Mark 10

1Yiesu bo fiil l buol, g tɔgn Suurdɛn bɔnpuol po g gad Suude tinŋ n ninŋ. G niwulug yaan tigl u buol k u tund’b nyan wan tu tund’b nand nyan. 2G Farisiɛn-nba baal u buol g bua ban bign’o g bual’o k l cab g nil ń nyan u ŋaapuo oo ? 3K u mɔ guan g bual’b: « Moyis bo diɛn g maad’i k yin gii tie nle i ? » 4K b jiin’o: « Moyis bo cab g nil gii bua n nyan u ŋaapuo, wan diɛn kadaaɔg nba ŋɔnŋ k u nyan’o g te’og g fid g nyan’o. » 5G Yiesu maad’b: « I kangbadm po n te g Moyis bo diɛn l yiko i po. 6Cilg youg Yendu n bo tag ŋanduna, u bo tag jua yen puo i. 7L po n te g jua tu bu nya g ŋaa u naa yen u baa, 8wano yen u puo ń taan g te gbannanyend kua. Nnyan b ji g tie niib banle kaa, b ji tie niyend i. 9Lann, nifosaal ń daa paad Yendu n taan yal. » 10Ban tan kun ŋaag, k u ŋuantieb guan g bual’o l maam po. 11K u maad’b: « Nil gii nyan u ŋaapuo, g guan g kuan puolua, u tien cunconm n nyan puo nba k u nyan’o nyan po. 12G puo nba mɔ gii nyiɛ g ŋaa u sal, g gad g kun jafan, u mɔ tien cunconm n nyan. » 13Niib bo baal yen bid Yiesu buol k wan sii’b. G Yiesu ŋuantieb fu yen l niib. 14Yiesu n la nnyan, k u pal bie u ŋuantieb po k u maad: « Ŋaa man g bid ń baal n buol, daa biel’b man, g dugn yab nba tie nyan banm nyan, Yendu diem tie b yal i. 15Yen mɔni, n maad’i, yua g tuo g gaal Yendu bal nyan big nyan, u kan kua u diem n ninŋ. » 16Lann i g lɔn lɔn bid, g maan nui b po g yad yedŋanm b po. 17Yiesu bo nyiɛ g tug sɔnu g saa nne i, g jua nne san san g baal g baa g gbaan u nintual n ninŋ g bual’o: « Canbaa, fin nba mɔn, n bu tien bɛ i g tan la miɛl nba kan ban g gbenn i ? » 18G Yiesu maad’o: « Laabaal k a yed k n mɔn i ? Baa sua g mɔn, Yendu kua i kaa. 19A yen ban Yendu mɔmaam ne: “ A kan kpi nil, a kan conm, a kan jan, a kan kun mɔnkunninkpind, a kan bɔnd g di a lua, cɔln a baa yen a naa. ” » 20K l jua maad’o: « Canbaa, n cil g cɔln l kul ne g daa tie naasenbig i. » 21Lann i g Yiesu diid l jua k u pal siɛd u po k u maad’o: « Bonyenn kua n pɔd’a, kun g daan kuad ŋan mɔg yal nba kul, g tug l ligli g biid tali, nnyan i k a bu la mɔgm Yendu ŋaag n. A gii tien nnyan ŋan baal gii ŋua’n. » 22Ama l jua n gbad l maam, k u nunŋ po biil k u paan g saa yen pabɔnn, g dugn u bo mɔg ŋalman bonciɛnn. 23Lann i g Yiesu nyuand u ŋuantieb, g maad k l paa yen yab mɔg ŋalman ń kua Yendu diem n. 24K l maam yaa g lid u ŋuantieb. G Yiesu biɛ guan g maad’b: « N bid, l baa paa yen nil ń kua Yendu diem n. 25Lan paa yuoyuoug po nand k u kan fid g kua kpalpienu bonn n nyan, ŋalmandaan gii bua n kua Yendu diem n, l baa paa u po g cie nnyan. » 26K l ŋanm g yaa g lid u ŋuantieb, k b ji bual bual b ŋmiɛl n, k l gii tie nnyan ŋmaa n bu fid g la fielu i ? 27G Yiesu nyuan’m suoo g tan maad: « Lann paa nifosaal po i ama l g paa Yendu po, g dugn siɛl g be g paa yen Yendu. » 28Lann i g Piɛr maad’o: « Diid a, tinm nba ji ŋaa tin mɔg yal kul g ji ŋua’a ne ii ? » 29G Yiesu maad’o: « Yen mɔni, n maad’i, nil gii yaad g ŋaa u ŋaag lann i kaa u ninjanm lann i kaa u niipuob lann i kaa u naa lann i kaa u baa lann i kaa u bid lann i kaa u kpaand, k l tie min yaa po yen Laabamann po, 30l daan bu la nyuad taal kobg tinŋ po ne: ŋai yen ninjanm yen niipuob yen naa‑nba yen bid yen kpaand. Ama fala mɔ baa be. G youg nba baad mɔ, u bu la miɛl nba kan ban g gbenn. 31Yab nba gaal liig mɔlane, bonciɛnn tan bu juod. Yab juod mɔ, bonciɛnn tan bu gaal liig. » 32Yiesu yen yab bo ŋua’ɔg nyan bo paa sɔnu, g do Serusalɛm, g Yiesu be b liig, k b yam pu. Jiwaani bo kua yab bo ŋua’ɔg nyan. G Yiesu yaan biɛ yiin u ŋuantieb piig yen banle k b baal u buol, k u maad’b yal nba bu baal’o: 33« I la ii, t do Serusalɛm n nyan. B bu kuad Nifosaal Bija, salg-yidkab ciɛnm yen Yendu Kadaaɔg gbanbanda ń suol’o, g bu’ug, g jiɛl u buud k l tie k ban kpi’ug. B bu tug’o g cab buolfanu yab, 34ban laa laa’ɔg, g sii mɔsand u po, g pua’ɔg yen naapuna, g kpi’ug, g daa ŋantaa daal, wan yied. » 35Sebede bid Saak yen San bo nagn Yiesu buol g maad’o: « Canbaa, t bua k a tuo g tien t po tin bu miɛl’a yal. » 36G Yiesu bual’b: « I bua min tien bɛ i, i po i ? » 37K b maad’o: « T bua k a tan gii kal a yudand badkog po, ŋan te g yend ń kal a nuujendu, g lua ń kal a nuuganŋ. » 38G Yiesu maad’b: « I g ban yin miɛd yal. I bu fid g tuo g gaal fala nba k n bu gaal ne ii ? Bii i bu fid g kua cicagm nba ninŋ k n bu kua ne i ? » 39K b yed k b bu fid. G Yiesu ŋmiɛn’m: « L tie mɔni k i bu gaal fala nba k n bu gaal ne, g biɛ kua cicagm nba ninŋ k n bu kua ne. 40Ama yal tie n nuujendu po kinkaanu lann i kaa n nuuganŋ po kinkaanu nuan, l kan nya n po kaa. L kinkaani mɔg ban bobn yab nba po i.» 41Yiesu ŋuantieb piig nba bo tenn nyan n gbad l maam, k b pala biil Saak yen San po. 42Lann i g Yiesu yiin’m g maad’b: « I ban k yin diɛ g yab tie dougdanm nyan ŋɔnŋ niib b yikod, g paalu n be yab nuu n mɔ ŋɔnŋ niib b paalu. 43Lan daa tie nnyan i yaa siign. Yua nba bua wan te i kul ne ciɛn, wan gii tie i tuonsunn. 44Yua nba bua wan gii tie i kul ne liig yua, wan gii tie i yonm. 45G dugn Nifosaal Bija g baal k wan gii kal g niib suun u po kaa, u baal k wan gii suun niib po i, g biɛ yid u miɛl salg g fiel niib bonciɛnn.» 46Yiesu yen u ŋuantieb bo pund Seriko doug n. Ban tan nya l doug n yaa youg nba, g niib bonciɛnn ŋuan’m. L sua g juan nne kal sɔnkunŋ g miɛd. L juan bo tie Time bija i, k b yi’ug Bartime. 47Wan gbad g Nasarɛt Yiesu n pend, k u yign g maad: « Dafiid Bija Yiesu, a kan jie’n ninbaaɔg uu ? » 48G niib bonciɛnn gaal jad u po, k wan suon. Bo ! K u ŋanm g yign yen paalu: « Dafiid Bija, jie’n ninbaaɔg a. » 49Lann i g Yiesu sed g maad k ban yiin’o nii. K b yiin’o, g maad k wan paan u pal g fiil g baal, g Yiesu yi’ug. 50K u feg g lu u gaalug, g kud g fiil g gad Yiesu buol. 51G Yiesu bual’o k u bua wan tien bɛ i u po i ? K u ŋmiɛn: « Canbaa ! N bua k ŋan te k n nyuand i. » 52G Yiesu maad’o: « I saa, a paag n nyan g dugn a dug n po. » L youg mɔno g juan ninbina luod k u nyuand, g mɔ ji ŋua Yiesu.

will be added

X\