Matieog 13

1L daal g Yiesu nyiɛ ŋaag n g gad g kal mɔgl kunŋ. 2G niib bonciɛnn tigl u buol, k u tan gbal g kua g kal ŋadunŋ n ninŋ, g ŋaa’b k b sie mɔgl kunŋ. 3K u pua’b makpanjam bonciɛnn g maad: « Tanbuul nne n bo nyiɛ g bua n pag bonbuoli. 4Wan pagn yaa youg g binyena baa sɔnkunŋ, g bonyugda baal g dii. 5G liel baa tantiɛli po, naan buol g tanyom g yab, g piɛ g gbaa g fiil g dugn l buol tinŋ bo g nyua. 6Ama yendu n siid g cua l bonbilug yaa youg, k l yid g kuol g dugn l jiina bo g fid g jiid tinŋ. 7G liel baa kunkoni n ninŋ, g kunkoni fun g luon l po, k l jug. 8G liel mɔ baa tinŋ n ŋan naan g piɛ g kped g lon luana. Yenn‑nba lon luana kobg kobg, g liel lon piinluob-luob, g liel lon piinta-taa. 9Yua mɔg tuba wan gbad. » 10K u ŋuantieb nagn g bual’o: « Laabaal k a pua’b makpanjam i ? » 11G Yiesu ŋmiɛn’m: « Yendu ŋɔn yinm i u bal ŋasiil, g yen g ŋɔn banm. 12G dugn yua mɔg, b tan bu pugn wano i wan ŋanm g mɔgd. Yua g mɔg mɔ ban fiel wan mɔg yal mɔno. 13L po n te k n pua’b makpanjam. G dugn b nyuan i, b yen g laad, g biɛ cenŋ g yen g gbiɛ. 14Yendu sogni Esaayi n bo maad yal ji baal’b n nyan. U bo maad banm i g tua: “ B tan bu ŋanm g cenŋ, b yen kan gbad siɛl ; g ŋanm g ligd ninbina, b yen kan la siɛl. 15G dugn buolu ne mɔg nangbanm hal bonciɛnn. B nyal b tuba g pii b ninbina, g dugn b g bua ban la yen b ninbina, g gbad yen b tuba, k lan kua b pala n k ban lebd binbem k n fid g paag’b. ” » 16G Yiesu ji guan g maad’b: « Yinm ń gii be pamann n g dugn i ninbina nyuan, k i tuba gbiɛ. 17Yen mɔni n maad’i, Yendu sogni‑nba yen mamɔnmaada bonciɛnn bo bua ban la yin nyuan yal ne, g g la, g bua ban gbad yin gbiɛ yal ne, g g gbad. 18Yinm ń ji ŋanm g gbad tanbuul makpanjam ne niimn. 19Nil gii cenŋ Yendu bal Laabamann, g g gbad l niimn, Bonbiildaan tu baal g nyan ban bul yal l daan pal n i. Wano n tie sɔnkunŋ nba po g bonbim baa nyan. 20Tintantiɛli nba po g bonbim baa nyan tie nil nba cenŋ Yendu maam, g gbaa g gaal yen pamann. 21L maam yen g ŋanm g kal u pal n. U tie nil nba g mɔg juunn i. Fala lann i kaa mabl gii baal’o g dugn Yendu maam po, u bu buon u dindann i. 22Kunkoni n tinŋ nba ninŋ g bonbim baa nyan tie nil nba cenŋ Yendu maam, g ŋanduna maalm yen ŋalman buam yen nyagn l maam po k l kan fid g sun tuonn. 23Tinŋanŋ nba ninŋ g bonbim baa nyan tie nil nba cenŋ Yendu maam, g gbad l niimn. L nil tie nyan bonkukuod nba luon nyan i. Yenn bu fid g lon kobg, liel ń lon piinluob, liel mɔ ń lon piintaa. » 24G Yiesu biɛ pua’b makpanjam liel g maad: « Yendu diem n tie nand n ne. Nil bo bul dibuolŋani u kpaab n. 25G niib tan duan g guan, k u ninnand baal g pag naaniidi g ŋmad yen dibuolŋani g yaad. 26Dii n piɛ g tan maal yaa youg, naaniidi mɔ fiil n nyan. 27G kpaabdaan tuonsunna tan baal g bual’o: “ Canbaa, a daan g bul dii kaa a kpaab n ii ? Naaniidi ne mɔ nyiɛ lɛ i ? ” 28K u ŋmiɛn’m: “ Ninnand n sun l tuonn. ” K u tuonsunna guan g bual’o: “ T gad g ŋabl l mɔbiid ii ? ” 29K u yed k “ ɛn ɛn, daa ŋabl man, g dugn i gii yed k yin ŋabl, i bu ŋabl g yegn yen dii kul i. 30Ŋaa man l kul ń taan g kped, g pund diyendu youg. L youg tan gii pund, n bu maad n tuonsunna, ban cind g cua naaniidi g lol baba, g juu yo, g ji yuand g yend dii g ŋuun n bunbual n. ” » 31G Yiesu biɛ pua’b makpanjam liel g maad: « Yendu diem tie nyan kpinbuolg nba k b yi mutard nyan bii i, g nil tug g bul u kpaab n. 32L nyid g cie bonkukuod kul bii ; l yen gii piɛ, l tu kped g cie kpinbuoli kul. L ji tu te tiig mɔno i, nuani ń gii baad g jagnd u benda po. » 33G Yiesu biɛ pugn’m makpanjam g maad: « Yendu diem tie nyan dibina nyan i, g puo tug g buun yen kpanu yom nba yab, k l kpanu yom kul tan fid fid g gbie tadd. » 34Yiesu bo pua makpanjam i g maad niib l bona kul. U bo g maad siɛl k l g tie yen makpanjam ; 35l bo tien nnyan g Yendu sogni n bo maad yal siɛnyoug ń tien yen mɔni: « N tan baa pua’b makpanjam i. N tan bu maad’b bona nba wuo hal ŋanduna n cil yaa youg. » 36L puol po g Yiesu ŋaa niib l buol g kun ŋaag. K u ŋuantieb ŋuan’o g nagn g bual’o, k wan ŋɔn’m naaniidi makpanjam niimn. 37K u ŋmiɛn’m: « Yua buul dibuoli nba ŋan tie Nifosaal Bija n nyan, 38g kpaab tie ŋanduna. Dibuolŋani tie niib nba tuo Yendu mɔmaam g tie u diem n yab, g naaniidi tie niib nba ŋua Bonbiildaan. 39Ninnand nba pagn naaniidi tie Sitaan n nyan. Diyendu youg tie ŋanduna juodyoug u, g tuonsunna tie malɛg‑nba. 40Ban ŋab naaniidi g juug muu nand nyan, ŋanduna juod daal mɔ baa tie nnyan i. 41Nifosaal Bija tan bu sun u malɛg‑nba ban wod biiddanm yen janmidanm kul g nyan’m u ŋaag n ninŋ, 42g lu’b muu nba so g kan ban g junn n ninŋ, naan buol k b baa buud g ŋman nyina. 43L youg, yab tuag mamɔni sɔnu baa be b Baa Yendu ŋaag n i, k b yinyiem tie nyan yendu n tu siid g tie nand nyan. Yua mɔg tuba wan gbad. 44Yendu diem tie nyan ŋalman nyan i, g pii kpaab n ninŋ. G nil la l ŋalman g guan g ŋanm g piin g lebd g kun yen pamann g daan kuad wan mɔg yal kul g guan g daa l kpaab. 45Yendu diem biɛ tie nyan kpinkpendl nba waa g daa laani nba ŋan nyan i, 46g tan la laanu k l daaɔg paa, k u kun g kuad wan mɔg yal kul g guan g daa l laanu. 47Yendu diem biɛ tie nyan janbaaɔnŋ nyan i, k b lu mɔgl n k u baan janbuoli kul. 48Lan gbie yaa youg, g jansuola dad g don bɔngbann, g kal g lugd janŋani g tien kpancubd n, g lu yal g tie bonŋmankal. 49Ŋanduna juod daal mɔ tan baa tie nnyan i. Malɛg‑nba tan bu baal g nyan nibiid nimɔnm siign, 50g lu’b muu nba so g kan ban g junn n ninŋ, naan k b baa buud g ŋman nyina. 51I gbad l kul ne niimn ii ? » K b maad k ɛɛn, k b gbad. 52G Yiesu guan g maad’b: « Lann n te k n maad’i, yua n ban Yendu Kadaaɔg g biɛ gaal tundl Yendu ŋaag po, tie nyan ŋaagdaan nba nyanŋ u ŋalman n ninŋ bonpaana yen bonkpela nyan i. » 53Yiesu n pua pua l makpanjam g gbenn, k u nyiɛ l buol, 54g kun u doug n, g daan tund niib b tintaann dieog n. B bo gbiɛ u tundl k l yaa g lid’b, k b ji maad: « U yanfuom yen u yaalidug tuona ne kul nya lɛ i ? 55U g tie kanpinda bija kaa aa ? U naa kaa k b yi’ug Mari ii ? Saak yen Sosɛf yen Simɔn yen Suude g tie u ninjanm kaa aa ? 56Tinm yen u niipuob kaa taan g be ne ii ? K u la lɛ i l bona kul ne i ? » 57Lann i k b yie k b kan gaal u maam. G Yiesu maad’b: « Yendu sogni doug n yab yen u ŋaag yab n tu l nund’o. » 58L buol nuan, u ji g tien yaalidug bona bonciɛnn g dugn b bo g dug u po.

will be added

X\