Luk 8

1L po n pend, g Yiesu saa doi n ninŋ yen dingbankunkogi n ninŋ, g muand g biɛ ŋɔnŋ niib Yendu bal Laabamann. U ŋuantieb piig yen banle bo be yen’o. 2Puob nne mɔ bo be, k u bo bel g yaan sanpola nba bo ŋua’b g lieb mɔ yiɛl k u paag’b. L puob n ninŋ, yeno bo be k b yi’ug Magdala Mari, g sanpola banlile bo ŋua’ɔg g Yiesu bel g yaan’m. 3G lua mɔ be k b yi’ug Sann, u bo tie Kusa ŋaapuo i. Wano Kusa n bo nyuan Erod ŋalman. Susann yen puolieb bonciɛnn mɔ bo be. L puob n bo tugd b ŋalman, g tod Yiesu yen u ŋuantieb. 4Niib bonciɛnn bo nyiɛ doi kul n ninŋ, g tigl Yiesu buol, k u pua’b makpanjam g maad: 5« Tanbuul nne bo nyiɛ g bua n pag bonbuoli. Wan pagn yaa youg, g binyena baa sɔnkunŋ, g niib ŋmaa l po. G bonyugda dii l kul. 6G liel‑nba baa tantiɛli po, g piɛ g yen kuol, k l maa sɔnŋl bo g be. 7G liel‑nba mɔ baa kunkoni n ninŋ, g piɛ, k l kul taan g fiil, g kunkoni fun g luon l po. 8G liel‑nba baa tinŋ n ŋan naan, g piɛ, g nan bim kobg kobg. » G Yiesu biɛ tand g maad: « Yua nba mɔg tuba g bu gbad, wan gbad. » 9K u ŋuantieb bual’o l makpanjam niimn. 10K u maad’b: « Yendu cab yinm i k yin bann u bal ŋasiil. Ama lieb nuan, l baa tie makpanjam i b po, k ban gii nyuan g yen daa laad, g biɛ gii cenŋ g yen daa gbad siɛl. 11L makpanjam niimn tie k nne i: Bonbulkal tie Yendu maam. 12Bim nba baa sɔnkunŋ tie yab nba cenŋ Yendu maam, ama g Sitaan baal g nyan l maam b pala n ninŋ, k ban daa gaal g la fielu. 13Yal nba baa tantiɛli po tie yab nba cenŋ l maam, g gaal yen pamann, k l yen kan kaln b pala n ninŋ. B tie niib nba g mɔg juunn i ; bignn gii baal’b, ban nɔd nui. 14Yal nba baa kunkoni n ninŋ tie yab nba cenŋ Yendu maam, ama g maalm yen ŋalman yen ŋanduna n ninŋ ne manu kul te k b kan fid g kped g nan bim. 15Yal nba baa tinŋ n ŋan naan tie yab nba cenŋ l maam g gaal yen papienn, g bil b pala n ninŋ, g mind g lon luana. » 16« Sua g sonŋ fidl g cibnd bobl n, lann i kaa g kubnd gadoug yagma n ninŋ. Ama b tu tuan’o naan buol nba, g yab kua ŋaag n ninŋ bu fid g la yinyiem i. 17G dugn siɛl g be g wuo, g tan kan wuod. Siɛl mɔ biɛ g be g tie ŋasiil g niib tan kan bann dindaanyenn. 18Lann, suol man i kua yen yin cenŋ nand. K l maa, yua nba mɔg, b tan bu pugn wano i. G yua nba g mɔg mɔ, ban fiel baa yal nba k u mali k l tie u yal. » 19Yiesu ninjanm yen u naa bo baal k ban la’ɔg, g yen g fid g nagn’o, k l maa niib bo yabd. 20K b maad’o: « A naa yen a ninjanm sie cincann, g bua k ban la’a. » 21K u ŋmiɛn’m g maad: « N naa yen n ninjanm tie yab nba cenŋ Yendu maam, g biɛ cɔln g tie lan bual nand i. » 22Diyenn g Yiesu kua ŋadunŋ n ninŋ yen u ŋuantieb, g maad’b: « T puod man mɔgl, g gad bɔngbanliel po. » 23Ban kud ŋadunŋ g saa, g guam tan suol Yiesu, k u guan. G faalu kpid mɔgl po yen paalu, g nyum kua kua ŋadunŋ n ninŋ, k b ji bua n biɛl. 24Lann i k b nagn Yiesu buol, g find’o, g maad: « Canbaa, canbaa, t kpe n nyan. » Yiesu n yaan find, k u tiɛn faalu yen nyunguona po. K l kul te silb. 25K u maad’b: « I dindann be lɛ i ? » G jiwaani kua’b, k l yaa g lid’b, k b maad b kua ninŋ: « U ne tie ŋmaa i, g niind faalu yen nyum mɔno, k b cɔlm’o i ? » 26Yiesu yen u ŋuantieb bo pund yen b ŋadunŋ Gerasaniɛn-nba doug n ninŋ, k l doug tuol yen Galile. 27Yiesu n yaan nyiɛ ŋadunŋ n ninŋ youg nba, k l doug n ninŋ jua nne tuog’o. Sanpola bo ŋuan l jua k l wai. U bo g liɛ siɛl, u biɛ bo g kua ŋaag, u bo dua kakula n ninŋ i. 28Wan yaan la Yiesu, k u baa g gbaan u nunŋ n ninŋ, g tand g maad yen paalu k nne: « Yendu Badciɛn Bija Yiesu, bɛ n be min yen fin siign i ? Miɛl sugl g daa ŋɔnŋ’n fala. » 29U bo maad nnyan k l maa Yiesu bo niin sanpola, k ban yaad g ŋaa l jua. L g luol fuunu munŋaa, k l sanpola bo tu yie u po. B bo tu lol u nui yen kudsiseli g biɛ dagn u titala k wan daa fid g gad siɛl. Ama u bo tu ciel l kul i, sanpola ń kuan’o muaɔg. 30G Yiesu bual’o: « A sann i ? » K u maad: « T-yab. » K l maa sanpola bonciɛnn bo ŋua’ɔg. 31K b miɛd Yiesu sugl k wan daa bel g lebn’m naan buol nba g fala kan ban g gbenn. 32L sua g duoli bonciɛnn be l buol, k b kpaa’b jual n ninŋ. G sanpola miɛl Yiesu sugl, k wan cab k ban gad g ŋuan l duoli. K u cab’b. 33Lann i k b ŋaa l jua, g ji ŋuan duoli. K l duoli nyiɛ jual po, g san san g baa mɔgl n ninŋ, g biɛl. 34Duokpaali n yaan la yal nba tien, k b san g gad g maad l laabaal doug n ninŋ yen dingbana n ninŋ. 35G niib nyiɛ k ban diid yal nba bo tien. K b baal Yiesu buol, g la jua nba g sanpola bo yaad g ŋaa’ɔg nyan, k u kal Yiesu nintual n, g liɛ tiɛd, g ji tie nimɔn. G jiwaani kua’b. 36G yab nba bo be l buol g la l youg dugn lan tien nand g sanpola yaad g ŋaa l jua. 37G Gerasa doug n niib kul ji baln Yiesu, k wan nya b tinŋ n, k l maa jiwaani bo suol’b bonciɛnn. Lann i k u kua ŋadunŋ n ninŋ g lebd. 38G jua nba g sanpola bo yaad g ŋaa’ɔg nyan miɛl’o, k wan gii be yen’o. Ama k u yie g maad’o: 39« I kun a ŋaapo, g daan maad Yendu n yaan tien yal nba kul a po. » K u gad g muand doug munn kul Yiesu n yaan tien yal nba kul u po. 40Yiesu n yaan lebd Galile yaa youg nba, g niwulug gaal’o, k l maa b kul bo guu’ug. 41G jua nne tan baal g baa g gbaan Yiesu nintual n. B bo yi’ug Saayirus i, k u tie Suif‑nba tintaann dieog n canbaa. K u miɛl Yiesu, k wan baal u ŋaapo, 42k l maa u bo mɔg bipuobyenŋ kua i, k l big pund nyan bina piig yen ŋanle nne, g yiɛl g nag kuum o. Yiesu n yaan saa youg nba, g niwulug belb g tud lieb g mabnd’o. 43L sua g puo nne bo be g wul faad k l g kɔl piig yen bina ŋanle n nyan. U bo biil u mɔgm kul dogda‑nba buol. Sua yen bo g fid g teb’o. 44K u nagn Yiesu puol po, g sii u liɛdl mɔgbann. L youg mɔno, k u sɔm ji kɔl. 45G Yiesu bual: « Ŋmaa sii’n i ? » K b kul nai, g Piɛr maad’o: « Yonmdaan, niib n yiɛ g tud’a. » 46Ama g Yiesu maad: « Sua sii’n. K l maa n la g paalu nyiɛ n ninŋ. » 47L puo n yaan la k l g tie wuodi bonn, k u nagn u buol, g jegl, g baa g gbaan, g maad niib kul nunŋ n ninŋ yal nba po te k u sii’ug, yen wan paag nand l youg mɔno. 48G Yiesu maad’o: « N bipuo, a paag g dugn a dug n po. I saa yen laafiɛ. » 49U daa bo g maad g gbenn mɔno, g nil nyiɛ Suif‑nba tintaann dieog n canbaa Saayirus ŋaag, g baal g maad wano Saayirus: « A bipuo kpe o. Ji daa mabnd Canbaa. » 50Yiesu n yaan gbad nnyan, k u maad Saayirus: « Daa jie. I dug n po kukua, k u bu la laafiɛ. » 51Wan yaan pund l ŋaag, u g tuo g sua ń kua yen’o, lan nyan Piɛr yen San yen Saak yen binaa yen bibaa kua i kaa. 52Niib kul bo buud g fabn l big po. G Yiesu maad’b: « Daa buud man. U g kpe kaa, u gɔ i. » 53K b laa’ɔg, k l maa b bo ban k u kpe. 54K u suol big nuu, g yiin’o, g maad: « Sipaanbig, fiil. » 55K u fuom guan, k u fiil l youg mɔno. G Yiesu maad k ban te’og jied. 56K l yaa g lid u danm. Ama g Yiesu kpaa’b, k ban daa maad sua yal nba tien ne.

will be added

X\