Mark 1

1Yendu Bija Yiesu Kristo Laabamann cilg. 2L bo diɛn Yendu sogni Esaayi kadaaɔg n g maad: « N bu sun n tond wan gaal liig g ŋanm a sɔnu. 3Nil kpaand tinkuonŋ n ninŋ g maad: “ Ŋanm man Yonmdaan sɔnu, sond man u sɔni. ” » 4Lann i g San Nyunwultua baal g be tinkuonŋ n ninŋ, g muand niib k ban wul nyum, g ŋaa b tuonbiid g lebd b binbem, g Yendu ń piin b biid. 5G Suude yab yen Serusalɛm niib kul baad u buol, g maad niib kul nunŋ n b biid k u wuul’b nyum Suurdɛn bɔnŋ n. 6Wano San bo liɛ liɛdl nne k b lug yen yuoyuoug kobd, g lol gbanmɔunŋ gbann siɛg n. Lankpand yen siid n bo tie u jied. 7U bo maad niib g tua: « Yua bu baal n puol po mɔg paalu g cie’n. N g dagd yen min gbaan u nintual n, g lod u taacagbani. 8Min wuul’i yen nyum i ama wano tan bu tug Foŋanm i g wul’i. » 9L dana n ninŋ g Yiesu nyiɛ Nasarɛt, Galile doug n, g baal g San wul’o nyum Suurdɛn bɔnŋ n. 10Yiesu n nya nyum n yaa youg, u la g polu po luod, g Foŋanm jiid u po nyan lanjelg nyan. 11G niɛlu nne nyiɛ polu po g maad: « A tie n bija i, n pal kɔn a po bonciɛnn. N tug n buam kul g tien a ninŋ. » 12L po n pend g Foŋanm tud Yiesu k u gad tinkuonŋ n ninŋ, 13g tien daa piinna, g Sitaan bignd’o. U bo be yen muaɔg n bonkobd i, g malɛg‑nba tie wan bua yal. 14B bo suol San g luon’o. L puol po i g Yiesu gad Galile doug n g daan muand Yendu Laabamann, 15g tua: « Youg pund o, Yendu bal nag o. Ŋaa man i tuonbiid g lebd i binbem, g tuo g gaal Laabamann. » 16G Yiesu tan pend Galile mɔgl kunŋ, g la Simɔn yen u ninja Andre k b lunn janbaaɔnŋ mɔgl n. B bo tie jansuola i. 17G Yiesu maad’b: « I ŋua’n man, n bu te yin ŋaa jansuolu g ji gii taand niib i, ban gii ŋua’n. » 18L youg mɔno k b ŋaa b janbaaɔnŋ g ji ŋua’ɔg. 19K u sud waam g gad liig, g la Sebede bid, lan tie Saak yen u ninja San, k b be ŋadunŋ n g ŋami b janbaand. 20G Yiesu yiin’m k ban gii ŋua’ɔg. K b ŋaa b baa ŋadunŋ n yen tuonsunna g ŋuan’o. 21Yiesu yen u ŋuantieb bo kua Kafarnawunm doug n. G Saaba daal g Yiesu kua Suif‑nba tintaann dieog n, g tund niib Yendu maam. 22Yab bo be l buol g cenŋ, l bo yaa g lid’b, g dugn Yiesu bo g tund’b nyan Yendu Kadaaɔg gbanbanda nyan kaa, u bo diɛ u yul po yikod i g tund’b. 23L sua g jua nne be l buol g sanpola ŋua’ɔg, k u tand yen paalu g maad: 24« Nasarɛt Yiesu, tinm yen fin bɛ po i ? A baal k a biɛn’ti yaa aa ? N ban ŋan tie yua. Fin n tie niŋan nba g Yendu sun. » 25G Yiesu gaal jad b po g maad: « Suon man l buol ! Yaad man g ŋaa jua ne. » 26G sanpola nyɔg nyɔg l jua yen paalu g yign bag bag g yaad g ŋaa’ɔg. 27G jiwaani kua yab nba bo be l buol nyan kul, k b ji maad maad yen b lieb g tua: « Ne mɔ tie bɛ n ne i ? Tundpaann i k u tund yen yikod ! U te g yen sanpola mɔno cɔln u maam. » 28L youg mɔno g Yiesu sann duo Galile doug n kul. 29Ban nyiɛ Suif‑nba tintaann dieog n ninŋ yaa youg, g Yiesu yen Saak yen San gad Simɔn yen Andre‑nba ŋaag. 30L sua g Simɔn ŋaapuo naa dua yen gbannantounŋ. L youg k b maad Yiesu l puo gbannantounŋ maam. 31G Yiesu gad g suol u nuu g fiin’o, k u gbanu sɔnŋ, k u fiil g cand’b. 32Daajuoug n tan pund g yendu baa yaa youg, g niib tug yiɛnm kul yen yab g sanpola ŋua’b g baal yen’m Yiesu buol. 33G doug n niib kul tigl g be dimɔb buol. 34G Yiesu paag niib nba bo yiɛl yiɛlbuoli kul, g biɛ bel g yaan sanpola bonciɛnn. U bo g cab sanpola k ban maad mɔno, g dugn b bo ban wan tie yua nba. 35L fann siŋapanpan g Yiesu tuod g fiil k l daa bɔn, g gad naan nba g sua g be, g jaand. 36G Simɔn yen u lieb waa g kpaan’o 37g tan la’ɔg, g maad’o g niib kul kpaan’o. 38K u maad’b: « Sonm man tin gad siɛl po, dingbankunkogi n k min daan muand l po mɔ, g dugn l po n te k n baal ne. » 39Lann i g Yiesu tɔgn Galile dingbana kul n ninŋ, g muand Laabamann Suif‑nba tintaann died n, g biɛ biel g yaand sanpola. 40G gbaadl nne tan baal Yiesu buol, g baa g gbaan u nintual n, g maad: « A gii bua, a bu fid g paag’n. » 41G ninbaaɔg suol Yiesu, k u tand nuu g sii’ug g maad: « N bua, paag ! » 42L youg mɔno k u gbaadm gbenn, k u paag. 43G Yiesu maad k wan tuod g yaad l buol, g kpaa’ɔg 44g maad: « Suol a mɔb g daa ŋaa sua ń gbad. Ama, gad g salg-yidkua ń la’a, k a te’og salg nba g Moyis bo maad g gbaadl gii paag wan te nyan, k lan ŋɔn k a paag. » 45Ama l jua n nyiɛ yaa youg, k u kpaand l maam naan kul. L po n te g Yiesu ji bo kan fid g kua doug n ninŋ yaa youg nba g niib bu la’ɔg. U bo tu be doug kunŋ i, naan buol g ŋai g be. G niib nya naan kul g baad u buol.

will be added

X\