Mark 11

1Yiesu yen u ŋuantieb bo nag dobid nne k b yi Bɛtfaase yen Betani g ji g fag yen Serusalɛm. L dobid bo kpiɛ Oliif tiidi jual i. G Yiesu sun u ŋuantieb n ninŋ banle, 2g maad’b: « Gad man doug nba be liig ne. I daan gii pund l doug n, i bu la g bonbig daag, g baa sua g ban g jag’o, yin dagd’o g guan yen’o nii. 3Nil daan gii bual’i g laabaal k i dagd bonbig i ? Yin maad’o g Yonmdaan n bua, k u bu ŋmiɛn mɔlane mɔno. » 4K u ŋuantieb gad g daan la g bonbig daag sɔnkunŋ g kpiɛ yen dimɔb. K b dagd’o. 5L sua g niib nne be l buol, g yenm bual’b g laabaal k b dagd l bonbig i ? 6K b ŋmiɛn’m nyan Yiesu n bo maad nand nyan, k b cab’b, k b lebd yenn. 7Ban pund yen l bonbig Yiesu buol, k u ŋuantieb land b tiɛd g maan l bonŋ po, g Yiesu jag. 8G niib bonciɛnn land b tiɛd g lad sɔnu po, g lieb kua kpaand n ninŋ g pad pad bendbid yen faad g mɔ lad sɔnu po. 9G niib nba bo be u liig yen yab bo ŋua u puol po ji yign g maad: « Osaana ! Yua baad Yonmdaan sann po, Yendu ń yad u yedŋanm u po ! 10Yendu ń yad u yedŋanm t baa Dafiid bal nba baad ne po ! Osaana, Yendu sann ń do hal polu po ! » 11Lann i g Yiesu pund Serusalɛm doug n, g gad g kua jaanddeciɛɔnŋ n. Wan diid bona nba kul tie l n ninŋ g gbenn, l sua g youg pend o, k wano yen u ŋuantieb piig yen banle ŋann gad Betani doug n. 12L fann g Yiesu yen u ŋuantieb nya Betani doug n, g kom suol Yiesu. 13K u la g kinkanŋ sie fagm g mɔg faad. Lann i g Yiesu saa kinkanŋ buol, g mali k u daan bu la kinkana l po i. Ama wan tan pund kinkanŋ buol, u la faad kua i l po. G dugn l bo g tie kinkana youg. 14Lann i g Yiesu maad l kinkanŋ: « Baa sua ń ji daa ban g mua a yaa luana. » K u ŋuantieb gbad wan maad yal. 15Yiesu yen u ŋuantieb bo pund Serusalɛm g Yiesu kua jaanddeciɛɔnŋ n, g bel g yaan yab bo kuad yen yab bo daa bona l ninŋ kul, g tud yab nba bo cend ligli tieba yen yab kuad lanjeli kogi g lu lu. 16G yie g niib ń daa tugd tuga g pend yenn jaanddeciɛɔnŋ lijɔug n. 17G tund’b g maad: « L diɛn Yendu Kadaaɔg n g maad: “ N ŋaag ne baa tie jaandi ŋaag i, ŋanduna yab kul po. ” K yinm yen ji tug g tien naayiga tintaanbuol. » 18Salg-yidkab ciɛnm yen Yendu Kadaaɔg gbanbanda n gbad nnyan, k b ji kpaan ban bu tien nand g kpi’ug, g dugn b bo jie’og, k l maa u tundl bo manŋ niib pala bonciɛnn. 19Daajuoug n tan baal, g Yiesu yen u ŋuantieb nyiɛ l doug n. 20L fann siŋaaɔg n, g Yiesu yen u ŋuantieb pend g la g kinkanŋ ŋann kuol yen u jiina kul. 21G Piɛr tiɛd yal nba won tien, g maad Yiesu: « Canbaa diid, ŋan won luul kinkanŋ nba mɔtonn nyan kuol o. » 22G Yiesu gaal maam g maad’b: « I dug man Yendu po. 23Yen mɔni n maad’i, nil gii maad jual ne, k wan figd g daan baa mɔgl n, g g mali munle-le, g yen daan k wan maad yal bu tien, u kon bu la, lan tien yen mɔni. 24L po n te k n maad’i, i gii jaand g miɛl Yendu yal nba kul, yin gii daan k i la u, Yendu bu te’i yin miɛl yal nba. 25G youg nba k i sie g jaand mɔ, g tiɛd k i mɔg maam yen nil, yin di sugl l daan po, k i Baa nba be polu po ń mɔ ń fid g di sugl i biid po. [ 26Ama l gii tie k i g di sugl i lieb po, i Baa nba be polu po mɔ kan di sugl i biid po.] » 27Yiesu yen u ŋuantieb bo guan g lebd Serusalɛm. G Yiesu tan waa g gɔd jaanddeciɛɔnŋ n, g salg-yidkab ciɛnm yen Yendu Kadaaɔg gbanbanda yen Suif‑nba nikpela nagn u buol, 28g bual’o: « A diɛ yikod lann i g suun tuona nba ne ii ? Ŋmaa n cab’a yikod k a gii suun l tuona i ? » 29G Yiesu ŋmiɛn’m: « N mɔg bonyenn kua i g mɔ bu bual’i. I gii guan g jiin’n, n mɔ bu maad’i yua nba cab’n yikod k n diɛ g suun l tuona. 30Maad man’n, ŋmaa n bo cab San Nyunwultua k u wuul niib nyum i ? Yendu bii niib i ? » 31K b maad maad b ŋmiɛl n k nne: « T gii yed g Yendu u, u bu bual’ti g laabaal k t bo g tuo g gaal San maam i ? 32T biɛ kan fid g yed g niib mɔ. » (B bo jie niwulug g dugn niib kul bo ban g San Nyunwultua tie Yendu sogni yen mɔni.) 33Lann i k b maad Yiesu: « T g ban. » G Yiesu maad’b: « N mɔ kan maad’i yua cab’n l yikod k n suun l tuona. »

will be added

X\