Mark 7

1Farisiɛn-nba yen Yendu Kadaaɔg gbanbanda n ninŋ, yenm bo nyiɛ Serusalɛm g baal, g taan lieb Yiesu buol, 2g la g Yiesu ŋuantieb n ninŋ yenm di g g nid. 3Suif‑nba kul, mandg Farisiɛn-nba mɔ yen bo g di g g ŋanm g nid b nui, nyan b danm bogda n bual nand nyan. 4B biɛ gii nyiɛ daag n g kpen, g g la nyum g ŋanm b gbanu, nyan b danm bogda n bual nand nyan, b daa kan di. B danm bogda bo be g yab, k b cɔln. Lan tie b nyunnyubona candu yen b jetienbona candu. 5Lann i g Farisiɛn-nba yen Yendu Kadaaɔg gbanbanda ji bual Yiesu k l tien nle i k u ŋuantieb g cɔln b danm bogda, g tu di, g kan nid i? 6K u ŋmiɛn’m: « Yinm munafigidanm, Esaayi n bo maad lanbona nba i po tie mɔni i. U bo diɛn Yendu lanbona g maad: “ Buolu ne dond’n mɔb n i, b maalm kul fag yen’n, 7ban suun tuona nba g donŋ n sann tie fam i, g dugn mɔmaam nba k b tund niib tie niib maalm i. ” » 8G Yiesu biɛ maad’b: « I ŋaa Yendu mɔmaam yo, g ŋua i danm bogda. » 9G biɛ pugn: « I yie Yendu mɔmaam g ŋua i danm bogda g ji mali k i sun tuonŋann aa ? 10Nnyan i g Moyis bo maad: “ Cɔln a baa yen a naa ; g yua nba maad u baa lann i kaa u naa mabiiug, ban kpi’ug. ” 11Ama k yinm yen tu maad, g yua nba sad g maad u baa lann i kaa u naa: “ Min bo bu tug yal nba g tod’a tie Kɔrban ”, (l niimn tie k u juab g tie Yendu u). 12G yua nba gii maad nnyan, l ji g tie mabl kaa k l daan ń tod u baa lann i kaa u naa. 13I tie nnyan i g diɛ i danm bogda g buond Yendu maam. L bogda i, k i diɛ g luand i lieb. Bona bonciɛnn biɛ be k i tie k l mɔ biɛ naan yen ne. » 14Lann i g Yiesu guan g yiin niwulug g maad’b: « Ŋanm g cenŋ man ne, g gbad l niimn. 15Yal nba kua nil mɔb n kaa biid’o Yendu nunŋ n, yal nya u mɔb n n biid’o. [ 16Yua nba mɔg tuba g bu gbad wan gbad !] » 17G Yiesu tan ŋaa niwulug g kua ŋaag n ninŋ, k u ŋuantieb bual’o l kpanjam niimn. 18K u ŋmiɛn’m: « I mɔ biɛ daa g gbiɛ bona niimn ii ? I g gbad g baa siɛl g be, g nifosaal bu di k lan kuan’o biid n ii ? 19G dugn l yen kan kua u pal n ninŋ kaa, l tu jiid u tug n ninŋ i, g pend g gad g nya. » Yiesu bo maad nnyan g ŋɔn g jied kul dagd yen nil ń di. 20G biɛ maad: « Yal nba nya nil pal n ninŋ n kuand’o biid n ninŋ. 21G dugn nil pal n i g tuonbiid nya. Lann n tie maalbiid yen cunconm yen naayigm yen nikpinu 22yen puobandagl yen ligbuaciɛnm yen tonu yen faaɔg yen tuonbibuolu kul, yen nanŋ yen sanjounŋ yen jipaad yen jadm. 23L tuonbiid kul ne nya nil pal n ninŋ i, g kuand’o biid n. » 24Yiesu bo fiil l buol g tɔgn Tiir po. G kua ŋaag nne ninŋ, g g bua g baa sua bann k u be. Ama g niib yen bann k u be. 25L sua g puo nne mɔg u bipuo g sanpola ŋua’ɔg. L puo n gbad k b maad Yiesu maam nyan, k u gad l youg mɔno g baa g gbaan u nintual n, 26g miɛl’o k wan bel g yaan sanpola nba ŋua u bipuo ne. L puo bo g tie Suif‑nba buolu kaa, u bo nyiɛ Fenisi i, Siiri doug n. 27G Yiesu maad’o k wan ŋaa g bid ń daa di b jied g guo o, g dugn k l g ŋan k ban tug bid jied g lu sangbanni. 28Lann i k l puo ŋmiɛn’o: « Yonmdaan l tie mɔni i, ama g sangbanni nba be tiebl yagma n ninŋ yen di jeyiyola nba tu ŋmad bid nui n g baal tinŋ n. » 29G Yiesu maad’o: « Ŋan jiin’n nand nba ne, i kun, sanpola ŋaa a bipuo o. » 30K u pund ŋaag, g sua k u bipuo dua dunduanu po, g sanpola yaad g ŋaa’ɔg o. 31Yiesu bo nyiɛ Tiir po g gad Sidɔn, g tɔgn Dekapol, g guan Galile mɔgl po. 32K b baal yen jua nne Yiesu buol k u tie tuukpaal g biɛ tie muug. G maad Yiesu k wan di sugl g maan nuu u po. 33G Yiesu tug’o k b sud g fagd yen niwulug, k u tug u nuubila g tuun tuukpaal tuba n ninŋ, g sii mɔsand g tuu u lanm. 34G yaad g diid polu po, g fuod g jiin g maad’o: « Efata », (l niimn n tie k « u tuba ń kpaad »). 35L youg mɔno k u tuba kpaad k u lanm tabd k u ji fid g ŋanm g maad. 36G Yiesu kpaa’b k ban daa ŋaa baa sua ń gbad. Ama wan kpaa’b k ban daa maad yal, b ŋanm g kpaand lann i. 37G niib gbad, k l yaa g lid’b bonciɛnn, k b ji maad: « Wan tien yal nba kul tie bonŋann i. U te g yen tuukpaa kul gbiɛ, g muudi maad. »

will be added

X\