Mark 3

1Yiesu bo guan g kua Suif‑nba tintaann dieog n ninŋ ; l sua g jua nne be l buol k u nuu kpe. 2G niib nba bo be l tintaann dieog n ji nyuan Yiesu suoo, k ban liɛ u bu paag l jua Saaba daal, k ban fid g jalg’o oo ? 3G Yiesu maad l jua: « Fiil g sed niib kul sinsiign. » 4Lann i g bual niib nba bo be Suif‑nba tintaann dieog n mɔ: « T yiko cab g Saaba daal nil ń tien bonŋann bii wan tien bonbiiug u ? G nil ń fiel u lua miɛl bii k wan kpi’ug u ? » Baa sua g jiin siɛl. 5G Yiesu nyuand’b yen pabienn, k l yiɛl’o yen ban g bua k b lebd b maalm baa waam nne. Lann i g maad l jua k wan tand u nuu. K u tand k l nuu paag. 6G Farisiɛn-nba nyiɛ g taan g kal l youg yen Erod naasenm g kpaan ban bu tien nand g kpi Yiesu. 7Yiesu bo gad yen u ŋuantieb mɔgl kunŋ. G Galile niib bonciɛnn ŋuan’o. G lieb nyiɛ Suude 8yen Serusalɛm yen Idume yen Suurdɛn bɔnpuol po yen dingbana nba kaag Tiir yen Sidɔn doi, g baal u buol. L niib kul bo baad Yiesu buol g dugn b bo gbad wan suun yal nba kul. 9Lann i g Yiesu maad u ŋuantieb k ban cegn ŋadunŋ u po, g niwulug ń tan daa mabnd’o. 10Yiesu bo maad nnyan g dugn wan bo paagd niib bonciɛnn nyan, yab nba bo yiɛl kul ji bo tud lieb, g kpaan k ban sii’ug u. 11Sanpola n bo tu la Yiesu yaa youg, b bo tu baa g gbaan u nintual n i, g yign g maad: « A tie Yendu Bija i. » 12Ama g Yiesu bo tu yie g gaal jad b po, k ban daa maad wan tie yua. 13L puol po g Yiesu duo jual po, g yiin wan bua yab nba, k b baal u buol. 14U bo yiin niib piig yen banle i, k ban gii be yen’o, k wan gii suun’m k b saa g muand Yendu maam, 15g biɛ tie’b paalu k ban gii biel g yaand sanpola. 16Wan bo yiin niib piig yen banle nba sana n ne: Simɔn, (yua g Yiesu bo pul’o Piɛr) 17yen Sebede bid Saak yen u ninja San, (yab g Yiesu bo pul’b Buanɛrgɛs. L niimn n tie « tatintandi bid ».) 18U biɛ bo yiin Andre yen Filiip yen Bartelemi yen Matieog yen Toma yen Alfe bija Saak yen Tade yen Simɔn yua nba bo kɔn u doug po 19yen Suuda Iskariyɔt yua bo tan kuad Yiesu. 20Yiesu bo guan g kun ŋaag g niwulug yaan tigl u buol, k wan yen u ŋuantieb tan g la yaam mɔno g bu di. 21Yiesu naataani n gbad nnyan, k b baal g bu tug’o, g dugn b bo tua k u yul lebd o. 22G Yendu Kadaaɔg gbanbanda mɔ nyiɛ Serusalɛm, g baal g maad g Yiesu mɔg Bɛlsebuul, yua tie sanpola bad. K u diɛ u yaa paalu i g biel sanpola. 23G Yiesu yiin’m lann i g pua’b makpanjam g maad: « Sitaan bu tien nle i g guan g bel Sitaan i ? 24Doug nba ninŋ g niib kɔn yen b lieb, l doug kan fid gii sie ; 25ŋaag nba ninŋ g niib g taa mɔb, l ŋaag mɔ kan fid gii sie. 26Sitaan gii guan g kɔn yen u kua i, u bu tien nle i gii mɔg paalu i. U paalu po juab n nyan. 27Nil kan fid g kua jua nba mɔg paalu ŋaag, g fiel u tiɛd, l gii g tie k u liid g lol l japaalug yen ŋui i kaa. U gii liid g lol’o nuan, u bu fid g kua g baan u mɔgm kul g yaad yenn. 28Yen mɔni n maad’i: Yendu bu di sugl niib biid kul po g biɛ di sugl yen ban maad mabiid nba kul u po. 29Ama nil gii sugl Foŋanm, l daan kan ban g la sugl. U baa be l biid n ninŋ i, youg ń tuu youg. » 30Yiesu bo maad Yendu Kadaaɔg gbanbanda l kul ne, g dugn b bo maad g sanpola n ŋua’ɔg. 31Yiesu ninjanm yen u naa bo baal g be cincann, g sun nil k wan kua g yiin Yiesu nii. 32L sua g niwulug kal g lind’o. K b maad’o: « A naa yen a ninjanm be cincann g kpaan’a. » 33G Yiesu ŋmiɛn’m: « Ŋmaa n tie n naa i ? B lɛ n tie n ninjanm i ? » 34Lann i g ŋaand ninbina g diid yab nba bo kal g lind’o nyan, g maad: « N naa yen n ninjanm n nyan. 35Yua nba suun n Baa n bua yal, wano n tie n ninja, wano n tie n niipuo, wano n biɛ tie n naa mɔ. »

will be added

X\