Mark 12

1L puol po g Yiesu cil g pua’b makpanjam g maad: « Jua nne n bo ŋuun dimɔunŋ tiidi u kpaab n, g pua gɔglug g lind. G gbiil buoug nba k b baa ŋmaad dimɔunŋ tiidi luana g nyanŋ l nyum, g maa defagdug nne g niib tu bu do l po gii guu kpaab. G tug l kpaab g guun tuonsunna, k l tan gii bie ban bɔgd u yal g te’og. Lann i g fiil g gad sɔnu. 2Dimɔunŋ tiidi luana n tan bie yaa youg k u sun u naasen, tuonsunna ŋann buol, k wan gad g gaal u tiidi luana biinu nii. 3G tuonsunna ŋann suol’o, g pua’ɔg bonŋann, g bel’o g g tie’og siɛl. 4K u biɛ sun naasenlua, k b suol u mɔ g pua pua u yul, g sugl sugl’o. 5K u biɛ guan g sun naasenlua b buol, k b suol wano g kpii’ug. G kpaabdaan ŋann biɛ l sun u naasenm bonciɛnn u tuonsunna ŋann buol, k b suol naasenyenm g pua’b, g lieb mɔ k b kpii’b. 6K l tan tenn’o u bija nba k u ŋanm g bua’ɔg kua. K u ji juod g sun’o g maad: “ B daan gii la n bija nuan b bu cɔlm’o. ” 7Ama tuonsunna ŋann n la u bija, k b maad b ŋmiɛl n: “ Yua tan bu di faal n nyan, baal man tin taan g kpi’ug g yend faal. ” 8Lann i k b suol u bija g kpii’ug, g nyan’o kpaab n ninŋ, g lu’ug siɛl po. » 9G Yiesu ji bual’b: « Kpaabdaan ŋann ji bu tien u tuonsunna ŋann nle i ? Kpaabdaan bu gad g biɛn tuonsunna ŋann kul, g tug u kpaab g guun nifanm i. 10I g ban g lii Yendu Kadaaɔg n, naan k b diɛn g maad k nne ii ? “ Tann nba g tanmaala bo yie g lu nyan, lann n tan guan g te dieog fiɛgl tanjal. 11Yonmdaan tuonn n nyan. K t la, k l ŋan t po. ” » 12Yiesu n maad nnyan g gbenn g Suif‑nba yudanm ji kpaan ban bu tien nand g suol’o, g dugn b bo bann k u pua banm i l makpanjam. Ama ban bo jie niwulug nyan, k b ŋaa’ɔg g paan g saa. 13Suif‑nba yudanm n bo bua g Yiesu maam ń guan g suol’o nyan, k b sun Farisiɛn-nba yen Erod cagl yab u buol, 14k b baal g bual’o: « Canbaa, t ban k a tie mamɔnmaad, g maad g g jie sua, g dugn a g nyuan niib nuni po kaa g maad, ama a tund niib g ŋɔnŋ’b yen mɔni Yendu n bua ban gii be nand i. Maad’ti, l cab k tin pa Sesaar lonpo bii, l g cab i ? Tin pa bii tin daa pa i ? » 15G Yiesu bann b maalm g maad’b: « Bɛ po i k i bua n bign’n i ? Tug man dibayenn nii k n diid. » 16K b tug dibayenn g tie’og, k u bual’b: « Ŋmaa ninnaɔnŋ yen ŋmaa sann n be l po i ? » K b yed g Sesaar yal i. 17Lann i g Yiesu maad’b: « Te man Sesaar, yal nba tie Sesaar yal, g te Yendu mɔ yal nba tie Yendu yal. » K l yaa g lid’b yen Yiesu n jiin’m nand. 18Sadusien-nba, (banm nba bo g tuo g kpienm tan bu yied nyan), bo baal Yiesu buol g bual’o: 19« Canbaa, Moyis bo diɛn yiko ne g tie’ti, k l gii tie g nil kuan puo, g kpe g g mɔg big, u ninja ń tug u pekual g mal’o bid. 20To, jab banlile nne bo be g tie ninjann. G ciɛn po kuan puo g kpe g g mɔg big, 21g yua tua u po, tug l pekual g mɔ kpe g g mɔg big, g yua tua u po mɔ k l biɛ tien’o nnyan. 22G saa saa g daan biin l jab banlile, g baa sua g mɔg big yen’o. K l puol po g puo mɔ yuand g kpe. 23To, kpienm yiedu daal, b gii yied kpienm siign, ŋmaa n ji bu yend puo i ? K l maa banm banlile kul kuan’o g la. » 24G Yiesu ŋmiɛn’m: « Yin maad nand ne, i tud sɔnu u. G dugn i g gbiɛ Yendu Kadaaɔg n diɛni niimn, i biɛ g ban Yendu paalu n ja nand. 25Bann man g kpienm yiedu puol po, jab kan kuan puob, puob mɔ kan kun jab. B kul baa be nyan malɛg‑nba nyan i, Yendu ŋaag n. 26G kpienm yiedu po i, i g lii Moyis kadaaɔg n Yendu n bo maad Moyis yal tuntuug nba bo so muu nyan buol ii ? U bo maad’o: “ Min n tie Abraham Yendu yen Isaak Yendu yen Sakɔb Yendu. ” 27Yendu g tie kpienm Yendu kaa u tie fuodb Yendu i. I kpiɛd sɔnu paaa. » 28Yendu Kadaaɔg gbanband nne bo la k b nai yen lieb. Wan gbad g Yiesu ŋanm g jiin’m nyan, k u nagn g bual’o: « Yendu mɔmaam n ninŋ, mɔmalanm po n cie liel‑nba kul i ? » 29G Yiesu ŋmiɛn: « Mɔmaam nba cie liel‑nba kul n ne: “ Israyɛl buolu, i cenŋ, Yonmdaan t Yendu kua n tie Yonmdaan ; 30a baa bua Yonmdaan a Yendu yen a pal kul yen a munn kul yen a maalm kul yen a paalu kul. ” 31Liel nba tua n ne: “ A baa bua a lua nyan a kua nyan. ” Yendu mɔmaam ji g be g cie lann bona ŋanle ne. » 32Lann i g Yendu Kadaaɔg gbanband maad Yiesu: « Canbaa, l ŋan, a maad mɔni i g Yendu tie yeno kua i, sua g be, wano kua i kaa. 33L tie g nil ń gii bua’ɔg yen u pal kul, yen u maalm kul yen u paalu kul g biɛ gii bua u lua nyan u kua nyan. Lann n cie bonkobd nba k b tu kpi g juu g yid Yendu salg yen sali nba be kul. » 34Yiesu n la k u jiin yen yanfuom k u maad’o k u g fag yen Yendu diem. L po n pend, baa sua ji g tuo g bu bual Yiesu buali. 35Yiesu bo gaal maam g tund niib jaanddeciɛɔnŋ n g maad: « L tien nle i g Yendu Kadaaɔg gbanbanda tua g Kristo tie Dafiid yaabuonn i ? 36Foŋanm paalu bo te k wano Dafiid mɔno maad Kristo po k nne: “ Yonmdaan Yendu maad n Yonmdaan: Kal n nuujendu, saa yen youg nba k n tan bu te a ninnanda kul ń gbaan a nintual n. ” 37Dafiid mɔno gii yi Kristo k u Yonmdaan, l bu tien nle i u Yonmdaan ń biɛ guan gii tie u yaabuonn i ? » Niwulug nba bo be l buol bo cenŋ Yiesu maam yen pamann. 38Yiesu bo tund niib g maad: « Suol man i kua yen Yendu Kadaaɔg gbanbanda. Banm n bua ban tu liɛ liɛdfagd gii waa, g biɛ bua k b tu gii baal naan niib n ninŋ, niib ń gii fuond’b. 39G bua ban gii kaal liig kinkaani po tintaann died n yen jaanm n be naan kul. 40Banm n fe pekɔa ŋalman kul, g tu jaand lan wai bonciɛnn g niib ń la’b. Lann n te g buud daal Yendu bu ŋanm g dad b tubl lan gbad’b. » 41Yiesu bo kal g kpiɛ ban kpiend ligli naan g nyuan niib k b baad g kpiend ligli. G ligdanm bonciɛnn baal g kpien ligli k l yab. 42G pekɔtalg nne mɔ tan baal g kpien dibala ŋanle nba g mɔg fuom. 43Lann i g Yiesu te k u ŋuantieb nagn u buol k u maad’b: « Yen mɔni n maad’i, pekɔtalg ne n kpien ligli nba yab g cie nil kul n kpien yal. 44G dugn b kul kpien ligli nba kan wad b mɔgm i. Ama pekual ne nuan tond wan mɔg yal g baa di kul n nyan g baal g kpien. »

will be added

X\