Luk 9

1Yiesu bo taan u ŋuantieb piig yen banle, g tie’b paalu yen yikod, k ban gii biel sanpola kul, g biɛ gii paagd yiɛnm. 2Lann i g sun’m k ban gii muand Yendu bal maam, gii paagd yiɛnm. 3G biɛ maad’b: « I gii saa, yin daa tugd siɛl. I daa kub man lanbann g bual kɔl, g daa kub jied g bual ligli, g baa sua ń biɛ daa kub liɛdliel. 4I gii can ŋaag nba ninŋ, yin gii be l buol saa yen yin tan bu yaad l buol. 5Ama yab nba g gaal’i, yin nya b doug n ninŋ, g pid pid i titala po tangulunŋ k lan ŋɔn’m k l la banm i. » 6K u ŋuantieb ji waa g tuan dingbana. Naan buol kul b bo muand Laabamann, g biɛ paagd yiɛnm. 7Galile bad Erod bo gbad yal nba kul bo tiend k u yam ŋmad. K l maa yenm bo maad g San n yied kpienm siign. 8G lieb mɔ tua k Eli n guan. Lieb mɔ, g yaa youg po Yendu sogni‑nba ninŋ yend n yied. 9Ama k Erod maad k nne: « L gii tie San i yaa, min mɔno n te k b jagd u yul. K u ne yen ji tie ŋmaa i, k n gbiɛ k b maad k u tie bona ne kul i ? » K u ji kpaan k wan la’ɔg. 10Yiesu sundi n yaan tan guan yaa youg, k b dugn’o ban tien yal nba. K u tug’b g piɛd yen’m siɛl buol, k l kpiɛ yen doug nba k b yi Bɛtsayida nyan. 11Ama g niib bann g ŋuan’o l po. K u gaal’b g ŋɔnŋ’b Yendu bal maam, g paagd yab nba bo kpaan laafiɛ. 12Daajuoug n yaan tan baal, k u ŋuantieb piig yen banle ŋann nagn u buol, g maad’o: « Te g niib ń gad dingbankunkogi n yen dobid n ninŋ, g la jied yen dunduanbuol. K l maa tin be naan ne tie muaɔg n i, nyiɛnn g kɔb ne. » 13K u maad’b: « Yinm mɔno ń te’b jied k ban di. » K b ŋmiɛn’o: « Tin mɔg yal g cie kpanu ŋanmu yen jani yinle, daa bii, t bu gad g daa jied g te niib nba be ne kul i ? » 14K l maa jab nba bo be l buol bo g luol tuda ŋanmu. K u maad u ŋuantieb: « Te man k ban kal cagl kul jab piinmu. » 15K b te k b kul kal nnyan. 16G Yiesu gaal l kpanu ŋanmu yen l jani yinle, g yaad g diid polu po, g tien Yendu balg, g jend jend, g tie u ŋuantieb k ban biid niib. 17K b kul ŋman g guo. K b taan taan bonjena nba tenn, g gbien kpancubd piig yen ŋanle. 18Diyenn Yiesu bo piɛd g jaand, k u ŋuantieb be yen’o. K u tan bual’b: « Niib tua k n tie ŋmaa i ? » 19K b ŋmiɛn’o: « Yenm tua k a tie San Nyunwultua, g lieb mɔ k Eli, g lieb mɔ biɛg, g yaa youg po Yendu sogni‑nba ninŋ yend n yied. » 20K u bual’b: « K yinm i, i mali k n tie ŋmaa i ? » G Piɛr gaal maam g maad: « A tie Kristo i, yua nba g Yendu sun’o. » 21K u ŋanm g kpaa’b k ban daa ŋaa g sua ń gbad. 22G biɛ maad k l bual g Nifosaal Bija ń la fala bonciɛnn, g doug n nikpela yen Yendu salg-yidkab ciɛnm yen Yendu Kadaaɔg gbanbanda ń yie’og, k ban kpi’ug, k wan yied daa ŋantaa daal. 23Lann i g ji maad niib kul k nne: « Yua nba bua wan ŋuan’n, wan sunn u kua po, g bug u dapunpɔnn daal kul gii ŋua’n. 24Yua nba bua wan fiel u miɛl, u bu buon l miɛl. Ama yua nba bu lu u miɛl g dugn n po, u bu la miɛl. 25Nil gii mɔg ŋanduna bona kul g yen buon u kua lann i kaa g buon u miɛl, n liɛ l nyuad i ? . 26B gii taan n sann, g muand n Laabamann k l mɔg yua nba fai, Nifosaal Bija mɔ tan bu yie’og youg nba k u tan bu guan yen u yudand yen u Baa yudand yen malɛg‑nba yudand. 27Yen mɔni n maad’i, Yendu bal bu baal g sua k yinm nba ne, g siɛb daa g kpe. » 28Yiesu n yaan maad l maam g gbenn, k l tien nyan daa ŋanniin nyan, k u tug Piɛr yen Saak yen San, g duo jual po, k wan jaand. 29Wan jaand youg nba, k u nunŋ lebd, k u tiɛd penn g nyili, g tuud. 30K b la g jab banle pag yen’o, lann n tie Moyis yen Eli. 31B mɔ bo nyili g tuud, g maad Yiesu n bu kpe Serusalɛm nand g tien Yendu buam. 32Guam bo kpii Piɛr yen u yegni, ama k b tan nyuand g la Yiesu k u nyili g tuud, yen jab banle nba bo sie u buol. 33Youg nba k l jab bo bua n yaad g ŋaa Yiesu, g Piɛr maad’o: « Canbaa, l ŋan yen tin gii be ne. T bu pua jond tintaa. Yenn ń gii tie a yal, g liel ń gii tie Moyis yal, g liel mɔ ń gii tie Eli yal. » U bo g ban wan maad yal nba. 34Wan yaan maad youg nba, g tawalgbaɔnŋ jiid nyan ŋunn nyan g libn b po, g jiwaani suol wano yen Saak yen San youg nba k l libn b po. 35G niɛlu nne nyiɛ l tawalgbaɔnŋ n ninŋ g maad: « U ne tie n Bija i, k n lugd’o. I cenŋ man u maam. » 36Niɛlu n yaan maad g gbenn, l sua g Yiesu ji be u kukua i. K b suol b kua g g maad sua l dana n ninŋ ban yaan la yal nba. 37Lan fann g Yiesu yen u ŋuantieb bantaa nyiɛ jual po g jiid, g niib bonciɛnn tuog’o. 38G jua nne yign niib siign g maad: « Canbaa, n miɛd’a k a nyuand n bija n ninŋ, n mɔg wano kua i. 39G sanpola ŋua’ɔg, k u tu tan yign ban fuun g lu’ug, g mɔsankpinkpaaɔnŋ cuud. B tan gii cɔg’o, ban gbal g ŋaa’ɔg. 40N miɛl a ŋuantieb k ban bel’b, k b gbal. » 41G Yiesu maad: « Yinm nibiid buolu ne, i g mɔg dindann baa waam nne ! N biɛ baa be yen’i saa yen bɛ youg u g di sugl i po i ? Baal yen a big nii. » 42Big n yaan nagd youg nba, g sanpola fuun’o g lu’ug tinŋ n ninŋ k u dua g tabd. G Yiesu tiɛn sanpola po, g paag l big g ŋmiɛn’o u baa. 43K l yaa g lid b kul, k b maad g Yendu mɔg paalu. Lan daa bo yaa g lid niib yen Yiesu n tie bonŋana nba kul, k u maad u ŋuantieb: 44« I ŋanm g cenŋ man maam nba ne: B bu kuad Nifosaal Bija g niib ń suol’o. » 45Ama b bo g gbad l maam niimn. L bo duag b po, k ban daa fid g gbad l niimn i, k b yen ji jie yen ban bual’o. 46Yiesu ŋuantieb bo nai yen lieb g kpaan k ban bann yua nba baa tie ciɛn b siign. 47Yiesu n yaan bann ban mali yal b pala n ninŋ nyan, k u tug big g sen’o u buol, g maad’b: 48« Yua nba gaal big ne n sann po, u gaal min i. Yua nba gaal’n mɔ, u gaal yua nba sun’n i. K l maa yua nba tie talg i siign ninŋ, wano n tie ciɛn. » 49G San gaal maam g maad: « Canbaa, t la jua nne k u biel sanpola a sann po, k t bel’o k wan daa tie nnyan, k l maa u g yegd yen’ti. » 50Ama g Yiesu maad: « Daa biel’o man. Yua nba g kɔn yen’i, u taa i po i. » 51Youg nba g Yiesu bo bu do polu po n yaan bo nagd, k u yed k u bu l gad Serusalɛm i, 52g sun tondi u liig po. K b paan sɔnu g kua Samari doyenu n ninŋ k ban bobn g gaal’o. 53Ama k l doug n niib g tuo g bu gaal’o, k l maa u bo tuol Serusalɛm po. 54U ŋuantieb Saak yen San n yaan la nnyan, k b maad’o: « Yonmdaan, a bua k t te g muu ń nya polu po, g baa g di b kul ii ? » 55G Yiesu ŋmagd b po g fu yen’m. 56K b tuad dingbanliel n ninŋ. 57Ban daa bo paa sɔnu po nyan, g nil nne maad’o: « N baa ŋua’a ŋan saa naan kul. » 58G Yiesu maad’o: « Nantantoba mɔg fali, g nuani mɔg tedd, Nifosaal Bija nuan yen g mɔg wan bu kpagn yul naan g fuod. » 59K u maad lua mɔ: « I ŋua’n. » K l nil maad: « Cab’n k n daa kun g daan pii n baa o. » 60Ama k u maad’o: « Ŋaa g kpienm ń gii pii b kpienm. Fin nuan ń gii saa g daan muand Yendu bal maam. » 61G lua mɔ maad’o: « Yonmdaan, n baa ŋua’a, ama yen daa ŋaa k n kun g daan cab n ŋaag yab o. » 62G Yiesu maad’o: « Yua nba ko yen naakuul, g yen gbegd puol po, l daan g dagd yen wan sun Yendu diem n tuonn. »

will be added

X\