Mark 4

1Yiesu bo guan g be mɔgl kunŋ i, g tund niib. G niwulug tigl u buol g g mɔg dindin, k u tan gbal g kua ŋadunŋ n, g kaln, g ŋaa niwulug k b be gbingbann. 2U bo pua makpanjam i, g tund’b bona bonciɛnn g maad’b: 3« Cenŋ man ne: Tanbuul nne n bo nyiɛ g bua n pag bonbuoli. 4Wan pagn yaa youg, g binyena baa sɔnkunŋ, g bonyugda baal g dii. 5G liel‑nba baa tantiɛli po, naan buol g tanyom g yab. K l piɛ g gbaa g fiil g dugn l buol tinŋ bo g nyua. 6Ama yendu n yaan siid g cua l bonbilug yaa youg, k l yid g kuol g dugn l jiina bo g fid g jiid tinŋ. 7G liel‑nba baa kunkoni siign, g kunkoni fun g luon l po, k l jug g g lon luana. 8G liel‑nba mɔ baa tinŋ n ŋan naan, g piɛ g duo, g lon luana. Yenn‑nba lon luana piinta-taa, g liel‑nba lon piinluob-luob, g liel‑nba mɔ lon kobg kobg. » 9G Yiesu ji guan g maad’b lann i: « Yua mɔg tuba g bu gbad, wan gbad. » 10Yiesu bo yaad g ŋaa niwulug, k u ŋuantieb yen yab bo be yen’o nyan, bual’o makpanjam ŋann po. 11G Yiesu ŋmiɛn’m: « Yendu cab yinm i, k yin bann u bal ŋasiil, ama yab nba g be u diem n ninŋ nuan, l baa tie b po makpanjam i, 12k b gii nyuan ban daa la siɛl, b gii cenŋ ban daa gbad siɛl. Lann i kaa b tan bu lebd b binbem g Yendu ń piin b biid. » 13G Yiesu biɛ maad’b: « I g gbad tanbuul makpanjam ne niimn ii ? I bu tien nle i, g gbad makpanjam liel‑nba i ? 14Tanbuul n pagn yal tie Yendu maam i. 15Sɔnkunŋ nba po g bonbim baa nyan tie yab nba tu cenŋ Yendu maam Sitaan ń baal l youg mɔno g nyan l maam b pala n i. 16Tantiɛli nba po g bonbim baa nyan tie yab nba tu cenŋ Yendu maam, g gbaa g gaal yen pamann, 17ama k l maam yen kan kaln b pala n ninŋ ; b tie niib nba g mɔg juunn i. Fala lann i kaa mabl gii baal’b Yendu maam po, b tu buon b dindann i. 18G kunkoni nba ninŋ g bonbim baa nyan, tie yab nba tu cenŋ Yendu maam, 19ama g ŋanduna ne maalm yen ŋalman buam yen ŋanduna ne bona kul buam tu nyagn l maam po, k l maam ji kan fid g sun tuonn. 20Tinŋanŋ nba ninŋ g bonbim baa nyan mɔ tie yab nba tu cenŋ Yendu maam, g tug l maam g sun yen tuonn, g lon luana. Yenm‑nba tu lon piinta-taa, lieb‑nba ń lon piinluob-luob, lieb‑nba mɔ kobg kobg. » 21Yiesu biɛ bo maad niwulug: « Sua g sonŋ fidl g cibnd bobl n lann i kaa g kubnd gadoug yagma n, bii ? B tu tuan bonn po i. 22G dugn siɛl g be g wuo, g tan kan wuod. Siɛl mɔ biɛ g be g tie ŋasiil g niib tan kan bann dindaanyenn. 23Yua mɔg tuba g bu gbad wan gbad. » 24G Yiesu biɛ guan g maad’b: « Suol man i kua yen yin gbiɛ yal nba. Yin gaal Yendu maam g sun tuonn nand nba, Yendu mɔ tan bu pa’i nnyan i, g biɛ pugn’i siɛl l po. 25G dugn yua mɔg, b tan bu pugn wano i, yua g mɔg mɔ, ban fiel wan mɔg yal mɔno. » 26Yiesu biɛ bo pugn g maad’b lann i: « Yendu diem tie nyan nil nba bul bonbuoli u kpaab n nyan i. 27Wan gɔ ii, wan nyuan yendu n yen nyiɛɔg uu, u kan bann lan tien nand g bonbuoli piɛ g bual lan kped nand. 28Tinŋ n tu te bonbuoli n pa. L daa tu pa g tie muaɔg u, g tan mal, g juod g tien bim. 29L bim tan gii bie, l tie k ban yend i, g dugn l yendu youg pund n nyan. » 30G Yiesu biɛ maad’b: « T bu nanŋ Yendu diem yen bɛ i ? Makpanjam lann po i k t bu fid g tug g bogn yen Yendu diem i ? 31Yendu diem tie nyan kpinbuolg nba k b yi mutard nyan bii i. L bii nyid g cie bonkukuod kul bii. 32Ama b yen gii bul’o k l piɛ, l tu kped gii cie kpinbuoli kul. U benda tu tand bonciɛnn, g nuani mɔno baad g tie b tedd l po. » 33Yiesu bo diɛ l makpanjam buoli i bonciɛnn, g tund’b Yendu maam, nand nba k b bo bu fid g gbad. 34U bo g maad’b siɛl, k l g tie yen makpanjam ; ama b yen tan gii be b kua n ninŋ, wan ŋɔn u ŋuantieb l kul ne niimn. 35L daal daajuoug g Yiesu maad u ŋuantieb: « T puod man bɔngbanliel po. » 36Lann i k u ŋuantieb tug’o yen ŋadunŋ nba ninŋ k u bo be, k b kul gad g ŋaa niwulug l buol. G lieb mɔ ŋua’ɔg yen b ŋadnd. 37G faalu tan kpid yen paalu, g nyunguona tu baal g yil ŋadunŋ. G nyum kua kua g tan bua n gbie ŋadunŋ. 38L sua g Yiesu dua ŋadunŋ puol po g guand, k u yul kpaag yukpagdl po. K u ŋuantieb find’o g maad: « Canbaa, a dua g guand yaa aa ? Nyum bu di’ti naa. » 39G Yiesu fiil g tiɛn faalu po g maad mɔgl k wan suon. K l kul te silb. 40Lann i k u bual u ŋuantieb: « Laabaal k i mɔg jiwaani nnyan i ? I biɛ daa l g dug n po i ? » 41G jiwaani kua u ŋuantieb paaa k b ji maad maad b kua n ninŋ: « U ne tie ŋmaa i g faalu yen mɔgl kul cɔlm’o i ? »

will be added

X\