Mark 16

1Saaba n pend, g Magdala Mari yen Salome yen Mari nba bo tie Saak naa daa kpam nba nu g man, g bu gad g tien Yiesu gbannand po. 2L fann laad daal siŋapanpan, k b gad Yiesu kakul buol g sua g yendu daa do i. 3Ban bo paa sɔnu po yaa youg k b maad b ŋmiɛl n k nne: « Ŋmaa n daan bu bind kakutann t po i ? » 4B yed k ban diid nne, b sua k l tanciɛɔnŋ bind g dua siɛl po. 5K b kua kakul n g la g naasen kal b nuujendu g liɛ gaalpieonŋ, g jiwaani kua’b. 6K u maad’b: « Daa jie man. I kpaan Nasarɛt Yiesu yaa aa ? Yua nba k b daan kpaa’ɔg dapunpɔnn po ii ? U yied o, u g be ne. Diid man, b daan bil’o ne buol ne i. 7Gad man g daan maad Piɛr yen u lieb nba tie wano Yiesu ŋuantieb, k u gaal liig g daan bu guul i kul Galile ; k l po i, k i bu la’ɔg nyan wan daan maad’i nand nyan. » 8Lann i k b yam pud k b nyiɛ kakul buol g ji siɛn g jegl. B bo g tuo g maad baa sua g dugn jiwaani bo kua’b bonciɛnn. [ 9Yiesu n yied laad daal siŋaaɔg n, u kpiɛ g ŋɔn u kua Magdala Mari i. Wano i k u bo bel g yaan sanpola banlile nba bo ŋua’ɔg. 10Lann i k u gad g daan maad Yiesu yegni. L sua k b kal yen pabɔnn g buud. 11Wan maad’b g Yiesu yied o, k u la’ɔg, baa sua g tuo k l tie mɔni. 12L po n pend, k u biɛ lebd u ninnaɔnŋ g ŋɔn u kua u ŋuantieb banle nba bo paa sɔnu po g saa doug. 13Lann i k b lebd g maad b lieb. K b biɛ l g tuo k l tie mɔni. 14G Yiesu ji tan juod g ŋɔn u kua u ŋuantieb piig yen yend ŋann. L bo sua k b di i. K u fu yen’m b kangbadm po, yen dindann n bo pɔd’b nyan po, k l maa niib n bo maad’b k u yied, k b g tuo g gaal k l tie mɔni nyan po. 15Lann i g maad u ŋuantieb: « Gad man ŋanduna munn kul po, g muand niib kul, n Laabamann. 16Yua nba tuo g gaal l maam, g wul nyum, u bu la fielu. Ama yua yie g g gaal l maam, b tan bu bu’ug g ŋmal u tubl. 17Yab nba gaal n maam, ban saa naan kul yaalidug tuona ne n baa suun: b baa biel sanpola n sann po, g maad mabuolfani n ninŋ, 18g so wai, b gii nyuu nyɔgbiiug l kan tien’m baa siɛl, b tu bu jaand g maan b nui yiɛnm po k ban paag. » 19Yonmdaan Yiesu n maad’b l bona kul g gbenn, k u duo polu g kal Yendu jendu. 20Lann i k u ŋuantieb gad g muand Laabamann naan kul. B tuona n ninŋ Yonmdaan bo be yen’m, g te k b tie yaalidug bona, k l ŋɔnŋ k u maam tie mɔni.]

will be added

X\