Mark 2

1Yiesu bo tien nyan dana ŋanle nne i, g guan g kpen Kafarnawunm doug n. G niib gbad k u be ŋaag, 2k b tigl g tan gbie ŋaag ; g yiɛl ji tan g be baa dimɔb n. G Yiesu tund’b Yendu maam. 3K b baal yen jua nne k u nui yen u titala kul kpe, g jab banna tug’o liɛnŋ po. 4Niib bo yiɛ, k b kan fid g pund yen l yiɛn Yiesu buol, lann i k b duo deliɛkaɔg po, g lond bonn, g jiin liɛnŋ Yiesu nintual n, g yiɛn dua l po. 5Yiesu n la k b dug u po, k u maad yiɛn: « N big, a biid piin o. » 6L sua g Yendu Kadaaɔg gbanbanda nne kal l buol, k b ji mali b pala n ninŋ g maad: 7« Nil ne n maad yal ne, u sugd Yendu i. Yendu kua i kaa, ŋmaa n bu fid g piin nil biid i ? » 8L youg mɔno g Yiesu bann b maalm g bual’b: « Bɛ po n te k i mɔg l maalm i ? 9Lanbona nle ne ninŋ, n liɛ yal maadu paa ii ? G maad yiɛn, A biid piin bii fiil g tug a liɛnŋ g sonm i ? 10To ! Bann man g Nifosaal Bija mɔg paalu tinŋ ne po g bu fid g piin niib biid. » Lann i g maad yiɛn: 11« Fiil, tug a liɛnŋ gii kun. » 12L youg mɔno g yiɛn paag, g fiil, g tug u liɛnŋ g nyiɛ g kun g niib kul nyuan’o. K l yaa g lid b kul. K b ji pag Yendu g tua: « Tinm daa g ban g la yaa bonn ne liel. » 13Yiesu bo guan g nyiɛ g gad mɔgl kunŋ, g niib kul baal u buol, k u tund’b. 14K u tan pend g la k Alfe bija Lefi kal lonpo dieog buol, k u maad’o: « I ŋua’n. » K u fiil g ŋua’ɔg. 15L puol po g Yiesu tan kal Lefi ŋaag, k wano yen u ŋuantieb di yen lonpogaala yen biiddanm ; l nibuolu bo yab o, g ŋua’ɔg. 16Yendu Kadaaɔg gbanbanda nba tie Farisiɛn-nba n la g Yiesu di yen lonpogaala yen biiddanm nyan, k b maad u ŋuantieb: « Laabaal k u di yen lonpogaala yen biiddanm i ? » 17G Yiesu gbad, g maad’b: « Yab nba mɔg laafiɛ kaa kpaan dogda, yiɛnm n kpaan’o. N g baal k n yiin nimɔnm kaa, n baal k n yiin biiddanm i. » 18San Nyunwultua ŋuantieb yen Farisiɛn-nba bo lol mɔb. G diyenn, k b baal g bual Yiesu: « L tien nle i g San Nyunwultua ŋuantieb yen Farisiɛn-nba ŋuantieb lol mɔb, k a yaa ŋuantieb g lol i ? » 19Lann i g Yiesu ŋmiɛn’m: « Yab nba k b yiin’m puokuanu jaanm bu fid g lol mɔb yaa youg nba g puodaan daa be yen’m ii ? N n, youg nba g puodaan daa be yen’m b kan lol mɔb. 20Ama daal baad g puodaan tan kan gii be yen’m, l youg u k b ji baa lolg mɔb. 21Sua kan tug cabpaann g lib tiɛdudunŋ. U gii tien nnyan cabpaann ŋann bu te tiɛdudunŋ ń ŋanm g pad g pugn i, lonn ń biɛ ji ŋanm gii yab g cie cincinn yal. 22Sua biɛ kan tug dikaam g piɛg gband-lenkpela n ninŋ mɔ. Lann i kaa daam tan gii bie, l gband-lenkpela bu pud i, daam yen lena kul ń biɛl. B tu piɛg dikaam gband-lenpaana n ninŋ i. » 23L bo tie Saaba daal i g Yiesu yen u ŋuantieb pend kpaab n ninŋ, k u ŋuantieb togd dii. 24Lann i g Farisiɛn-nba bual Yiesu: « Bɛ n te k a ŋuantieb suun yal nba k l g cab g nil ń sun Saaba daal i ? » 25G Yiesu ŋmiɛn’m: « Lann, i g ban g lii Yendu Kadaaɔg n, Dafiid yen u yegni n bo g mɔg siɛl g bu di, g kom suol’b k b sun yal ii ? 26I sunm g Yendu salg-yidkab kul ciɛn Abiataar youg, wano Dafiid bo kua Yendu-cend‑buol-jounŋ n, g tug salg kpanu k wan yen u yegni ŋman, k l yen bo cab g Yendu salg-yidkab kua i ń ŋman l kpanu uu ? » 27Lann i g biɛ maad’b: « Yendu tien Saaba niib po i, u g tag niib Saaba po kaa. 28L po n te g baa yen Saaba mɔno be Nifosaal Bija nuu n. »

will be added

X\