Mark 5

1Yiesu yen u ŋuantieb bo puod mɔgl g kua Gerasaniɛn-nba doug n. 2L sua g sanpola ŋua jua nne k u be kakula n. Yiesu n l nyiɛ ŋadunŋ n yaa youg, l jua ń la’ɔg, g nya kakula n ninŋ g ji gii togi’ug. 3L jua bo dua l kakula n i. Sua ji bo kan fid g suol g lol’o baa yen kudsiseli mɔno k u kan ciel. 4B bo tu lol u titala yen kudŋui g biɛ lol u nui mɔ yen kudsiseli wan dad g ciel ciel i. G nil bo g mɔg paalu nba bu fid g nyii g kaan’o ŋaag. 5Yendu n yen nyiɛɔg, u bo waa kakula n yen jɔa n ninŋ i g yign, g janmd u kua yen tana. 6U bo la g Yiesu paa fagm, k u san san g tan baa g gbaan u nintual n. 7G yign yen paalu g maad: « Yendu Badciɛn Bija Yiesu, bɛ n be min yen fin siign i ? Yendu sann po, miɛl sugl g daa ŋɔnŋ’n fala. » 8(U bo maad nnyan g dugn Yiesu bo maad sanpola k ban yaad g ŋaa l jua.) 9G Yiesu bual’o, k u sann i ? K u ŋmiɛn k u sann n nyan « T-yab » g dugn t g mɔg dindin. 10K u ji miɛd Yiesu sugl, k wan daa bel g yaan’m l doug n ninŋ. 11L sua g duoli be jual po g yab, g ŋman muaɔg. 12G sanpola ji miɛd Yiesu sugl, k u gii bel’b, wan yen ŋaa k ban gad g ŋuan l duoli. 13G Yiesu cab’b. Lann i k l sanpola ŋaa l jua, g gad g ŋuan duoli. L duoli bo g luol tuda ŋanle. K b kul nyiɛ jual po, g san san g baa mɔgl n, g biɛl b kul. 14G niib nba bo kpaa l duoli nyan san g gad g muand l laabaal doug n ninŋ yen dingbana n ninŋ. G niib gad k ban diid g liɛ bɛ n tien i. 15B pund Yiesu buol, g la jua nba g sanpola bo g mɔg dindin g ŋua’ɔg nyan, k u kal, g ŋanm g liɛ tiɛd, g baa siɛl ji g mɔg’o ; g jiwaani suol’b. 16G niib nba bo be l buol g la l youg, dugn yab nba baal nyan lan tien nand k l jua paag, yen yal nba baal duoli. 17K l niib ji miɛd Yiesu sugl, k wan nya b tinŋ n. 18Lann i g Yiesu gad g bu kua ŋadunŋ n, g jua nba k u bo paag’o nyan miɛl’o sugl, k wan ŋaa k wan gii ŋua’ɔg. 19G Yiesu yie g maad’o: « I kun ŋaag, g daan dugn a naataani Yonmdaan n jie’a ninbaaɔg g teb’a nand. » 20L youg k l jua nyiɛ l buol, g gad g daan kpaand Dekapol doi n ninŋ Yiesu n yaan tien’o ŋanm nba. K l yaa g lid b kul. 21Yiesu bo guan g kua ŋadunŋ g lebd bɔngbanliel po, g niib bonciɛnn tigl u buol mɔgl kunŋ. 22G Suif‑nba tintaann dieog n canbaa nne k b yi’ug Saayirus tan baal, g baa g gbaan Yiesu nintual n, 23g balm’o g maad: « N bipuo dua g yiɛl g nag kuum o, di sugl g baal g maan nuu u po, k wan paag gii mɔg miɛl. » 24Lann i k wano yen Yiesu paan g saa, g niwulug ŋua’b ban ban ban g tud lieb g mabnd’o. 25L sua g puo nne wuul faad k l g kɔlg piig yen bina ŋanle n nyan. 26U bo la fala bonciɛnn yen dogda‑nba, g biil u mɔgm kul, g g fid g paag. U yiɛlu bo l pugd kua i. 27Wan gbad g niib maad Yiesu maam nyan, k u baal g kua niwulug n ninŋ Yiesu puol po g sii u liɛdl. 28G dugn u bo maad u pal n k u gii fid g sii baa Yiesu liɛdl, k u bu paag i. 29Wan l sii yaa youg, g sɔm kɔl, k u bann k u yiɛlu gbenn. 30G Yiesu bann l youg mɔno g paalu nyiɛ u ninŋ, g gbeg g bual g ŋmaa n sii u liɛdl i ? 31K u ŋuantieb maad’o: « A la g niib nyag nne, k a biɛ bual g ŋmaa n sii’a nii ? » 32G Yiesu ji diid niwulug n ninŋ g kpaan yua nba sii’ug. 33L puo n bo ban yal nba tien nyan, k u yam pud, k u ji jegl, g gad g baa g gbaan Yiesu nintual n, g dugn’o yal n tien kul. 34G Yiesu maad’o: « N bipuo, a paag g dugn a dug n po. A yiɛlu gbenn, i saa yen laafiɛ. » 35Yiesu daa bo g maad g gbenn mɔno g niib nyiɛ Suif‑nba tintaann dieog n canbaa Saayirus ŋaag, g baal g maad’o k u bipuo kpe o, k wan ji daa mabnd Yiesu. 36G Yiesu g yiin l maam siɛl g maad Saayirus k wan gii dug u po, g daa jie baa siɛl. 37Lann i g yie g sua kan ciɛn’o, k l gii g tie Piɛr yen Saak, yen Saak ninja San i kaa. 38Ban pund Saayirus ŋaag, g Yiesu la g niib nyɔgl bonciɛnn g buud g yign yen paalu, 39k u kua g maad’b: « Laabaal k i buud g nyɔgl nne i ? Big ne guand i, u g kpe kaa. » 40G niib ji laa’ɔg. K u te g niib kul nyiɛ. K u yiin binaa yen bibaa yen yab nba bo ciɛn’o k b kul kua big buol. 41G Yiesu suol big nuu g maad’o: « Talita kunm ». L niimn n tie: « Sipaanbig, n maad’a, fiil. » 42L youg mɔno, k l sipaanbig fiil g sonm, k l yaa g lid’b. L sipaanbig bo mɔg piig yen bina ŋanle i. 43Lann i g Yiesu kpaa’b k ban daa ŋaa sua ń bann, g nyaan maad big danm k ban te big jied k wan di.

will be added

X\