Mark 6

1Yiesu bo nyiɛ l buol k wano yen u ŋuantieb guan g kpen u doug n. 2G Saaba daal, g Yiesu tund niib tintaann dieog n, k l yaa g lid niib nba bo cenŋ u tundl nyan, k b ji maad: « U nyiɛ yenn lɛ i ? Yanfolanm po i k u mɔg ne i ? U tien nle i g suun yaalidug tuona ne i ? 3Wano kaa tie Mari bija kanpinda ŋann ii ? U ninjanm kaa tie Saak yen Sose yen Suud yen Simɔn ii ? U niipuob kaa be t siign ninŋ ne ii ? » Nasarɛt yab n bo ban’o nyan po n bo te k b yie’og. 4Lann i g Yiesu maad’b: « Yendu sogni doug n yab yen u naataani yen u ŋaag yab n tu l nund’o, g siɛl po yab yen bua u maam. » 5Yiesu bo g fid g tien baa siɛl yaa yaalidug bonn l buol, l gii g tie yiɛnm banŋaa nne nba k u bo maan nui b po k b paag i kaa. 6K l yaa g lid Yiesu yen ban bo g dug u po. Yiesu bo waa Nasarɛt dingbankunkogi n ninŋ g tund niib Yendu maam. 7Lann i g yiin u ŋuantieb piig yen banle g ji sun’m banle-le, g tie’b paalu k ban gii biel sanpola. 8U bo maad’b k b gii saa ban gii kub lanbann kua, g daa diɛ baa siɛl. K ban daa diɛ jied, g daa bal kɔl, g biɛ daa ŋuu ligli mɔ. 9K ban gii pil taacaad, g biɛ gii liɛ liɛdyenn kua. 10G biɛ maad’b: « B daan gii gaal’i ŋaag nba ninŋ, yin gii be l ŋaag n, saa yen daal nba k i tan bu nya l doug n. 11I gii pund naan mɔ, k b g gaal’i, g biɛ g cenŋ i maam, yin nya l doug n, g pid pid i titala po tangulunŋ k lan ŋɔn’m k l la banm i. » 12Lann i k u ŋuantieb gad g muand niib g maad’b k ban lebd b binbem, 13g biel g yaand sanpola nba bo ŋua niib, g biɛ tiend kpam yiɛnm bonciɛnn po k b paagd. 14Galile bad Erod bo gbad k b maad Yiesu maam, g dugn Yiesu sann bo duo kaannaa kul. Niib bo tua g Yiesu tie San Nyunwultua i. K u yied kpienm siign i, k l po n te, k u mɔg l paalu g tie yaalidug bona. 15G lieb tua k u tie Eli i. G lieb mɔ tua k u tie nyan Yendu sogni‑nba nba bo be youg n ninŋ nyan yend i. 16Erod n gbad k b maad g Yiesu suun yal nba, k u maad: « San Nyunwultua nba k n daan te k b jagd u yul nyan, wano n yied kpienm siign ninŋ. » 17U bo maad nnyan g dugn wano bad Erod n bo sun niib k b suol San Nyunwultua g luon’o dansaldieog n g lol’o, g dugn Erodiad po. Erodiad bo tie wano Erod ninja Filiip ŋaapuo i, k u fiel g kuan. 18G San bo tund g maad Erod k l g cab k wan fiel u ninja ŋaapuo g kuan. 19Erodiad pal bo bie San po, k u ji kpaan k wan kpi’ug g yen g fid, 20g dugn Erod po. Erod bo ban g San tie yua tuag mamɔni sɔnu, k u pal pien. L po n te k u bo cɔlm’o, g biɛ guu’ug g siɛl yaa bonbiiug ń daa baal’o. Erod bo tu cenŋ San maam lan kuan’o maalm. Ama yen l kul ne, San pinpaɔg yen bo l man u po i. 21Erodiad n bo kpaan daal nba ji bo pund. L daal bo tie Erod mad jaanm daal i. K Erod tien jaanm g yiin u tuonsungbenŋa yen u sijenm ciɛnm yen Galile doug n ninŋ nigbenŋa. 22K Erodiad bipuo kua g ŋɔ siɛg, k l manŋ Erod yen yab nba k u bo yiin’m jaanm nyan kul pala. Lann i g bad Erod maad l sipaan k wan miɛl’o wan bua yal, k u bu te’og. 23G biɛ pol, k u bu te’og wan miɛl’o yal nba kul, g baa l gii tie u diem bɔgdm. 24G sipaan nyiɛ g bual u naa: « N bu miɛl bɛ i ? » K u naa ŋmiɛn’o k wan maad k u bua San Nyunwultua yul i. 25G sipaan san g guan g kua bad buol g maad’o, k u bua wan kpien San Nyunwultua yul tadg n ninŋ mɔlane mɔno g te’og. 26G bad Erod pal biil. Ama wan bo puon g pol, g saanm biɛ be nyan, u ji bo kan fid g kand u mɔb po. 27L youg mɔno, k u sun u sijeyend, g maad’o k wan daan guan yen San yul nii. G sije gad dansaldieog n, g jagd San yul, 28g guan yenn k l kpie tadg n, g tie l sipaan. K u gaal g tie u naa. 29San ŋuantieb n gbad nyan, k b gad g tug u gbannand g pii. 30Yiesu sundi bo taan u buol g dugn’o ban gad g sun yal nba kul g biɛ tund niib yal nba. 31Niib nba bo baad b buol g leb bo yabd g pend, g Yiesu yen u ŋuantieb tan g fid g la yaam g bu di. Lann i g Yiesu maad’b: « Baal man tin gad niib n g be naan, k yin daan fuod waam. » 32K b fiil g gad g kua ŋadunŋ n, g saa naan po nba g nil g be. 33Ban saa yaa youg, g niib bonciɛnn la’b, g bann’b, g nyiɛ doi n g kagn mɔgl g san g gaal liig, g daan kpiɛ g pund naan g Yiesu yen u ŋuantieb bo saa. 34Yiesu n nyiɛ ŋadunŋ n yaa youg g la niwulug, g ninbaaɔg suol’o ; g dugn b bo tie nyan pei nba g mɔg pekpaal nyan i. K u tund’b bona bonciɛnn. 35G youg tan pend k u ŋuantieb nagn g maad’o: « Tin be naan ne tie muaɔg n i, nyiɛnn g kɔb ne, youg mɔ biɛ pend o. 36Te k ban gad dingbankunkogi n yen dobid n g daan daa jied g di. » 37G Yiesu ŋmiɛn’m: « Yinm mɔno ń te’b jied k ban di. » K u ŋuantieb maad’o: « T tug yentuna kobiinle tuonn ligli g gad g daan daa kpanu, g te’b k ban di ii ? » 38G Yiesu maad’b: « Gad man g diid g liɛ i mɔg kpanu ŋanŋaa i ? » K b gad g diid g guan g maad’o k b mɔg kpanu ŋanmu yen jani yinle i. 39Lann i g Yiesu maad u ŋuantieb k ban te g niib ń kal caga caga mɔsɔnŋu po. 40G niib kaln piinmu-mu cagyena n ninŋ, g caglaa n mɔ k b kaln kobg kobg. 41G Yiesu gaal kpanu ŋanmu yen jani yinle ŋann, g yaad g diid polu po, g tien Yendu balg, g jend jend kpanu, g tie u ŋuantieb k ban biid niib. G tug jani yinle ŋann mɔ, k b biid b kul, 42g nil kul ŋman g guo. 43K b taan taan kpanu yen jani nba tenn, g gbien kpancubd piig yen ŋanle. 44Niib nba bo dii l jied bo tie jab tuda ŋanmu i. 45L puol po g Yiesu maad u ŋuantieb k ban kua ŋadunŋ n g gaal liig g puod mɔgl, g gad Bɛtsayida, g sua k u cab niwulug. 46Wan cab niwulug g gbenn, k u duo jual po g bu jaand. 47K l tan bɔnn g sua g ŋadunŋ gad g be hal nyunsinsiign yen u ŋuantieb g Yiesu nuan daa be bɔngbann u kua. 48Siŋaafaani g Yiesu tan sonm nyum po g ŋua u ŋuantieb g dugn u bo la g faalu togd’b k b kud k l g kud. K u tan pund b buol g bua n pend’b. 49Ban yaan la’ɔg k u sonm nyum po, k b mali k l tie finfandug u, g ji yign. 50B kul bo la’ɔg k b yam ŋmad. G Yiesu gbaa g maad’b: « Sɔnŋ man i yam, min i, daa jie man siɛl. » 51Lann i k u kua ŋadunŋ n b buol, g faalu te silb. K l yaa g lid u ŋuantieb, g kpii b gbanu hal bonciɛnn 52g dugn b bo g gbad Yiesu n bo tien yaalidug bonn nba kpanu po. Ninfanm mɔ bo pɔd’b yen ban gbad l niimn. 53Yiesu yen u ŋuantieb n puod mɔgl g pund Senesarɛt doug n, k b lol g sen b ŋadunŋ bɔngbann. 54Ban nya ŋadunŋ n ninŋ yaa youg, g niib la Yiesu g gbaa g bann’o. 55G tɔgn l doug n ninŋ kul, g tugd yiɛnm liɛni po, g saa yen’m ban bo tu gbad g Yiesu be naan buol nba. 56Yiesu n bo saa dobid nba ninŋ yen dogbenŋa nba ninŋ yen dingbankunkogi nba ninŋ kul, niib bo tu taan yiɛnm niib n bo tu paa g taand lieb naan i, g miɛl Yiesu k wan ŋaa k ban sii baa u liɛdl mɔgbann. Yab nba kul bo tu sii’ug, bo tu paag i.

will be added

X\