Matieog 10

1G Yiesu yiin u ŋuantieb piig yen banle g tie’b paalu k ban gii biel sanpola, g paagd yiɛnbuoli kul, yen cicagdanm kul. 2Yiesu n bo sun u ŋuantieb piig yen banle nba sana n ne: Cincinn yua n tie Simɔn, yua k b bo yi’ug Piɛr, yen u ninja Andre ; Sebede bid, lan tie Saak yen u ninja San ; 3Filiip yen Bartelemi ; Toma yen Matieog yua daa bo gaan lonpo ; Alfe bija Saak, yen Tade ; 4Simɔn, yua nba bo kɔn u doug po, yen Suuda Iskariyɔt yua nba bo tan kuad Yiesu. 5Piig yen niib banle nba g Yiesu bo sun’m n nyan, g maad’b nne: « Daa saa man yab g tie Suif‑nba kuann n, g biɛ daa kua Samaritɛn-nba doi n. 6I saa man Israyɛl buolu n niib po, banm n tie nyan pei nba bod nyan. 7I gii saa, yin gii muand g Yendu bal nag o. 8I paagd man yiɛnm, gii yied kpienm, gii paagd gbaada. I biel man sanpola g yaand’b. N pii’i ni, i g daa kaa, mɔ ń gii piin man g daa gaan siɛl. 9Tuonsunn kan luol u jied, lann, i gii saa yin daa kpaan wula, g biɛ daa ŋuun siɛl yaa ligli mɔ. Daa diɛ man liɛdliel, daa bal man kɔl, g daa kpaan taacaad, g biɛ daa kub lanbann mɔ. 11I gii pund dingbanbig n lann i kaa dingbanciɛɔnŋ nba ninŋ, yin bual g la nimɔn ŋaag, g gad gii be l buol saa yen daal nba k i bu pend. 12I gii kua l ŋaag n yin gaal l ŋaag yab mɔgaalŋani. 13B gii tie nimɔnm, i mɔgaalŋani ń gii be yen’m. B gii g tie nimɔnm mɔ, i mɔgaalŋani ń guan i po. 14B gii g gaal’i, g biɛ g cenŋ i maam yin nya l ŋaag n lann i kaa l doug n, g pid pid i titala po tangulunŋ. 15Yen mɔni, n maad’i, Yendu n bu bu niib kul yaa daal, Sɔdɔm yen Gomɔr yab yal baa su yen l doug n yab. 16Ŋanm g cenŋ man ; n bu sun’i nyan pebid nyan i fuabɔjad sinsiign ninŋ. I ceg man nyan wai nyan, gii tie suoo nyan lanjeli nyan. 17Suol man i kua yen niib, g dugn b bu gad yen’i buuddanm buol, ban suol’i g pua’i yen naapuna b tintaann died n. 18N yaa po i k b bu gad yen’i dougdanm buol yen batieb buol yin kun mɔni n po, banm yen yab g tie Suif‑nba nunŋ n ninŋ. 19Youg nba k b gad yen’i, yin daa bual yin bu maad nand lann i kaa yin bu maad yal kaa, i kan luol yal k i bu maad l youg mɔno. 20G dugn yinm kaa bu maad, i Baa Yendu mɔno n bu ŋɔn’i yal nba k i bu maad. 21Nil tan bu kuad u ninja ban kpi’ug, bibaa ń kuad u big. Bid tan bu fiil g kɔn yen b danm g te ban kpi’b. 22Baa sua tan kan gii bua i nublu g dugn n po. Ama yua bu mind saa yen juog, Yendu bu fiel wano i. 23Doug nba ninŋ k b ŋɔn’i fala, yin san g gad dofanu n. Yen mɔni, n maad’i: I kan waa g tii Israyɛl doi kul g Nifosaal Bija g baal. 24I ban g yua banŋ tuonn kan fid gii cie u canbaa, yonm mɔ kan fid gii cie u yonmdaan. 25Yua banŋ tuonn gii tie nyan u canbaa nyan, g yonm mɔ tie nyan u yonmdaan nyan, l dagd. B yen yiin ŋaagdaan Bɛlsebuul o, b ji bu yiin u ŋaag yab nle i ? 26Lann, daa jie man l niib, g dugn siɛl g wuo g tan kan wuod. Siɛl biɛ g tie ŋasiil g sua tan kan bann. 27N gii maad’i yal nba bunbɔnn n ninŋ, yin maad yensiig n. N gii sɔb g maad’i yal nba, yin maad niib kul ń gbad. 28Daa jie man yab bu kpi nil, g yen kan fid g kpi u nalnŋ. Jie man Yendu, wano n bu fid g te nil nalnŋ yen u gbannand kul ń biɛl muu n ninŋ. 29B g kuad nɔnbid banle g gaan ligli waam nne ii ? Ama b ninŋ ne, baa yend kan baa tinŋ n, l gii g tie i Baa Yendu buam n. 30Yinm nuan, u ban i yud mɔno n ja nand. 31Lann, daa jie man siɛl, g dugn i cie nɔnbid kul. 32Yua nba maad niib nunŋ n, k u tie n yua, n mɔ tan bu maad n Baa nba be polu po nunŋ n k n ban’o ; 33ama yua nba yie k u g tie n yua niib nunŋ n, n mɔ tan bu yie n Baa nba be polu po nunŋ n k n g ban’o. 34Daa mali man k n baal yen manu kaa niib siign tinŋ ne po. N g baal yen manu, n baal yen kunkɔnn i. 35N baal k n paad bijabg yen u baa i, bipuobg yen u naa, puo yen u sal naa. 36Nil naataani mɔno n tan baa tie u ninnanda. 37Yua nba bua u baa lann i kaa u naa g cie’n, u g dagd yen wan te n ŋuantua. Yua nba bua u bija lann i kaa u bipuo g cie’n, u mɔ g dagd yen wan te n ŋuantua. 38Yua nba g tug u dapunpɔnn g ŋua’n, u mɔ biɛ g dagd yen wan te n ŋuantua. 39Yua nba kpaan k wan fiel u miɛl, u bu buon l miɛl. Ama yua nba lu u miɛl g dugn n po, u bu guan g la l miɛl. 40Yua gaal’i, u gaal min i, yua gaal’n mɔ, u gaal yua nba sun’n i. 41Yendu sogni gii baal g nil gaal’o, g dugn u tie Yendu sogni, u bu la Yendu sogni nyuad i. Nimɔn gii baal g nil gaal’o, g dugn u tie nimɔn, u bu la nimɔn nyuad i. 42Yinm, n ŋuantieb, i g tie nigbenŋa kaa, ama yua bu kabl baa nyunsɔnŋm, g te i ninŋ ne yend g dugn u tie n ŋuantua, n maad’i mɔni i, u kan luol u nyuad. »

will be added

X\