɔ n cab l bonn. 19N biɛ bu maad’i bonliel g pugn. I gii tie niib banle tinŋ ne po g taan g miɛl yal, n Baa nba be polu po bu te’i, 20g dugn niib banle bantaa gii taan naan n sann po, n be b siign. » 21Lann i g Piɛr nagn g bual Yiesu: « Yonmdaan, n ninja gii tun g biid’n, n bu di sugl u po g daan dagd taal munŋaa i ? N bu di sugl g daan pund hal taal munlile ii ? » 22G Yiesu maad’o: « N g yed g taal munlile kua kaa, taal munlile g daan dagd piinlile. 23Nyan min maad ne, Yendu diem tie nyan kpanjam ne nyan i. Bad n bo be g tan yiin u tuonsunna, g yab mɔg u pann kul ń baal g pa. 24Wan cil yaa youg k b baal yen u tuonsunyend nne k u mɔg u pann tudbanm. 25L jua bo g mɔg ligli g bu pa l pann. Lann i g bad tie mɔb k ban kuad’o, g kuad u ŋaapuo yen u bid yen wan mɔg yal kul g pa l pann. 26L youg, k u tuonsunn baa g gbaan u nunŋ n ninŋ g pugd’o g maad: “ Abaa, miɛl sugl, l gii sud waam n bu pa’a l kul. ” 27G ninbaaɔg suol bad k u cab u tuonsunn k wan gii saa g daa pa siɛl. 28L tuonsunn n nya nne g tuog u lua. L sua u lua ŋann daan mɔg u pann yal g tie ligciɛnŋ. K u ceg u lancinŋ n yen paalu g maad k wan pa u ligli. 29K u lua ŋann baa g gbaan g pugd’o g maad: “ Abaa, miɛl sugl, l gii sud waam n bu pa’a. ” 30K u yie g tug’o g gad yen’o k b daan luon’o, k u gii g pa u ligli g gbenn ban daa luod’o. 31U lieb n la nnyan, k b pala biil bonciɛnn k b gad g dugn bad wan tien yal kul. 32Lann i g bad sun g yiin’o g maad: “ A tie nibiiug u. Diid yaa ligciɛnŋ nba k n cab’a ne kul g dugn a miɛl’n sugl po. 33A mɔ bo kan fid g jie a lua ninbaaɔg nyan min jie’a ninbaaɔg nand nyan ii ? ” 34G bad pal bie g pend, k u te k u sijenm nba tund dansali suol’o g luon, k u gii g pa g gbenn ban daa luod’o. » 35G Yiesu ji guan g maad lann i: « N Baa nba be polu po mɔ tan bu tund’i nnyan i, l gii tie k i g di sugl i ninjanm po yen i pala kul. »

will be added

X\