Matieog 14

1L youg g Galile bad Erod gbad ban maad yal Yiesu po, 2g maad u naasenm g Yiesu tie San Nyunwultua i, k u yied kpienm siign i, k l po n te k u mɔg paalu g tie yaalidug bona. 3Erod bo te k b suol San g lol’o, g luon’o, g dugn u ninja Filiip ŋaapuo Erodiad po i. 4L bo tien nnyan g dugn San bo tund g maad Erod k l g cab yen wan fiel u ninja ŋaapuo g kuan. 5Erod bo bua wan kpi San g yen jie niib g dugn bonciɛnn bo tua g San tie Yendu sogni i. 6Erod mad jaanm daal, k Erodiad bipuo ŋɔ siɛg saanm nba baal jaanm nunŋ n, k Erod pal manŋ u po, 7k u puon’o, k wan bua yal kul wan maad’o, k u bu te’og. 8K l sipaan naa tud’o k u maad bad: « Jagd San yul g kpien tadg n ninŋ mɔlane mɔno g te’n. » 9G Bad Erod pal biil. Ama wan bo puon g pol, g saanm biɛ be nyan, k u gbal g maad k ban te l sipaan wan bual yal. 10Lann i g sun u sijenm dansaldieog n, k b gad g daan jagd San Nyunwultua yul, 11g kpien tadg n, g guan g tie l sipaan, k u gaal g gad g tie u naa. 12G San ŋuantieb baal g tug’o g gad g pii, g yuand g gad g maad Yiesu. 13Yiesu n gbad nnyan, k u tug ŋadunŋ, g bu puod mɔgl g gad u kua muaɔg n, naan buol g nil g be. Niib n gbad nnyan k b nyiɛ b doi n g sonm taatinŋ g ŋuan’o. 14Yiesu n nyiɛ ŋadunŋ n g la niwulug, g ninbaaɔg suol’o k u paag yiɛnm nba bo be l buol nyan kul. 15Daajuoug n tan baal k u ŋuantieb nagn u buol g maad’o: « Tin be naan ne tie muaɔg n i, nyiɛnn g kɔb ne, youg mɔ biɛ pend o. Te g niib ń gad doug n ninŋ g daa jied g di. » 16G Yiesu maad k ban daa saa, k u ŋuantieb mɔno ń kpaan jied g te l niib k ban di. 17K u ŋuantieb maad’o k b mɔg kpanu ŋanmu yen jani yinle kua i. 18K u maad k ban tug nii. 19G gaal g te g niib kul kal tinŋ n. K u tug l kpanu ŋanmu yen l jani yinle, g yaad g diid polu po, g tien Yendu balg, g jend jend kpanu g tie u ŋuantieb k b biid biid l niib. 20K b kul ŋman g buo g biɛ tenn bonjena, k b wod g gbien kpancubd piig yen ŋanle. 21Niib nba bo dii l jied bo g luol jab tuda ŋanmu, g puob yen bid be g pugd. 22L puol po g Yiesu maad u ŋuantieb k ban kua ŋadunŋ n ninŋ, g liid bɔngbanliel po g sua k u cab niib nba bo be l buol nyan. 23Wan cab l niib, k u duo u kukua jual po, g daan bu jaand. L tan bɔnn g sua u daa l be l buol u kukua i. 24L sua ŋadunŋ nuan ji be nyunsiign i, g fagd yen bɔngbann o, g nyunguona pua g piɛd’o, g dugn u bo togd faalu i. 25Siŋaafaani g Yiesu ji sonm nyum po, g baad u ŋuantieb buol. 26U ŋuantieb n la k u sonm nyum po, k b yam ŋmad k b ji maad g ne tie finfandug u. G jiwaani kua’b k b ji yign. 27L youg mɔno g Yiesu maad’b: « Sɔnŋ man i yam, min i, daa jie man siɛl. » 28G Piɛr maad Yiesu: « Yonmdaan, l gii tie fin yen mɔni, ŋan te k n sonm nyum po g tuog’a. » 29G Yiesu maad’o k wan baal. G Piɛr nyiɛ ŋadunŋ n, g sonm nyum po, g saa Yiesu po. 30Wan la g faalu paa nyan, g jiwaani suol’o, u sua g nyum bua n di’ug k u yign g maad: « Yonmdaan, fiel’n. » 31L youg g Yiesu tand nuu g suol’o g maad: « Fin i, a dindann g yab baa waam nne, bɛ po i k a pal wad i ? » 32Ban kua ŋadunŋ n yaa youg g faalu te silb. 33G yab bo be ŋadunŋ n kul gbaan u nintual n g ji maad: « A l tie Yendu Bija i yen mɔni. » 34Ban puod mɔgl g gbenn, b kua Senesarɛt doug n i. 35K l buol niib la Yiesu g bann’o, g kpaand l doug n dingbankunkogi n kul, k b baal yen yiɛnm kul Yiesu buol, 36g balm’o k wan ŋaa k ban sii baa u liɛdl mɔgbann. G yiɛnm nba bo sii u liɛdl mɔgbann kul paag.

will be added

X\