Luk 7

1Yiesu n yaan maad niib wan mɔg yal g gbenn, k u kua Kafarnawunm doug n ninŋ. 2L sua g Rom sijenm ciɛn nne be l buol, k u yonm nba k u mand g bua’ɔg nyan yiɛl g nag kuum o. 3Wan yaan gbad k b maad Yiesu po, k u sun Suif‑nba nikpela, k ban gad g miɛl’o, k wan baal g fiel u yonm. 4Ban yaan pund u buol, k b balm’o g maad: « U l dagd yen k a tuo wan bual yal, 5k l maa u bua t buolu, wano n biɛ te k b maa t tintaann dieog. » 6G Yiesu yeg yen’m k b saa. Ban tan nag ŋaag, g sijenm ciɛn biɛ sun u dɔnn‑nba k ban maad’o k nne: « Canbaa, daa mabnd a kua. K l maa n g dagd yen ŋan kua n ŋaag n ninŋ. 7Lann n te k min mɔno diid g sua k n g dagd yen k n baal a buol. Ama, maad lanbonyenn kua, k n yonm ń paag. 8K l maa, n mɔ mɔg canbaa‑nba g cɔln’m. G mɔg sijenm nba cɔln’n mɔ. N tu maad yend: “ Gad. ” Wan gad. G maad lua: “ Baal. ” Wan baal. G maad n yonm: “ Tien ne. ” Wan tien. » 9Yiesu n yaan gbad u maam, k u pag’o. G gbeg g maad niwulug nba bo ŋua’ɔg nyan k nne: « N maad’i, Israyɛl buolu n ninŋ mɔno, n g la nil nba dug n po nne. » 10L sijenm ciɛn sundi n yaan guan ŋaag youg nba, k b la l yonm g siɛl ji g mɔg’o. 11L puol po, g Yiesu gad doug nne ninŋ, k b yi Nayɛn. U ŋuantieb yen niib bonciɛnn bo yeg yen’o. 12Wan yaan nag l doug dimɔb buol, k u tuog niib k b tug kuum g saa g daan bu pii. Pekual nne bija n bo kpe ; wano kua n bo tie u big. Doug n ninŋ niib bonciɛnn bo ciɛnd’o. 13Yonmdaan Yiesu n yaan la l big naa, g ninbaaɔg suol’o, k u maad’o k wan daa buud. 14G nagn g sii kaliɛndaba, g kutugla sed. K u maad: « Naasen, n maad’a, fiil. » 15G naasen nba bo kpe nyan fiil g kal, g ji maad. G Yiesu ŋmiɛn’o u naa. 16G jiwaani suol b kul, k b dond Yendu g maad k nne: « Yendu sogni nba mɔg yudand ŋɔn u kua t siign ninŋ. Yendu gɔnn u buolu. » 17K b maad Yiesu po Suude n ninŋ kul, yen l dingbankunkogi n ninŋ kul. 18San ŋuantieb bo gad g dugn’o Yiesu n yaan tien yal nba kul. K u yiin b ninŋ banle, 19g sun’m Yonmdaan buol, k ban bual’o: « Fin n tie yua n bo bu baal daa bii, t daa baa guu sua i ? » 20Ban baal Yiesu buol youg nba, k b maad’o: « San Nyunwultua n sun’ti, k tin bual’a g liɛ, fin n tie yua n bo bu baal daa bii, t daa baa guu sua i ? » 21L youg mɔno g Yiesu te g yiɛnm yen yab bo yiɛl yiɛlpaali g bonciɛnn paag. Sanpola bo ŋua niib bonciɛnn k u bel g yaan l sanpola kul. G biɛ te g juanm bonciɛnn mɔ nyuand. 22Lann i k u ŋmiɛn San tondi, g maad: « Guan man g daan maad San yin la yal g biɛ gbad yal: Juanm nyuand, g wabi sonm, g gbaada paagd, g tuukpaa gbiɛ, g kpienm yied, k b muand tali Laabamann. 23Yua nba kan buon u dindann g dugn n po, pamann tie u yal i. » 24San tondi n yaan lebd g kun, g Yiesu ji maad yen niwulug San po nne: « I gad g diid bɛ i tinkuonŋ n ninŋ i ? Galgulnn nba g faalu mign ii ? N n. 25K i yen gad g la bɛ ? Nil k u liɛ tiɛŋand ii ? I ban g yab nba liɛ tiɛgbenŋa, g be manu n, b kua batieb ŋai i. 26K i yen ji gad g diid bɛ i ? Yendu sogni ii ? Yen mɔni, i gad g la Yendu sogni i, ama yin la yua nba nyan, u cie Yendu sogni mɔno. 27U po i k l diɛn Yendu maam kadaaɔg n ninŋ nne: “ N bu sun n tond k wan gaal liig, g ŋanm a sɔnu g sua k a baal. ” 28N maad’i, puob n mal niib nba kul tinŋ n ne, nil daa g be g cie San. Ama yab tuo Yendu bal ne, b siign yua g tie siɛl mɔno cie San. 29Niib nba kul bo cenŋ San maam, baa lonpogaala mɔno, b kul bo tuo g Yendu n tie yal nba dagd, g San wul’b nyum. 30Farisiɛn-nba yen Yendu Kadaaɔg gbanbanda nuan g tuo Yendu n yaan bo bua nand b po, g yie g San g wul’b nyum. 31N ban k n bu maad bɛ i mɔlane niib ne po i ? B tie nibuollanu n ne i ? 32B tie nyan bid nba kal jinjelnbaaɔg n, g yi lieb g maad: “ T pieb naagbaag, k i g ŋɔ siɛg. K t yin kuyani, k i g mɔ kumɔni. ” 33N maad nnyan g dugn San Nyunwultua baal g g di jied, g biɛ g nyu daam, k i maad g sanpola ŋua’ɔg. 34G Nifosaal Bija baal, g di g nyu, k i maad: Diid man nil ne. U puol man g kand, u tie dinyuul i, u tie lonpogaala yen biiddanm dɔnn i. 35Ama yab nba gaan Yendu yanfuom n ŋɔnŋ b binbem n ninŋ k l yanfuom tie mɔni. » 36G diyenn Farisiɛn nne yiin Yiesu k wan di yen’o. K u kua l Farisiɛn ŋaag g kal g bu di. 37L sua g puo nne be l doug n ninŋ, g tie biiddaan. Wan yaan gbad g Yiesu di Farisiɛn ŋaag, k u tug kunkɔnŋanŋ nne k l gbie yen tilaali, 38g baal g sed Yiesu puol po u titala buol g buud, k u ninsiid baal Yiesu titala po, k u fiɛn yen u yud, g muad, g sɔgn tilaali. 39Farisiɛn nba bo yiin Yiesu n yaan la nnyan, k u maad u pal n ninŋ: « Jua ne bo gii tie Yendu sogni, u bo bu bann puo nba siin’o ne n tie yua. U bo bu bann k u tie biiddaan i. » 40G Yiesu maad’o: « Simɔn, n mɔg maam g bu maad’a. » K u tuo: « Canbaa, i maad. » 41G Yiesu maad: « Jab banle nne bo kpend ligli niyend buol. G yend pann tie dibala kobiinmu, lua mɔ dibala piinmu. 42Ban yaan bo kan fid g pa nyan, g nil ŋann cab banm banle b pana. To, b ninŋ ne, ŋmaa n baa bua’ɔg g cie u lua i ? » 43G Simɔn ŋmiɛn g maad: « N tama g yua nba k u pann yab i. » G Yiesu maad’o: « Lann n kon nyan. » 44G ji gbeg l puo po g maad Simɔn: « A la puo ne ii ? Min kua a ŋaag n ninŋ ne, a g te k b ŋunn n titala. Ama wano ŋunn n titala yen u ninsiid, g fiɛl yen u yud. 45Fin, a g muad n tankpinn. Ama puo ne n l kua ne, u l muad n titala i. 46A g bud kpam n yul po. Ama wano yen bud tilaali n titala po. 47Lann n te k n maad’a: Wan ŋɔn buam bonciɛnn nba n po ne, lann n ŋɔnŋ k u biid n l yab nand kul, l piin. Ama yua nba mɔg biid waam nne k b piin l biid, u tu ŋɔn u buam mɔ waam nne i. » 48G maad puo: « A biid piin o. » 49G yab nba bo kal g di yen’o nyan ji maad b pala n ninŋ: « Nil ne tie ŋmaa po i, g mɔ piind biid i ? » 50G Yiesu maad puo: « Ŋan yaan dug n po nyan, a la fielu. I kun k a yam ń ji gii dua. »

will be added

X\