Matieog 11

1Yiesu n ŋɔn u ŋuantieb piig yen banle ŋann nnyan g gbenn, g fiil g kua doi nba bo kpiɛ l buol nyan g tund niib g muand Yendu Laabamann. 2L youg l sua g San Nyunwultua be dansaldieog n i. Wan gbad g niib maad Kristo tuona po, k u sun u ŋuantieb Yiesu buol k ban bual’o g liɛ, 3wano n tie yua bo bu baal bii, b daa baa guu sua i ? 4G Yiesu ŋmiɛn’m: « Guan man g daan maad San yin gbad yal g biɛ la yal. 5Juanm nyuand, g wabi sonm, g gbaada paagd, g tuukpaa gbiɛ, g kpienm yied, k b muand tali Laabamann. 6Yab nba kan buon b dindann g dugn n po, pamann tie b yal i. » 7San Nyunwultua ŋuantieb n paan g saa, g Yiesu ji maad niwulug ŋann San Nyunwultua n tie yua: « I gad k yin diid bɛ i tinkuonŋ n ninŋ i ? Galgulnn nba g faalu mign ii ? 8Bii i bo saa g mali k i bu la jua nba liɛ tiɛŋand yaa a ? Yab nba liɛ tiɛŋand be batieb ŋai i. 9I yen gad g bua n sun bɛ i, k yin la Yendu sogni ii ? Yen mɔni, i gad g la Yendu sogni i, ama yin la yua nba nyan, u cie Yendu sogni mɔno. 10U po i g Yendu bo maad u kadaaɔg n: “ N bu sun n tond k wan gaal liig g ŋanm a sɔnu g sua k a baal. ” 11Yen mɔni n maad’i, puob n mal niib nba kul tinŋ n ne, nil daa g be g cie San Nyunwultua. Ama yab tuo Yendu bal ne, b siign yua g tie siɛl mɔno cie San Nyunwultua. 12Lan cil San Nyunwultua youg o, Yendu kaand u bal, ama saa yen mɔlane, jaddanm gbaa k ban bel lieb yen paalu k ban daa tuo l bal. 13Yendu sogni‑nba kul yen Moyis kadaaɔg bo maad Yendu bal po yo, g San tan fid g baal. 14I gii bu tuo g gbad n maam, yin gaal k wano n tie Eli nba bo bu baal. 15Yua mɔg tuba g bu gbad, wan gbad. 16G mɔlane niib ne i, n bu maad bɛ i b po i ? B naan bid nba kal daag n i, g yi b lieb g maad: 17“ T pieb naagbaag, k i g ŋɔ siɛg. K t yin kuyani, k i g mɔ kumɔni. ” 18San baal g paa g lolg mɔb, k b yed g sanpola n ŋua’ɔg. 19G Nifosaal Bija baal g di, g nyu, k b yed k u puol man g kand, k u tie dinyuul i, k u tie lonpogaala yen biiddanm dɔnn i. Ama Yendu yanfuom tuona n ŋɔnŋ k l yanfuom tie mɔni. » 20L youg u g Yiesu ji fu yen niib nba k u bo ŋanm g tien yaalidug bona bonciɛnn b doi n, k b yen g lebd b binbem. 21U bo maad g tua: « Yinm Korasinn yab yen yinm Bɛtsayida yab, fala bu gbad’i. Yaalidug bona nba tien i doug n ne, l bo gii tie Tiir lann i kaa Sidɔn doi n ninŋ i yaa aa, man b liɛ kpalpiɛd, g pug fantam hal youg, g ŋɔn k b ŋaa b tuonbiid o. 22L po n te k n maad’i, buud daal Tiir yen Sidɔn yab yal baa su yen’i. 23K yinm Kafarnawunm yab i, i mali k i bu fid g te i doug sann ń do polu po yaa aa ? Yendu bu jiin i doug hal tinkpiiug n. G dugn yaalidug bona nba tien i doug n ne, bo gii tien Sɔdɔm i yaa aa, man ne l doug daa be yen mɔlane. 24L po n te k n maad’i, buud daal, Sɔdɔm yab yal baa su yen’i. » 25L youg g Yiesu gaal maam g maad: « N Baa, polu yen tinŋ Yonmdaan, n dond’a g tiend’a balg yen ŋan ŋɔn yab g ban siɛl bona nba k a g cab g yanfodanm yen ninfandanm ń bann. 26Ɛɛn n Baa, a buam n i k l tien nnyan. 27N Baa Yendu tie’n paalu bonn kul po. Sua g ban Yendu Bija, u Baa kua i kaa, sua biɛ g ban Baa mɔ, Yendu Bija kua i kaa, yen yua nba g Yendu Bija tuo g ŋɔn’o Yendu. 28Baal man n buol, yinm nba sun tuonpaala, g tug tugkpiɛga g cɔg, n bu gaal’i yin fuod. 29Tuo man g gaal n tugl g tug, g biɛ gaal n mɔmaam tundl, g dugn min n tie pasiɛddaan g biɛ jiind n kua. Baal man n buol, i pala bu sɔnŋ, 30g dugn n tuonn man, n tugl mɔ biɛ g kpai. »

will be added

X\