Mark 14

1Suif‑nba fielu jaanm yen dana nba k b bo tu ŋman kpanu nba k b g tien yen dibina nyan bo tenn daa ŋanle i, g salg-yidkab ciɛnm yen Yendu Kadaaɔg gbanbanda ji kpaan ban bu tien ninfanm nba g suol Yiesu g kpi’ug. 2G ji maad b ŋmiɛl n k lan daa tie jaanm dani n, k lann i kaa niib tan bu kpid wounŋ. 3Yiesu bo be Betani doug n i, Simɔn nba bo tie gbaadl nyan ŋaag n. G puo nne tan kua g sua g Yiesu kal g di. L puo bo kub tilaali nne k b tien yen naar kukua k l be kunkɔnŋanŋ nne ninŋ. L tilaali daaɔg bo paa. K u luod l kunkɔnŋ, g bud tilaali Yiesu yul po. 4Niib nba bo be l buol n la nnyan, g yenm pala bie, k b ji maad b ŋmiɛl n, g bɛ yaa tilaali biilu n nyan i ? 5K b bo bu fid g tug l tilaali g kuad, g gaal dibala kobiintaa g biid tali. Lann i g ji fu yen l puo. 6G Yiesu maad’b: « Bɛ po n te k i kɔn yen l puo i ? Ŋaa’ɔg man, u tien bonŋann i n po. 7Tali nuan baa l be yen’i youg kul i. Yin bua youg nba kul, i bu fid g tod’b. Ama min nuan kan gii be yen’i youg kul. 8Puo ne tien wan bo bu fid g tien yal n po i. U tuod g seln n kuum i g tien tilaali n gbanu po. 9Yen mɔni n maad’i, ban bu muand Laabamann ŋanduna n ninŋ naan buol nba kul, b bu maad puo ne n tien yal, g tiɛd u po. » 10Yiesu ŋuantieb piig yen banle ŋann ninŋ yend, yua k b bo yi’ug Suuda Iskariyɔt, bo gad g la salg-yidkab ciɛnm g bu kuad Yiesu. 11Ban gbad nnyan, k b pala manŋ k b puon’o k b bu te’og ligli. G Suuda Iskariyɔt ji kpaan wan bu tien nand g suol Yiesu g te’b. 12Dana nba ninŋ k b tu ŋman kpanu nba k b g tien yen dibina nyan, l dacincinn daal i, k b tu kpi pebid. L daal i g Yiesu ŋuantieb bual’o: « A bua tin gad lɛ i g bobn Fielu jaanm a po i ? » 13Lann i g Yiesu sun u ŋuantieb n ninŋ banle g maad’b: « Gad man doug n, i daan bu tuog jua nne, k u tug sual yen nyum, yin gii ŋua’ɔg. 14U daan gii kua ŋaag nba ninŋ yin maad l ŋaagdaan: “ T canbaa maad: ‘N liɛ dieog nba ninŋ k n bu di Fielu jaanm yen n ŋuantieb i ?’ ” 15U bu ŋɔn’i deciɛɔnŋ nne k l be detuadug po, g bona kul be l ninŋ. L deciɛɔnŋ n ninŋ i, k i bu bobn Fielu jaanm. » 16Lann i k u ŋuantieb gad. Ban pund doug n, k l bona kul tien nyan Yiesu n bo maad’b nand nyan. K b bobn Fielu jaanm. 17L daal daajuoug, g Yiesu yen u ŋuantieb piig yen banle ŋann pund. 18Ban tan kal g di yaa youg, g Yiesu maad’b: « Yen mɔni n maad’i, yinm nba taan g di yen’n ne, i ninŋ yend bu kuad’n. » 19K u ŋuantieb kul yam ŋmad k b ji bual’o yend yend: « Min yaa aa ? » 20G Yiesu ŋmiɛn’m: « Yinm piig yen banle ne ninŋ yend, yua nba taan g suun saaŋmanŋ n yen’n, wano n bu kuad’n. 21Nifosaal Bija nuan bu kpe nyan ban bo diɛn nand u po Yendu Kadaaɔg n nyan i. Ama fala bu gbad daan nba bu kuad’o. B bo gii g mal l daan, lann n bo baa su u po. » 22Ban bo di yaa youg g Yiesu tug kpanu, g tien Yendu balg, g jend jend g tie u ŋuantieb g maad: « Gaal man, ne tie n gbannand i. » 23G biɛ tug dimɔunŋ yen ŋmanŋ g tien Yendu balg, g tie u ŋuantieb k b kul nyuu. 24K u maad’b: « Ne tie n sɔm i, Yendu yen niib dɔnnu sɔm, sɔm nba wul niib bonciɛnn po. 25Yen mɔni n maad’i, n ji kan ban g nyu dimɔunŋ ne saa yen daal nba k n tan bu guan g nyu dimɔnpaanm Yendu ŋaag n. » 26L puol po k b yin biɛyani g fiil g duo Oliif tiidi jual po. 27Lann i g Yiesu maad u ŋuantieb: « I kul bu yad g ŋaa’n, g dugn l diɛn Yendu Kadaaɔg n g maad: “ N tan bu pua g kpi pekpaal, pei kul ń yad. ” » 28G Yiesu guan g pugn: « Ama n gii yied, n bu gaal liig g daan guul’i Galile. » 29Lann i g Piɛr maad: « B kul gii yad g ŋaa’a, min nuan g saa siɛl. » 30G Yiesu maad’o: « Yen mɔni n maad’a, dinne nyiɛɔg ne mɔno, a bu nai taal muntaa k a g ban’n g sua g kolg daa g mɔ taal munle po. » 31G Piɛr pua pal g maad: « L gii tie kuum mɔno, min yen fin n bu taan g kpe, n kan nai k n g ban’a nuan. » K u ŋuantieb nba tenn kul mɔ maad nnyan. 32Yiesu yen u ŋuantieb bo pund naan buol nba k b yi Gɛtsemani. G Yiesu maad u ŋuantieb: « Kal man ne, k n daa gad g jaand o. » 33Lann i g yiin Piɛr yen Saak yen San k b paan g saa. G jiwaani ji cil g kua’ɔg, k u yam yaad. 34K u maad’b: « N yam kul ŋmad k l naan n bu kpe. I kal man ne g daa guand man. » 35G Yiesu sud g gad liig waam g baa g gbaan g jaand g maad k l gii tie k l bu fid, wan daa ŋaa l fala youg ń baal’o. 36G Yiesu biɛ maad: « N Baa, baa siɛl g paa a po, fagn l fala yen’n. Ama lan daa tie n yaa buam n kaa, lan tien nyan ŋan bua nand nyan. » 37K u guan u ŋuantieb buol g sua k b ji guand i. K u bual Piɛr: « Simɔn, a guand yaa aa ? A g fid g kal g guul’n baa kudyeonŋ uu ? 38Daa guand man gii jaand, g daa baa bignn n. I yam bua, g paalu yen ji pɔd’i. » 39Lann i g Yiesu biɛ guan g sud g gad liig waam, g jaand g maad lanbona nba k u bo kpiɛ g maad nyan. 40G lebd g guan u ŋuantieb buol, g sua k b biɛ guand k b ningbaad kul kpai. B bo g ban ban bu jiin’o yal nba. 41K u guan muntaa po g ji maad’b: « I dua g guand man. I dua g fei man, l ji dagd, youg pund n nyan. B bu kuad Nifosaal Bija mɔlane, biiddanm ń suol’o. 42Fiil man tin gad, yua bu kuad’n baal o.» 43Yiesu daa bo g maad g gbenn mɔno k u ŋuantieb piig yen banle ŋann n ninŋ yend baal, yua k b bo yi’ug Suuda nyan. U bo yeg yen niib bonciɛnn k b diɛ jugi yen lanbana. Yendu Kadaaɔg gbanbanda yen salg-yidkab ciɛnm yen doug n nikpela n bo sun’m. 44Wano nba bo bu kuad Yiesu bo maad niib ŋanm, k u daan gii muad yua nba tankpinn, ban gii ban k ban kpaan yua n nyan. K ban suol’o g ŋanm gii diɛ’ɔg g gad yen’o. 45Suuda n tan pund yaa youg k u nagn Yiesu buol g maad: « Canbaa ! » G muad u tankpinn. 46Lann i g Suuda n bo yeg yen niib nba nyan nagn g suol Yiesu. 47G niib nba bo be yen Yiesu nyan ninŋ yend dad g nɔd jug, g cua g jiɛl salg-yidkab kul ciɛn tuonsunn tubl. 48G Yiesu gaal maam g maad’b: « I baal g bua n suol’n g diɛ jugi yen lanbana nyan n tie bibiɛdg nyan ii ? 49Daal kul n daan tu be yen’i, g tund niib jaanddeciɛɔnŋ n k i g suol’n. Ama l tien nnyan g yal diɛn Yendu Kadaaɔg n, ń tien yen mɔni i. » 50L youg k u ŋuantieb kul san g yad g ŋaa’ɔg. 51L sua g naasen nne ŋua Yiesu g gbab cincenn kua. K b gab g suol’o g dagd yen cincenn. 52K u ŋaa’b yen cincenn g san niiyann g ciɛl. 53B bo gad yen Yiesu salg-yidkab kul ciɛn ŋaag. G salg-yidkab ciɛnm yen doug n nikpela yen Yendu Kadaaɔg gbanbanda taan lieb l buol. 54L bo sua g Piɛr ŋua b puol po g be hal fagm. Wan tan pund k u kua g kal salg-yidkab kul ciɛn lijɔug n, g yie muu yen l buol tuonsunna. 55G salg-yidkab ciɛnm yen Suif‑nba buuddanm ji kpaan niib n bu fa g Yiesu tien yal, k ban fid te k ban kpi’ug, g g la. 56G dugn niib bonciɛnn bo fa faaɔg g jalg Yiesu, ama sua yaa maam bo g taa yen u lua. 57G yenm tan fiil g fa faaɔg g jalg Yiesu g maad: 58« T daan gbad k u maad, k u bu mud jaanddeciɛɔnŋ nba g niib maa yen b nui, g guan g maa liel g gbenn daa ŋantaa k l g tie yen niib nui. » 59L maam po mɔno, b bo g fid g taan mɔb. 60Lann i g salg-yidkab kul ciɛn fiil g sed niib kul siign g bual Yiesu: « A kan jiin siɛl ii ? A g mɔg siɛl g bu maad niib n jalg’a yal po ne ii ? » 61G Yiesu g jiin baa siɛl l po. Lann i g salg-yidkab kul ciɛn biɛ guan g bual’o: « A tie Kristo yaa aa, Yendu nba k t dond’o ne Bija ii ? » 62G Yiesu ŋmiɛn: « Ɛɛn n tie wano i. I tan bu la Nifosaal Bija k u kal Paaciɛnudaan jendu. I biɛ tan bu la’ɔg k u nyiɛ polu po g ji yen tawalgband. » 63L youg g salg-yidkab kul ciɛn dad g pad wano mɔno tiɛd g maad k l g tie ban biɛ ji kpaan sieda‑nba kaa, 64k n tua b gbad wan maad yal g sugd Yendu waa, k b ji mali nle i u po i ? K b kul taan k l dagd yen ban kpi’ug. 65Lann i g yenm ji tu sii mɔsand u po, g pibn u nunŋ po, g kud’o nuukula, g nyaan maad: « Bund g bann yua nba pua’a. » G salg-yidkab kul ciɛn tuonsunna mɔ suol’o g pua pua’ɔg tanpai. 66Piɛr bo kal lijɔug n ninŋ i. G salg-yidkab kul ciɛn tuonsunna n ninŋ, sipaanyend tan baal 67g la Piɛr k u yie muu k u nyuan’o suoo g tan maad: « A mɔ tu be yen l Nasarɛt Yiesu i. » 68G Piɛr nai g maad: « Min g ban, min g gbiɛ a maam ne niimn. » Lann i g Piɛr nyiɛ g kua cugl n, [l youg g kuutounŋ buud.] 69G sipaan ŋann biɛ la’ɔg, g maad niib nba bo be l buol nyan: « U ne tie Yiesu ŋuantua i. » 70G Piɛr biɛ nai. K l yann waam nne, g niib nba bo be l buol nyan maad Piɛr: « Mɔni, a l tie Yiesu ŋuantua i. K l maa a tie Galile jua i. » 71Lann i g Piɛr nai g pol: « Min g ban yin maad jua nba ne. » 72L youg g kuutounŋ buud taal munle po, g Piɛr tiɛd Yiesu n bo maad’o yal: « A bu nai k a g ban’n taal muntaa g kolg daa g buud taal munle po. » Lann i g Piɛr cil g ji buud.

will be added

X\