1 Yiesu bo pend kpaab n ninŋ Saaba daal, k u ŋuantieb togd dii g pini g ŋman. 2 G Farisiɛn-nba yenm maad: « Bɛ n te k i suun yal nba k l g cab g nil ń sun Saaba daal i ? » 3 G Yiesu ŋmiɛn g maad’b: « I g lii Yendu Kadaaɔg n, diyenn kom n bo suol Dafiid yen u yegni k u sun yal ii ? 4 U bo kua Yendu-cend‑buol-jounŋ n ninŋ, g juab salg kpanu g ŋman, g tie u lieb, k l yen bo g cab g sua ń ŋman, l gii g tie salg-yidkab kua i kaa. » 5 Lann i k u maad’b: « Saaba be Nifosaal Bija nuu n i. » 6 Saabaliel daal k u kua tintaann dieog n ninŋ g tund niib Yendu maam. L sua g jua nne be l buol k u nuujendu kpe. 7 G Yendu Kadaaɔg gbanbanda yen Farisiɛn-nba ji suli Yiesu, k ban diid g liɛ u bu paag l jua Saaba daal, k ban fid g jalg’o oo ? 8 Yiesu n yen bo ban ban mali yal nyan, k u maad jua nba k u nuu bo kpe nyan, k wan fiil g sed siign. K u fiil g sed. 9 G Yiesu maad: « N bual’i, l cab g Saaba daal, nil ń tien bonŋann daa bii bonbiil i ? K wan fiel nifuog daa bii k wan biɛn’o i ? » 10 K u ŋaand ninbina b kul po, g maad l jua k wan tand u nuu. K u tand, k l nuu paag. 11 K b pala bie bonciɛnn, k b taan g kpaan ban bu tien Yiesu nand. 12 L dana n ninŋ, g Yiesu nyiɛ g duo jual po g bu jaand, g jaand nyamunŋ kul. 13 Lan yaan tan fann youg nba, k u yiin u ŋuantieb g lugd b ninŋ piig yen banle, g yiin’m u sundi. 14 Wan bo lugd yab sana n ne: Simɔn, yua k u bo pul’o Piɛr, yen u ninja Andre, yen Saak yen San yen Filiip 15 yen Bartelemi yen Matieog yen Toma, yen Alfe bija Saak 16 yen Simɔn yua nba bo kɔn u doug po, yen Saak bija Suuda yen Suuda Iskariyɔt, yua nba bo bu kuad Yiesu. 17 Yiesu bo nyiɛ jual po g jiid yen’m g sed jɔnyiɛlu. U ŋuantieb bonciɛnn bo be l buol ; niib bonciɛnn mɔ bo be g nyiɛ Suude kul n ninŋ yen Serusalɛm doug n. G lieb nyiɛ Tiir yen Sidɔn dingbana nba be mɔgl kunŋ nyan. 18 B bo baal k ban cenŋ’o, k wan biɛ paag’b. Yab nba g sanpola bo mabnd’b mɔ bo paag. 19 Niib kul bo kpaan k ban sii’ug, k l maa paalu bo nya u ninŋ g paagd b kul. 20 Yiesu bo yaad g diid u ŋuantieb g maad’b: « Yinm nba tie tali, pamann tie i yal i, g dugn yinm n tie Yendu diem yab. 21 Yinm nba g kom mɔg’i mɔlane, pamann tie i yal i, g dugn i tan bu guo. Yinm nba buud mɔlane, pamann tie i yal i, g dugn i tan baa kpanm. 22 Niib gii g bua k b la’i yen ninbinn, g biel’i, g sugd’i, g biid i sann g dugn Nifosaal Bija po, pamann tie i yal i. 23 L tan gii baal’i nnyan, yin gii kpanm yen pamann, k l maa i nyuad tan baa yab Yendu ŋaag. B baa‑nba mɔ bo tiend Yendu sogni‑nba nnyan i. 24 Ama, yinm nba tie ŋalmandanm, l tan baa biɛ i po, g dugn i la i nyuad o. 25 Yinm nba guo mɔlane, l tan baa biɛ i po, g dugn kom tan bu suol’i. Yinm nba laa mɔlane, l tan baa biɛ i po, g dugn i tan baa cagn g buud. 26 Yinm nba g niib kul pag’i, l tan baa biɛ i po, g dugn l niib baa‑nba bo tiend yab bo fa k b tie Yendu sogni‑nba nnyan i. 27 Yinm nba cenŋ’n ne, n maad’i: I bua man i ninnanda. Yab nba g bua k b la’i yen ninbinn nyan, i tiend’b man ŋanm. 28 Yab nba polg’i mɔb, i miɛd man Yendu yedŋanm b po. Yab nba biid i sann mɔ, i jaand man b po. 29 Nil gii peb’a kpiɛnyenu, ŋan te’og liel po. Nil gii fiel a liɛdgbenŋl, ŋan cab’o a liɛdbig mɔ. 30 Yua nba kul miɛl’a, ŋan te’og. G yua nba juab a bonn, ŋan daa bual’o l po. 31 I gii bua g niib ń gii tie yal nba i po, yin mɔ ń gii tie’b lann. 32 I gii bua yab nba bua’i kua, i bulcind be lɛ i ? Baa biiddanm mɔno bua yab nba bua’b. 33 I gii tiend ŋanm yab nba tiend’i ŋanm, i bulcind be lɛ i ? Baa biiddanm mɔno tiend nnyan. 34 I gii kpend yab nba k i ban k b bu ŋmiɛn’i, i bulcind be lɛ i ? Baa biiddanm mɔno kpend biiddanlieb, k ban tan ŋmiɛn’m ban kpend yal i. 35 Ama, i bua man i ninnanda, gii tiend’b ŋanm, gii kpend g daa daan siɛl. Nnyan, i nyuad tan baa yab, yin gii tie Yendu Badciɛn bid, k l maa wano nuan ŋanmd yaa danm nba g ban ŋanm, yen tondanm. » 36 « I tie man yab jie niib ninbaaɔg, nyan i Baa mɔ n yaan jie niib ninbaaɔg nand nyan. 37 Daa jalg man sua. Nnyan, Yendu kan jalg’i. Daa tien man sua biid, Yendu mɔ kan te’i biid. I di man sugl niib po. Nnyan, Yendu mɔ bu di sugl i po. 38 I piin man, nnyan Yendu bu pi i mɔ. U bu bign golunŋ nba yab, g nyag nyag, lan gbie g yad, g ŋuun i kpalpiɛɔg n ninŋ. K l maa, yin bignd nand g tien lieb, Yendu tan bu bign nnyan i g te’i. » 39 K u biɛ pua’b makpanjam nba ne: « Juan bu fid g dadb juan ii ? B banle kul kan baa buoug n ninŋ ii ? 40 Tuonbanŋl g cie u canbaa. Ama tuonbanŋl nba kul banŋ g gbenn, u baa tie nyan u canbaa nyan i. 41 Bɛ po i k a nyuan muanu nba be a ninja ninbinn n ninŋ, g yen g la daaɔg nba paan a yal n ninŋ i ? 42 A bu tien nle i g maad a ninja: “ N ninja, tien suoo k n nyan muanu nba be a ninbinn n ninŋ ”, k a yen g nyuan daaɔg nba paan a yal n ninŋ i ? Fin munafigidaan ne, daa pand daaɔg nba paan a ninbinn n ninŋ o, nnyan, a bu ŋanm g nyuand g fid g nyan muanu nba be a ninja ninbinn n ninŋ. 43 Tiŋanŋ g be g luon luanbiid. Tibiiug mɔ g be g luon luanŋana. 44 B band tiig kul u luana buol i. B g pɔ kinkana kunkontiig po, b biɛ g pɔ sinsaba kunkonbɔnn po. 45 Nimɔn n yaan mɔg bonŋana nba u pal n ninŋ, u nyanŋ lann i. G nibiiug mɔ n yaan mɔg bonbiiug nba u pal n ninŋ, u nyanŋ lann i. K l maa u pal n ninŋ n gbie yen yal, u maad lann i. 46 Bɛ po i k i yi’n Yonmdaan, Yonmdaan, g yen g tiend min maad’i yal nba i ? 47 N bu ŋɔn’i yua nba baad n buol, g cenŋ n maam g biɛ tiend lan bual nand n tie yua nba. 48 U tie nyan nil nba bua n maa ŋaag, g gbiil k l nyuag g daan nand tantiɛɔg, g bil fiɛgl. G bɔnŋ gbie g yad, g nyum yil l ŋaag, g yen g fid g gul’o, k l maa b maa k l paa. 49 Ama daan nba cenŋ n maam g g tiend lan bual nand, u tie nyan nil nba maa ŋaag tand po, g g bil fiɛgl. G bɔnŋ gbie g yad, g nyum yil l ŋaag, k l wob g baa l youg mɔno g te digbeonŋ. »
